Уæрæсейы зынгæ патриот, уырыссаг адæмон инструментты фæхуыздæргæнæг, уырыссаг адæмон инструментты фыццаг бындурæвæрæг æмæ къухдариуæггæнæг, æхсæнадон архайæг, педагог, композитор, дирижер, балалайкæ æмæ фæндырыл диссаджы æххæстгæнæг уыд В. В. Андреев. Уый райгуырд 1861 азы январы мæйы Тверскы губернийы горæт Бежецкы. Бынтон хæрзæвзонгæй В. Андреев æм-хиц уыд фольклормæ, уыд хæдахуыр цæгъдæг бирæ музыкалон инструменттыл. Гимназы хистæр кълæсты уый ахуыр кодта скрипкæйыл цæгъдын профессор Санкт-Петербурджы консерваторийы Н. В. Глинкæмæ. 1883 азы сæрды фехъуыста балалайкæйыл хæдахуыр цæгъдæг Антипамæ æмæ уæд Андреев бахауд дисы, балалайкæйы авналæнтæ фехъусгæйæ. Уæд йæ хъуыдыйы сæвзæрд уымæ лæмбынæг хъусдард аздахын æмæ йæ фæхуыздæр кæнын. Дыккаг аз уый йæ ныфс бахаста Самарæйы хæрзаудæн концерты балалайкæйыл ацæгъдын. 1886 азы, инструмент фæхуыздæр кæнгæйæ, балалайкæимæ йæ дебют уыд Петербурджы хæрзаудæн æмбырды залы. 1887 азы, развæлгъау хахнывтыл бакусгæйæ, арæзт æрцыд хроматикон балалайкæ, уыимæ иумæ йæ алыгъуызондзинæдтимæ: пикколо, прима,альт æмæ бас. Мыхуыры рацыд йæ фыццаг чиныг дæр «Школа для балалайки», байгом кодтой балалайкæйыл цæгъдыны къордтæ. Йæ æвæллайгæ æмæ педагогон архайды фæрцы æфсад, æфсæнвæндагон ахуыргæнæндæтты, хъæууон ахуыргæнджыты курсыты балалайкæ æмæ домрæ апарахат сты Уæрæсейы æппæт рæтты æмæ уыимæ иумæ инструменттимæ ногæй сæндидзыдтой уырыссаг адæмон зарджытæ дæр. В. Анд-реев уырыссаг адæмон оркестрæн ныффыста 40 уацмысы бæрц.
Хуыбиаты Никъала
Comments are closed, but trackbacks and pingbacks are open.