ЦЫМЫДИСОН БАЛЦ

Æрæджы Хуссар Ирыстоны паддзахадон университеты студентон советы 17 активисты, Ирыстоны истори æмæ кавказзонынады кафедрæйы хистæр ахуыргæнæг Бæззаты Николай æмæ иумийаг историйы кафедрæйы ахуыргæнæг Тедеты Хетæгы сæргълæудæй балцы уыдысты Пятигорск æмæ Стъараполы. Уыдон федтой Стъараполы фенддаг бынæттæ. Балц организаци æрцыд 2020-2022 азтæн паддзахадон комплексон нысанон программæ «Республикæ Хуссар Ирыстоны рæзгæ фæлтæры монон-хæрзæгъдау хъомылады» фæлгæтты. Балцы иницитатор æмæ организаторæй уыд ХИПУ-йы ректор Тедеты Вадим.

«Мах бацыдыстæм истори-он бынæттæм, фыццаг рады уыдыстæм  Уæрæсейы хуссары егъаудæр музей «Россия – моя история»-мæ, цыран экскурсийы хайадисджытæ базонгæ сты нырыккон технологитимæ интерактивон форматы. Иууылдæр баззадысты райгондæй. Студенттæ кæрæдзийæн дзырдтой сæ тæлмæнтæ æмæ сæ къамтæ истой экспонатты цур. Бацыдыстæм чырыстон аргъуантæм, Михаил Лермонтовы музеймæ, паркмæ, цыран амардтой стыр поэты. Уæлдай стырдæр тæлмæнтæ студентты зæрдæтыл ныууагъта зынд-гонд «Провал» –  Машукы хуссар фахсыл  æрдзон цъай. Уый фæстæ та нæ делегаци ацыд Стъараполмæ. Уым дæр бацыдыстæм культурон æмæ историон бынæттæм – гом арвы бын æфсæддон техникæйы музеймæ, цыран алкæмæндæр фадат уыд уæрæсейаг æфсады æфсæддон техникæйы хуызæгты фенынæн. Уыдыстæм нывгæнæг-академик В.Смироновы музей-хæдзары дæр, цыран ис ирон литературон æвзаджы бындурæвæрæг æмæ нывгæнæг Хетæгкаты Къостайы мемориал, кæцы Стъараполы нымадта йæ дыккаг райгуырæн бæстæ æмæ цард Смирновты хъæууон цæ-рæнуаты фыццаг уæладзыджы», – радзырдта нын Бæззаты Николай.

Уый ма куыд загъта, уымæ гæсгæ студенттæ лæмбынæг кастысты техникæмæ. Музей у нырыккон æмæ интерактивон. Интерактивон фæйнæджытыл æфсæддон техникæйы фарсмæ студенттæн сæ бон уыд фехсын дæр. «Смирновты хæдзар-музейы студенттæ федтой Къостайы историон дзаумæттæ. Уыдыстæм ма Пятигорскы музей «Россия-моя страна»-йы музейы филиалы», – банысан кодта делегацийы къухдариуæггæнæг. Балцы кæрон ХИПУ-йы минæвæрттæ фембæлдысты Стъараполы ирон æхсæнадон организациимæ, кæцы пандемийы рæстæджы стыр æххуыс бакодта Хуссар Ирыстонæн. Ирон делегацийы райстой тынг хъарм æмæ  традицион æртæ уæливыхимæ.

«Фембæлд рауад тынг цымыдисон. Кæрæдзийæн загътам нæ хъуыдытæ ирон традицитæ æмæ æгъдæуттæ бахъахъхъæныны фарстыты тыххæй. Организацийы минæвæрттæ нын радзырдтой сæ архайды тыххæй æмæ банысан кодтой, зæгъгæ, уый размæ сæм уазæгуаты уыд ХИПУ-йы ректор Тедеты Вадим æмæ се ‘хсæн сæвзæрд хæларадон ахастытæ. Уый фæстæ сын фенын кодтой кълæсты, цыран ирон лæппутæ архайынц спорты алы хуызтæй, афтæ ма ирон кафты кълас дæр. Студентон советы сæрдар, инженерон-экономикон факультеты 4-æм курсы студент Гаглойты Эдгар дæр банысан кодта, зæгъгæ,  экскурсийы программæ уыд хъæздыг æмæ цымыдисон.

ОСИАТЫ Индирæ