Фæскавказы æдасдзинад биноныг кæныны фæдыл Женевæйы уагъдцæуæг дискусситы радон раундмæ бацæттæ кæныны нысанæн знон Хуссар Ирыстонмæ æрцыдысты дискусситы дунеон организациты æмсæрдæрттæ.
Хуссар Ирыстонæй дискусситы æмсæрдар, Фæсконфликтон фарстатæ бæстонкæнынады фæдыл РХИ-йы Президенты æххæстбарджын минæвар Джиоты Мурат уазджытæн æгасцуай зæгъыны фæстæ йæ ныфсы æнкъарæн равдыста, радон раунды боны фæткыл куыст æнтыстджын кæй уыдзæн. Ноджыдæр банысан кодта, дискусситы раз цы сæйраг æмæ ахсджиаг фарст лæууы тыхæй не спайда кæныны тыххæй, уыцы юридикон бæрнон документыл къухтæ æрфыссыны ахсджиагдзинад. Джиоты Мураты ныхæстæм гæсгæ, радон раунды иумиаг тыхтæй сараздзысты размæ иу къахдзæф.
«Тыхæй пайда кæй нал æрцæудзæн, уыцы документыл куыст хуымæтæг нæу, уымæн æмæ уыцы фарсты фæдыл Хуссар Ирыстон æмæ Гуырдзыстоны позицитæ кæрæдзимæ дард лæууынц. Фæлæ зондджын хъуыды æмæ нæ иумиаг тыхтæ, мæ хъуыдымæ гæсгæ, ахъазгæнæг уыдзысты регионы сабырадæн æмæ адæмы æдасдзинадæн»,- дзырдта Джиоты Мурат.
Уымæй дарддæр уый протесты нысан равдыста, æрæджы Гуырдзыстон Интерполы хаххыл хуссарирыстойнаг æмбæстæгты фæдагуырдмæ кæй радта, уый фæдыл. Уый тыххæй хуссарирыстойнаг фарс бахатыд гуырдзиаг фарсмæ, цæмæй уавæр ма карз кæной æмæ Хуссар Ирыстоны дискреди-тацийы практикæйæ мауал пайда кæной. Ацы фарсты фæдыл Хуссар Ирыстоны делегаци йæ ныфсы æнкъарæн равдыста дунеон организациты минæвæртты æмбаргæ ахасты тыххæй. Æмбаргæ уавæрты, зæгъгæ, адарддæр кæндзыстæм куыст Инциденттæ ма æруадзын æмæ сæм хъусдард захыны фæдыл механизмты куысты фæлгæтты дæр. Уымæн æмæ механизмты ахсджиаг формат ахъазгæнæг у арæнтыл уавæры стабилон-дзинадæн.
«Механизмты куысты форматы къухты бафты арæнтыл сæвзæргæ проблемæтæ æрбæстон кæнын. Æмæ чи цыфæнды ма дзура, уæддæр Хуссар Ирыстон æмæ Гуырдзыстоны ‘хсæн ис паддзахадон арæн», – дзырдта ныхасгæнæг. Женевæйаг дискусситы хуссарирыстойнаг делегацийы сæргълæууæг ма фембæлды хайадисджыты базонгæ кодта, æрæджы механизмты куыстæй протесты хуызы цы аххосагмæ гæсгæ рацыд Хуссар Ирыстоны фарс, уыимæ. Фæлæ уый нæ нысан кæны, æмæ уыцы куыстæй Хуссар Ирыстон йæхи сæрибар кæны, уымæн æмæ у ахсджиаг формат.
Джиоты Мурат æрдзырдта гуманитарон фарстатыл, 1989 азæй фæстæмæ Гуырдзыстон æмæ Хуссар Ирыстонæй лигъдæтты фарсты тыххæй. Банысан кодта ацы проблемæты ахсджиагдзинад, зæгъгæ, фæстаг азты дзырд нæ цæуы лигъдæтты проблемæйыл, кæд æмæ хъусын кæнæм Хуссар Ирыстон цæттæ кæй у кæцыфæнды фæзуатыл дæр ацы фарстыл уынаффæ кæнынмæ, уæддæр.
Фæстаг раундæй фæстæмæ уавæрæн аргъгæнгæйæ, Джиоты Мурат куыд банысан кодта, уымæ гæсгæ хъахъхъæд цæуы сабырдзинад.
Дискусситы радон раундмæ цæттæгæнæн куысты ма сæ фæндæттæ дзырдтой Евроцæдисæй æмсæрдар Тойво Клаар, ИНО-йæ æмсæрдар Джихан Султаноглу. Банысан кодтой механизмты фæлгæтты куысты ахсджиагдзинад æмæ дарддæр женевæйаг процесс фæхуыздæр кæныны фæндæттæ.
ЕÆÆО-йæ ног æмсæрдар Рудольф Михалкайы ныхæстæм гæсгæ, Гуырдзыстон æмæ Хуссар Ирыстоны позицитæ кæд хатт кæрæдзимæ дард фæлæууынц, уæд цыдæр фарстыты вæййынц æмхуызон. Ома дыууæ фарс дæр тох кæнынц регионты сабырдзинадыл.
«Мæ дипломатон фæлтæрддзинадæй мæ бон у зæгъын уый, æмæ æнæ баныхæстæй ницахæм æмгуыстадæн ис уæвæн. Ацы зæхх уын лæвар у Хуыцауæй, æмæ уæм ахæм сыхæгтимæ цæрын æрхауд»,- загъта минæвар.
Уый равдыста йе ‘ууæнк, фæрстæ иу хъуыдымæ кæй æрцæудзысты, уый тыххæй.
ФЕМБÆЛДÆН ХАТДЗÆГТÆ АРАЗГÆЙÆ
Фембæлдæн хатдзæгтæ аразгæйæ, хуссар-ирыстойнаг делегацийы сæргълæууæг Джиоты Мурат информацион фæрæзтæн радзырдта, зæгъгæ, Гуырдзыстон Хуссар Ирыстоны ныхмæ тыхæй кæй нал спайда кæндзæн, уыцы дыууæфарсон до-кументыл куыст уæззаугай цæуы. Уымæ нæ кæсгæйæ, Хуссар Ирыстоны делегаци дарддæр дæр хайад исдзæн Женевæйы дискусситы.
«Процесс кæд уæззаугай цæуы, уæддæр жене-вæйаг дискусситæ сты ахсджиаг дунеон формат, цыран Хуссар Ирыстонæн фадат ис йæ позици равдисынæн. Уымæ гæсгæ мах дарддæр дæр нæ позици рæгъмæ хæсдзыстæм æмæ архайдзыстæм, цæмæй, тыхæй пайда кæй нал æрцæудзæн, уыцы документыл куыст æрцæуа æмæ Хуссар Ирыстоны адæм сæхи банкъарой Гуырдзыстонæй æдасæй»,- дзырдта Мурат.
Женевæйаг дискусситы боны фæткы ахсджиаг фарстатæй иу у Хуссар Ирыстонæй æбæрæг сæфт æмбæстæгты хъысмæт рабæрæг кæнын. Уый фæдыл бирæ хæттыты фехъусынчындæуыд дунеон организациты минæвæрттæн дæр. Джиоты Мураты ныхæстæм гæсгæ, æмсæрдæрттæ ацы фарстыл уынаффæ кодтой Гуырдзыстоны премьер-министримæ. Уый равдыста йе’ууæнк, ацы здæхты куыст кæй адарддæр уыдзæн.
Джиоты Мурат куыд загъта, уымæ гæсгæ махмæ ис дунеон эксперты цалдæр доклады, цыран бæл-вырдæй æвдыст ис, не ‘мбæстæгтæй æбæрæгæй сæфт чи сты, уыдон кæм агурæм, уый.
ИНО æмæ ЕÆÆО йæ фембæлды цы ног минæвæрттæ райстой хайад Джихан Султаноглу æмæ Рудольф Михалка, уыдон ныхæстæм гæсгæ, сæ сæйраг хæс у, женевæйаг процесмæ ног идейæтæ бахæссын. Æрсидтысты фæрстæм, цæмæй максималонæй компромиссмæ æрцæуой æмæ райсгæ уынаффæтæ ахъазгæнæг уой дыууæ фарсæн дæр.
Рудольф Михалка Механизмты фæлгæтты фæстаг фембæлды фæдыл загъта, зæгъгæ, хаст æрцыд фæстæдæр æмгъуыдмæ, фæлæ уый хуыздæр уынаффæйыл нæ банымадта.
Джихан Султаноглу банысан кодта, сæйраг кæй у фæрстæм байхъусын æмæ фæндæттæ сбæлвырд кæнын, кæцытæн уыдзæн конструктивон æмæ кæронбæттæн уаг æмæ бадзырдтыты руаджы Женевæйы дискусситы эффективондзинад фæтыхджындæр уыдзæн. Стыр ныфс бавæрдта, зæгъгæ, йе ‘ппæт тыхтæ æмæ хъарутæ аздахдзæн, цæмæй нæ разы цы хæстæ ис, уыдон скъуыддзаг æрцæуой.
Женевæйаг форматы кæд хуссарирыстойнаг лигъдæтты фарстыл уынаффæ нал цæуы, уæддæр Евроцæдисæй æмсæрдар Тойво Клаар афтæ нæ нымайы, зæгъгæ, дискусситы иттæг хорз фадæттæ ис лигъдæтты фарстыл уынаффæ кæнынæн. Уымæй дарддæр ма йæ банымадта ахсджиаг фарстыл куыд Гуырдзыстонæн, афтæ Хуссар Ирыстонæн дæр. Хуссар Ирыстоны минæвæрттæ ацы фарсты фæдыл сæ позици хъуамæ зæгъой æргомæй.
Уыцы бон ма Женевæйы дискусситы æмсæрдæрттæ бабæрæг кодтой Ленингоры район, азылдысты социалон нысаниуæджы объекттыл.
Къæбулты Маринæ
Comments are closed, but trackbacks and pingbacks are open.