Фæззæджы æрлæудимæ адæм æфснайын райдайынц сæ фæллой æмæ ацы афонимæ баст сты бирæ мадзæлттæ. Фæстаг цалдæр азы нæ республикæйы нысан кæнын райдыдтой тыллæг æфснайыны бæрæгбон, кæцыйы сорганизаци кæнынц ООО «Иронсæн» æмæ сæнаразджыты ассоциаци, кæцытæн стыр æххуыс бакæны РХИ-йы Экономикон рæзты министрад. Мадзал арæзт æрцыд кафе «Vincenzo»-йы кæрты æмæ ардæм æрæмбырд ис бирæ адæм. Мадзалмæ фæуазæг сты бæстæйы президент Бибылты Анатоли, РХИ-йы Хицауады сæрдар Бекъойты Геннади, РХИ-йы Экономикон райрæзты министр Тадтаты Дзамболат æмæ æндæр бæрнон кусджытæ.
Кафейы кæртмæ æрбаластой сæндуцæн ифтонггæрзтæ æмæ сæнæфсиртæ, цæмæй бынаты равдисой сæндуцыны процесс. Сæ арæзт сæнтæ æрбахастой фондз бынæттон сæнаразæджы, цæмæй дзы æрæмбырдуæвджытæ аназой æмæ сын саргъ кæной. Сæнтæн лæвæрд æрцыд ахæм рæсугъд нæмттæ, куыд «Цхинвальская долина», «Цард», «Мæсыг», «Сæнæфсир», «Барджнис» æмæ æндæртæ. Ацы аз ма йæ продукци равдыста бынæттон сæнуадзæг Лохты Дауыт дæр, кæцы фестивалмæ æрбахаста фæткъуыйæ арæзт сæн. Лохты Дауыты нырмæ дæр зыдтой, ирон хæдзарон арахъ «Старый Цхинвал» кæй уадзы, уымæй.
Бæстæйы Президент Бибылты Анатоли дæр та радон хатт хайад райста сæндуцыны процессы. Йемæ ма сæнæфсир цъæл кæнынмæ арынгмæ ныххызт æрыгон лæппу, кæцы тынг ныббуц йæ бакæнгæ куыстæй. Бибылты Анатоли куыд банысан кодта, афтæмæй ацы бæрæгбон азæй-азмæ кæны популярондæр æмæ адæмы зæрдæмæ цæуы ахæм бæрæгбонон мадзал.
«Фидæны ацы фæзуат нал фаг кæндзæнис адæмæн, уымæн æмæ фылдæрæй-фылдæр кæнынц ацы бæрæгбонмæ цæуджытæ. Уымæй уæлдай ма фæфылдæр уыдзысты сæнуадзджытæ дæр æмæ фылдæр бынат бахъæудзæн продукци равæрынæн. Хорз уаид, æмæ дарддæр дæр ацы бæрæгбонон мадзал куы нысан кæниккам ноджы масштабондæрæй, æмæ ма дзы æрмæст сæны уæлдай куы уаид æндæр проукцитæ дæр, кæцыты аразынц Хуссар Ирыстоны территорийыл. Ныридæгæн цæуы куыст, цæмæй нæ продукци реализаци кæнæм æндæр бæстæты дæр, зæгъæм Беларусийы æмæ Астæуккаг Азийы республикæты. Ӕппæтдæр арæзт цæуы, цæмæй нæ республикæйæн уа æнгом экономикон бастдзинæдтæ нæ сыхаг бæстæтимæ», – загъта Бибылты Анатоли.
Бæстæйы сæргълæууæг ма стыр бузныг загъта Базарадон-промышленнон палатæйæн, кæ-цы стыр æххуыс кæны нæ амалиуæггæнджытæн, нæ продукци нын кæй размæ кæнынц æмæ йæ Уæрæсемæ аласыны хъуыддаджы кæй æххуыс кæнынц.
«Иронсæн»-ы хицау Гогинов Таймураз йæ раныхасы банысан кодта, зæгъгæ, хуссарирыстойнаг сæн ис иууыл хуыздæр сæнты номхыгъды æмæ æппæтадæмон равдыстыты райсы майдантæ йæ хæрзгъæды тыххæй.
Мадзал чи сорганизаци кодта, уыдон иууылдæр зæгъынц, зæгъгæ ахæм фестивалы хайад исынц уый тыххæй, цæмæй фылдæр адæм базонгæ уой ног рауадзгæ продукциимæ æмæ ноджы æндæрты дæр сразæнгард кæной гъæдджын сæн аразынмæ.
Фестиваль, иумиагæй сисгæйæ, рауад цымыдисон, райгондæй баззадысты мадзалмæ æрбацæуджытæ дæр æмæ йæ организатортæ дæр. Ӕрæмбырдуæвджыты æрмæст сæн нæ бахъæлдзæг кодта, фæлæ ма дзы уагъд æрцыд концертон программæ дæр.
ДЖИОТЫ Алыксандр
Comments are closed, but trackbacks and pingbacks are open.