Инциденттæ ма æруадзын æмæ сæм хъусдард здахыны фæдыл механизмты фæлгæтты ныр цыппæрæм хатт йæ хайадисджытæ уынаффæ кæнынц Хуссар Ирыстон æмæ Гуырдзыстоны ‘хсæн арæнтыл сæвзæргæ уавæрыл. Хуссарирыстойнаг фарс дипломатон æгъдауæй архайы йæ æрбæстон кæныныл.
Фæсконфликтон фарстатæ æрбæстон кæныны фæдыл Президенты æххæстбарджын минæвар Джиоты Мураты ныхæстæм гæсгæ, фембæлды дзырд цыд иу фарстыл – Уистæйы хъæуы цур сæвзæргæ уавæрыл, цыран гуырдзиаг тыхон структурæтæ сæвæрдтой полициæгты пост. Уый ноджыдæр зæрдыл æрлæууын кодта, фæстаг фембæлды рæстæджы дæр кæй бадзырдтой сæвзæргæ уавæрыл уынаффæ кæнын æмæ консультацитæ уадзын уавæрæй рахизыны мадзæлтты фæдыл.
Йæ ныхæстæм гæсгæ, ацы фарстыл механизмты фæлгæтты дзырд цыд цалдæр сахаты дæргъы, фæлæ, хъыгагæн, гуырдзиаг фарс йæ позици нæ ивы æмæ Хуссар Ирыстоны территорийыл цы æнæзакъонон пост сæвæрдта, уый сисынвæнд нæ кæны. Хуссар Ирыстоны позици у æнæивгæ – æрдæгæхсæв цы æнæзакъонон пост æрæвæрдтой гуырдзиаг полициæгтæ, уый у регионы уавæр дестабилизаци кæнынмæ здæхт, æмæ æнæмæнгæй иуварс хъуамæ æрцæуа, уымæн æмæ æвæрд æрцыд Хуссар Ирыстоны территорийыл. Кæд гуырдзиаг фарс бирæ хæттыты хъусын кæны, ома, уыцы пост цæрджытæн ницы тæссагдзинад æвзæрын кæны, уæддæр.
Фæлæ Хуссар Ирыстоны позици ноджыдæр у ахæм – уыцы пост аразын у уавæр æндыгъд кæнынмæ здæхт æмæ Хуссар Ирыстоны территорийыл уымæн бынат нæй æмæ иуварс хъуамæ æрцæуа.
«Хуссар Ирыстоны арæнхъахъхъæнæг службæтæ цы пост сæвæрдтой, уыцы бынаты, уый у закъонмæ гæсгæ, сабырадон нысанæн æмæ ацы районы æдасдзинад æмæ стабилондзинад ифтонг кæнынмæ здæхт», – банысан кодта ныхасгæнæг.
Уый ноджыдæр банысан кодта, механизмты фæлгæтты радон техникон фембæлды руаджы кæй хъæуы баныхæстæ уадзын, кæцы уагъд цæудзæн къуырийы фæстæ. Уымæй дарддæр ма хайадисджытæ бадзырдтой, кæй нæ карз кæндзысты уавæр, фæлæ дæтдзысты æрмæст объективон информаци. Æмæ æрмæст Гуырдзыстоны территорийыл кусыны мандат цы Евроцæдисы миссийы хъусдарджытæн ис, уыдон нæ халдзысты арæнты фæтк æмæ нæ хиздзысты Хуссар Ирыстоны территоримæ.
Джиоты Мураты ныхæстæм гæсгæ, фæрстæ ма аскъуыддзаг кодтой, «тæвд хахх» кæй кусдзæн активонæйдæр. Уый ма банысан кодта, зæгъгæ, ис ирд æмæ бæстон позици – уый у Хуссар Ирыстоны территори æмæ мах цæттæ стæм, паддзахадон арæнтæ кæуылты хъуамæ цæуой, уый фæдыл бадзырдтытæм. 2009 азæй фæстæмæ хуссарирыстойнаг фарс къорд хæттыты бахатыд бадзырдтыты руаджы Цънелис æмæ Чорчанайы ‘хсæн паддзахадон арæнтæ кæуылты хъуамæ цæуой, уый банысан кæнын. Кæд гуырдзиаг фарс нымайы, зæгъгæ, уыцы пост æвæрд æрцыд гуырдзиаг хъæуты цæрджыты æдасдзинады нысанæн, уæд уый æвæрд хъуамæ уа гуырдзиаг хъæуты цур æмæ Гуырдзыстоны территорийыл.
Джиоты Мурат ацы фембæлды сæйраг фæстиуæгыл банымадта, дарддæр баны-хæстæ уагъд кæй цæудзысты, уый.
Ивгъуыд къуыри ацы районы цæрджыты æдасдзинад ифтонг кæныны нысанæн Хуссар Ирыстоны арæнхъахъхъæнджытæ социалон гуманитарон операци реализаци кæныны фæлгæтты бацахстой бæрзæнд æмæ хæрзарæзт кæнынц пост.
Нæ уацх.
Comments are closed, but trackbacks and pingbacks are open.