4-æм марты Бекъойты Эдуарды номыл Цхинвалы 6-æм астæуккаг скъолайы банысан кодтой Урсы къуырийы бæрæгбон. Скъолайы актон залы уыд бирæ адæм. Уырдæм æрбацыдысты ахуыргæнинæгтæ, сæ ныййарджытæ, скъолайы коллектив ахуырадон уагдоны директоры хæстæ æх-хæстгæнæг Дыгъуызты Лианæйы сæргълæудæй æмæ æндæр уазджытæ.
Скъолайы актон залæй цасдæр рæстæджы дæргъы хъуыст сывæллæтты хъæлдзæг хъæлæба, кæцы адæймаджы зæрдæйæн хаста æнахуыр цины æнкъарæнтæ ацы æндыгъд рæстæджы. Ахуыргæнинæгтæ цыма ерыс кодтой чи куыд хуыздæр æмæ рæсугъддæр фынг æрæвæра, уыйау алкæцы къласæн дæр сæ фынгтæ уæз кодтой алыгъуызон адджинæгтæй, уæливыхтæй, адджын дæттæй æмæ афтæ дарддæр. Бæрæгбон сорганизаци кодта уагдоны хъомыладон куысты фæдыл скъолайы директоры хæдивæг Рассохина Надежда.
Урсы къуыри у хъæлдзæг æмæ уарзон адæмон бæрæгбон. Урсы къуырийы адæм фæндараст кæнын райдайынц зымæджы æмæ æмбæлынц уалдзæджы æрбалæудыл. Ацы бæрæгбоны символ сты хур, лауызтæ æмæ быдыргъ. Бæрæгбонмæ сывæллæттæ сæхи цæттæ кодтой æнæхъæн къуырийы дæргъы æмæ йæм æнæрхъæцæй æнхъæлмæ кастысты.
Урсы къуыри нысан фæцæуы авд боны дæргъы къуырисæрæй хуыцаубонмæ. Уый фæстæ та æрбалæууынц Стыр мархойы къуыритæ.
Надежда Рассохина раарфæ кодта æрæмбырдуæвджытæн. Бафæндыд æй уыдонæн сабырдзинад æмæ ирд арвы бын цæрыны фæндиæгтæ ацы вазыгджын рæстæджы. Радзырдта сын Уæрæсейы ацы адæмон бæрæгбон (Масленица) куыд фæнысан кæнынц, уый тыххæй. Ацы бæрæгбон уæвынад кæны бирæ æнусты дæргъы æмæ йæ истори райдыдта муртаттаг рæстæджытæй. Сывæллæттæ æххæст кодтой зарджытæ.
Дыккаг бон, 5-æм марты та Урсы къуырийы бæрæгбон банысан кодтой ацы ахуырадон уагдоны 10-æм «б» къласы ахуырдзаутæ, скъолайы ирон æвзаг æмæ литературæйы ахуыргæнæг Чилæхсаты Залинæйы сæргълæудæй. Ныр та фынгтыл уыдысты куыд адджинæгтæ, афтæ ирон национ хæринæгтæ – уæливыхтæ, дзыкка, цыхт, æхсырысæртæ æмæ а.д.
Ахуыргæнинæгтæ арвыстой хъæлдзæг рæстæг.
ДЖИОТЫ Е.
Comments are closed, but trackbacks and pingbacks are open.