Республикæ Хуссар Ирыстоныл 28 азы сæххæсты цытæн бæрæгбонон мадзæлттæ райдайдзысты 19 сентябры паддзахаддзинады сæйраг символ  паддзахадон тырысайы бонæй. Бæрæг куыд у, афтæмæй нæ Паддзахадон тырысайы бон фыццаг хатт нысан æрцыд 2013 азы, фæлæ нæ националон символ та ссис 1989 азы. Ацы бон ма нæ республикæйы Дзауы районы баконд æрцæудзæнис Хетæгкаты Къостайы бюст æмæ бындур æрæвæрдæуыдзæн националон кады аллеяйæн. Уымæй дарддæр ма  нæ бæстæйы æппæт скъолаты дæр уагъд цæудзысты паддзахадон символты тыххæй сæрмагонд иумиаг сахаттæ. Культурæйы министрад нын куыд фехъусын кодта, афтæмæй 20-æм сентябры бæрæгбоны сæйраг хай  Республикæйы боны цытæн Цхин-валы æфсæддон гарнизоны парад, уагъд æрцæудзæнис Театралон фæзуаты райсомы 11 сахатыл. Йæ хæдфæстæ та 12 сахатыл адæмæн уыдзæнис Сывæллæтты сфæл-дыстадон галуаны хъомылгæнинæгты арæхстдзинадмæ бакæсыны фадат.

20-æм сентябры бæрæгбонон программæмæ ма хаст æрцыдис ирон бæгæныйы æппæтадæмон 5-æм фестиваль-конкурс, кæцы уагъд цæудзæнис Театралон фæзуаты. Афтæ ма мадзæлттæ: «Спортивон æнтыстытæ хæлар кæнæм райгуырæн зæххæн» æмæ «Нæртон къуым». Ацы бон ма цытджын æгъдауæй баконд æрцæудзæн æрмæхиу аивады равдыст-армукъа «Æндидзынад», зæгъгæ, ахæм номимæ. Мадзалы программæйы сты адæмон кæфтытæ æмæ хъæзтытæ, стæй ансамбль «Хурзæрин»-ы концерт. 20-æм сентябры изæры нæ горæты централон фæзуаты организацигонд æцæудзæн бæрæгбонон концерт «Æгас цу,  æрыгон  фæлтæр»  æмæ  кæронбæттæны та  уыдзæн фейрверк.

21-æм сентябры нæ республикæйы нысан цæудзæнис Мады Майрæмы стыр бæрæгбон æмæ уый цытæн дæр нæ бæстæйы аргъуанты уагъд цæудзысты бæрæгбонон службæтæ.

25-æм сентябры Анахарсисы номыл республикон библиотекæйы байгом уыдзæн авторон къамты равдыст, РХИ æмæ æфсымæрон республикæты цытæн, афтæ ма уагъд æрцæудзæн фембæлд поэттимæ «Литературон уазæгдоны».

20-21 сентябры нæ республикæйы нымад цæуынц улæфт бонтыл .

Паддзахадон нысаниуæгджын мадзæлттæ ауадзын æмæ сæ цæттæ кæныны фæдыл республикон къамис сиды цæрджытæм, цæмæй бæрæгбонон мадзæлтты хайад райсой.

Comments are closed, but trackbacks and pingbacks are open.