Хуссар Ирыстоны Анахарсисы номыл национ библиотекæмæ æрбацыд бирæ адæм, ахуыргæндтæ, ахуырад æмæ культурæйы къабæзты кусджытæ, æхсæнады минæвæрттæ. Уыдон æрбацыдысты философон зонæдты кандидат Дзугаты Къостайы монографи «Понятие «окно возможностей» применительно к интеграционно-воссоеди-нительному процессу Осетии»-йы æртыккаг хайы презентацимæ.
Мадзалмæ æрбацыд РХИ-йы Президент Бибылты Анатоли дæр. Презентаци байгом кодта Уазæгты Юри. Уый банысан кодта чиныджы ахсджиагдзинад æмæ бакаст зынгæ ирон ахуыргонд Дзидзойты Валерийы рецензи уый фæдыл.
Чиныджы автор Дзугаты Къоста лæмбынæг æрдзырдта йæ нысаниуæгыл. Банысан кодта, зæгъгæ, ацы презентаци уагъд цæуы, Хуссар Ирыстоны Парламентмæ æвзæрстытæ куы ацыдысты, уый хæдфæстæ, цыран фæуæлахиз сты, дыууæ Иры баиу кæныны фарст æдзух чи размæ кæны, уыцы парти «Иууонд Ирыстон». Куыд Хуссар Ирыстонæн, афтæ Цæгат Ирыстонæн дæр, абон нæ сæйрагдæр аудинаг у, цæмæй баиу уой Ирыстоны дыууæ хайы. Уыцы фарст скъуыддзаг куы æрцæуа, æр-мæстдæр уæд ис æнхъæлмæкæсæн Ирыстоны рæсугъд сомбонмæ, йæ рæзт æмæ размæцыдмæ. Ацы ахсджиаг, скъуыддзагкæнинаг фарст нæ адæмы раз рагæй лæууы. Цалдæр хатт йæ аскъуыддзагкæнынмæ æвналгæ дæр æркодтой, фæлæ алы хатт дæр нæ адæмы раз Тбилис æвæрдта стыр æмæ карз зындзинæдтæ. Уыимæ ма нæ фыдæлтæн нæ фаг кодта тых æмæ кæрæдзиæмбарынад дæр.
Раныхасгæнæг банысан кодта, зæгъгæ, ацы фарст аскъуыддзаг кæнынæн ныры хуызæн хорз фадат никуы уыдис æмæ дзы хъæуы спайда кæнын.
РХИ-йы Президент Бибылты Анатоли та йæ ныхасы банысан кодта, зæгъгæ ирон адæммæ дыууæ Ирыстоны баиу кæныны фæнд уыдис æмæ дарддæр дæр уыдзæнис, цалынмæ æххæст æрцæуа, уæдмæ. Кæд дзурæм æмæ нæ тых ис иудзинады, уæд уый æвдыст æмæ æххæст хъуамæ цæуа хъуыддагæй. Куы баиу уæм, уæд, зæгъгæ, Ирыстоны бирæ фарстатæ скъуыддзаг æрцæудзысты сæхигъæдæй. Уыцы нымæцы æвзаг æмæ культурæйы фарстатæ дæр. Ацы фарсты ныхмæ сты, ам чи нæ цæры æмæ ардæм стæм хатт чи ‘рцæуы, стæй ма йæ фæлмæн бандон фесафынæй чи тæрсы, уыдон дæр. Уыдонæй иутæ адæмы тæрсын кæнынц, бындур кæмæн нæй, ахæм алыгъуызон хъуыдытæй. Уыцы нымæцы, зæгъгæ, кæм уыдзæнис Ирыстоны центр, бынат кæм уыдзæн Президент æмæ Хицауады сæрдарæн, кæм кусдзæнис парламент. Ахæм æмбæстæгтæн та мæ зæгъын уый фæнды, æмæ мах стæм иу адæм, не ‘хсæн бæрзонд у кæрæдзиæмбарынад æмæ уыцы техникон фарстытæ не сты зын аскъуыддзагкæнинаг.
Историон зонæдты кандидат Джиоты Мурат та банысан кодта, зæгъгæ, абон мах цы чиныджы тыххæй дзурæм, уый бирæ историон чингуытæй у ахсджиагдæр. Йæ хорздзинæдтæ бирæ сты. Иуыл дзы æз нымайын, автор цы факттыл дзуры, уыдон æрымысæггаг кæй не сты, фæлæ Коста бæлвырдæй кæй зоны, ахæм факттæ. Ацы чиныджы хорздзинад ма у уый дæр, æмæ Къоста уæндон æмæ æргомæй кæй дзуры, зæгъгæ, кæронмæ цæуын хъæуы нæ фыдæлтæ дыууæ Ир баиу кæныны тыххæй цы фæндаг равзæрстой, ууыл.
Презентацийы ма чиныджы пайда æмæ мидисы тыххæй сæ фиппаинæгтæ дзырдтой ахуыргæндтæ Гатыгкоты Гиви, Гæбæраты Анатоли, Санахъоты Инал, Парламенты депутат Гæбæраты Юри, университеты ректор Тедеты Вадим, Плиты Инал æмæ æндæртæ.
Презентацийы фæстæ йæ хайадисджытæ иумæ систой къам.
ГÆЗЗАТЫ Иван
Comments are closed, but trackbacks and pingbacks are open.