15-æм октябры ирон литературон æвзаджы бындурæвæрæг Хетæгкаты Къостайы райгуырды боны сæраппонд Анахарсисы номыл республикон национ библиотекæйы бацæттæ кодтой сфæлдыстадон мадзал. Мадзалмæ фæуазæг сты РХИ-йы Культурæйы министрады библиотекæты куысты фæдыл сæйраг специалист Дриаты Нателæ, скъолаты ахуыргæнджытæ, интеллигенцийы минæвæрттæ æмæ скъола-интернаты ахуыргæнинæгтæ.
Мадзал бацæуæн ныхасæй байгом кодта библиотекæйы сæргълæууæг Кокойты Валерия. Уый фæстæ доклад бакастис библиотекæйы амонæн-бæстæзонæн хайады сæргълæууæг Тъехты Ингæ. Уый йæ раныхасы лæмбынæг æрдзырдта Къостайы уæззау царды уавæртыл, йæ зæрдæ куыд рыстис йæ адæмыл æмæ йæ бæстæйыл.
Скъола-интернаты ахургæнинæгтæ бакастысты Къостайы фыст æмдзæвгæтæ. Равдыстой ма чысыл инсценировкæ Къостайы «Цъиу æмæ сывæллæттæ»-йæ.
Æмдзæвгæтæ ма бакастысты библиотекæйы сæргълæууæг Кокойты Валерия, библиотекæйы ирон абонементы сæргълæууæг Сланты Заирæ æмæ æндæртæ.
Къостайы сфæлдыстады цытæн мадзалы тыххæй ныхас кодта Дриаты Нателæ. «Анахарсисы номыл республикон национ библиотекæ у нæ сæйраг библиотекæ æмæ сымах æрвылаздæр æнæзивæгæй тынг активон хайад райсут æрмæст Къостайы цытæн мадзæлтты нæ, фæлæ ма ирон æвзаг æмæ литературæйы мадзæлттæ уадзыны дæр.
Абоны мадзал вазыгджын у махæй алкæмæн дæр, уымæн æмæ Къоста у иунæг ахæм поэт, кæцы ссардта фæндаг адæмы зæрдæтæм» – банысан кодта уый.
Джиоты Александр
Comments are closed, but trackbacks and pingbacks are open.