Цхинвалы районы культурæйы хайады адæмон кафты ансамбль «Амонд» зындгонд у канд Хуссар Ирыстоны сценæмæкæсджытæн нæ, фæлæ ма уымæн æддейæ дæр. Ацы курдиатджын ансамбль æрæджы хайад райста горæт Сочийы уагъдцæуæг «Аивад æмæ сфæлдыстады 2-æм æхсæнадæмон конкурс-фестиваль Гранд-Сочи»-йы æмæ дзы ссис уæлахиздзау. Ацы фестиваль-конкурсы хайад райстой Уæрæсе æмæ Кавказы бирæ регионты 80 хореографион коллективтæ.
Конкурс-фестивальмæ ансамбль цы æгъдауæй ацыдысты æмæ сын сæ балцы хъуыддагæн чи баххуыс кодта, уый тыххæй нын радзырдта Цхинвалы районы культурæйы хайады сæргълæууæг Гаглойты Ростислав. Уый куыд банысан кодта, афтæмæй фæсивæд стыр цины æнкъарæнтимæ æрыздæхтысты ацы конкурс-фестивалæй, уымæн æмæ уыдон, иуæй, хайад райстой ахæм стыр æмæ ахсджиаг мадзалы, аннæмæй та дзы æрхастой сæ райгуырæн Ирыстонмæ уæлахиздзауты кадджын хорзæхтæ. «Мах æмбæрстам, ацы бирæнацион бæрæгбоны нæ разы стыр бæрнон хæс кæй лæууыд, уый: хъуамæ фенын кодтаиккам, уыцы ахсджиаг мадзалмæ бакæсынмæ чи æрæмбырд ис, уыдонæн Хуссар Ирыстоны курдиатджын адæмы хореографион арæхстдзинад. Ансамблы артисттæ бацархайдтой, цæмæй сценæмæкæсджытæн дæр æмæ жюрийы уæнгтæн дæр нæ кæфтыты оригиналондзинад æнцон рахатæн уа. Кæд тынг хорз бацæттæ кодтам нæхи æмæ нæ хорз æнтыстытæй ныфс уыдис, уæддæр тыхстыстæм, уымæн æмæ нæ уырыссаг бирæдомæг сценæмæкæсæджы раз равдисын хъуыдис ирон национ аивады рæсугъддзинад. Нæ тас дзæгъæлы уыдис, нæ ансамбль ахæм арæхстдзинад равдыста æмæ Цхинвалмæ æрæздæхтысты фыццаг бынат æмæ Гран-приимæ. Ацы конкурс-фестиваль уагъд цыдис Сочийы æртæ боны бæрц – 10-æм октябрæй 13-æм октябрмæ. Ардæм нæ фæхуыдтой официалон æгъдауæй ивгъуыд аз. Уæд Ессентукы дæр уагъд цыдис ахæм конкурс-фестиваль æмæ дзы бацахстам фыццаг бынат. Тынг сæ зæрдæмæ фæцыдис нæ ансамблы архайд, цы кæфтытæ дзы сæххæст кодтам, уыдонæн жюрийы уæнгтæ скодтой стыр аргъ æмæ нын радтой сертификаттæ, фæхуыдтой нæ Сочимæ. Кæй зæгъын æй хъæуы, мах стыр æхсыз-гонæй сæмбæлдыстæм ацы хъуыддагыл. Сочийы уагъдцæуæг конкурс-фестивальмæ ансамбль «Амонд» ацыд 30 адæймаджы скондæй. Семæ ма уыдысты къухдариуæггæнджытæ цал-дæрæй. Ацы ран мах сæххæст кодтам, дунейы кафты аивадæн хуыздæр аргъгæнджытæ зæдты кафт кæй хо-нынц, уыцы адæмон кафт «Симд» æмæ «Хæххон кафт». Фестивалы алкæцы кафтæн дæр аргъ кодтой хицæнæй. Ахæм ахсджиаг мадзалы хайад райсыны фадат нын кæй фæцис, уымæй стыр бузныг стæм нæ республикæйы Культурæйы министр Зассеты Жаннæйæ. Уый лæмбынæгæй йæ хъус дары ирон национ аивад æмæ культурæ бæрзонд æм-вæзадмæ сисынмæ æмæ кæддæрид-дæр æрбалæууы нæ фарсмæ. Уый тыххæй мæ сæрмагондæй бузныджы ныхæстæ зæгъын фæнды Зассеты Жан-нæйæн. Махæн нæхимæ ахæм фестивальтæм ацæуын æмæ дзы хайад райсынæн фаг æхцайы фæрæзтæ кæй нæ вæййы, уый тыххæй нæм æххуысы къух фæдаргъ кодтой Гуыззыттаты Эдуард, Джиоты Роберт æмæ Бежанты Зæринæ. Бузныджы ныхæстæ ма зæгъын, нæ фæндæгты æдасдзинадыл нын чи батыхст æмæ нæ чи хизын кодта, автоинспекцийы уыцы кусджытæ Кокойты Марик æмæ Хацырты Георгийæн. Бузныг Мидхъуыддæгты министрадæн, кæддæриддæр нæ фарсмæ кæй æрбалæууынц, уый тыххæй», – загъта Гаглойты Ростислав
Уый ма банысан кодта, зæгъгæ, ахæм фестивальты хайад райсыны хъуыддаг, фыццаджыдæр, ахъаз кæны, цæмæй популяризацигонд цæуа ирон культурæ, ирон аивад. Ирон кафтыл æндæр адæмтæ сæ цæст кæй æрæвæрынц æмæ йын стыр аргъ кæй кæнынц, уымæн мах арæх вæййæм æвдисæнтæ. Æмæ, æцæгæйдæр, Цхинвалы районы администрацийы культурæйы хайады къултыл конд сты, ансамбль «Амонд» цы бирæ хорзæхтæ æрхастой, уыдон. Уыцы хорзæхты ма фæфылдæр кодтой ноджы дыууæ хорзæхы æмæ нын сæ Гаглойты Ростислав сæрыстырæй æвдыста.
ЦХУЫРБАТЫ Ларисæ
Comments are closed, but trackbacks and pingbacks are open.