Цæттæйæ сæмбæлдысты ног ахуыры азыл

Ӕлборты Феликсы номыл Цхинвалы музыкалон ахуыргӕнӕндонӕн йӕ лӕггæдтæ бирæ сты, аивады курдиат кӕй уӕнгты тӕлфы, уыцы ӕрыгон адӕймӕгты профессионалондзинад рӕзын кӕныны. Ӕмбӕлон ахуырад райсыны фӕстӕ ӕвзонг кадртӕ ӕрлӕууынц сӕ равзӕрстгонд дӕсныйадыл ӕмӕ сӕхи рады сӕхӕдӕг дӕр фӕкӕнынц рӕзгӕ фӕлтӕримӕ хъомылгӕнӕджы арфӕйаг куыст. Ӕндӕртӕ та, сӕ зонындзинӕдтӕ фӕарфдӕр кӕныны тыххӕй дарддӕр сахуыр кӕнынц Уӕрӕсейы ӕндӕр ӕмӕ ӕндӕр горӕтты консерваториты. Нӕ музыкалон ахуыргӕнӕндон (директор Гӕджиты Жаннӕ) ног ахуыры азмӕ райста 40 студенты ӕмӕ сын сӕ зонындзинӕдтӕ равзӕрстгонд дӕсныйадмӕ гӕсгӕ амондзысты бӕрзондквалификациджын специалисттӕ. Иууыл фылдӕр куырдиӕттӕ ӕрбацыд хореографийы хайадмӕ, уый та баст у, нӕ республикӕйы иумиагахуырадон уагдӕттӕ ӕмӕ культурӕйы артдзӕстытӕ хореографимӕ фылдӕр хъусдард кӕй здахынц, уыимæ. Ӕвзонг лӕппутӕ ӕмӕ чызджытӕ кафты сусӕгдзинӕдтыл куы фӕхӕст вӕййынц, уӕд сӕ бафӕнды кафӕджы дӕсныйад райсын.

 Ахуыргӕнӕндоны бирӕ азты кусынц ӕмӕ хорз кадртӕ бацӕттӕ кӕныныл уӕхскуӕзӕй архайынц фортепианойы хайадӕй Гӕджиты Жаннӕ ӕмӕ Тъехты Маринӕ; хорӕн дирижер кӕныны хайадӕй Хъуылымбегты Иринӕ, Босыкты Фатимӕ; адӕмон инструментты хайады ахуыргӕнджытӕ Куымӕридтаты Тинӕ, Уалыты Нинӕ, Куыдзеты Агуындӕ, ӕвзонг специалисттӕ Дудайты Сӕрмӕт ӕмӕ Къӕбысты Сӕрмӕт; академион зарыны хайадӕй Хъуылымбегты Луизӕ, Сланты Ацӕмӕз ӕмӕ Гасситы Ацӕмӕз; эстрадон зарыны хайадӕй – Дзигойты Нинӕ; хореографийы хайады хореографтӕ Санахъоты Сослан ӕмӕ Тедеты Ацӕмӕз.

Музыкалон ахуыргӕнӕндоны 1970-ӕм азтӕй фӕстӕмӕ уӕвынад кӕны адӕмон инструментты оркестр ӕмӕ сси канд коллективы уарзон нӕ, фӕлӕ йӕ арӕхстдзинадӕй балхӕны, сӕ концертмӕ сын чи бакӕсы, уыдоны зӕрдӕтӕ дӕр. Ацы оркестрӕн фӕстаг цалдӕр азы арӕхстджын разамынд кӕны Куымӕридтаты Тинӕ.

Музыкалон ахуыргӕнӕндоны бирӕ ис, ахуыры йӕхи цӕвиттойнагӕй чи ӕвдисы, ахӕм студенттӕ дӕр. Зӕгъӕм, Президентон стипендитӕ саккаг кодтой адӕмон инструментты хайадӕй Ходты Арсен (ирон фӕндыр) ӕмӕ Кокойты Аллӕйӕн (эстрадон джазы вокал). Дирекци батыхст, сӕ царды уавӕртӕ мӕгуырау кӕмӕн сты, ахӕм бинонтӕй рацӕугӕ студенттыл дӕр ӕмӕ уыдон та исынц социалон стипендитӕ. Ахуыргӕнӕндоны библиотекӕ хъӕздыг у алыгъуызон хъӕуӕг литературӕйӕ ӕмӕ сӕ арӕхстджынӕй пайда кӕнынц се ‘рвылбонон ахуыры. Афтӕ, ӕмӕ ахуыргӕнӕндоны коллектив цӕттӕйӕ ӕмбӕлы ног ахуыры азыл.

ХУЫБИАТЫ Никъала