22 октябры Информаци æмæ мыхуыры паддзахадон комитеты пресс-центры Президенты Æхсæнадон химæисæны къухдариуæггæнæг Гæджиты Радионæн уыд брифинг, цыран уый журналисттæн радзырдта æхсæнадон химæисæны куысты тыххæй, афтæ ма – Президент куыд аскъуыддзаг кæны, æхсæнады минæвæртты цы проблемæтæ тыхсын кæнынц, уыдон.
Уый куыд банысан кодта, афтæмæй сæ проблемæтæ аскъуыддзаг кæнынæн æххуысагур æрвылбон дæр Президенты æхсæнадон химæисæнмæ æрбацæуы 20 адæймаджы бæрц. Уыдонæн сæ фылдæр фæдомынц сæ хæдзæртты агъуыстытæ раивын, сæ цæрæнуат сын сæндидзын кæнын, куыстæй сæ сифтонг кæнын, цæрæнуатæй сæ сифтонг кæнын, се ‘нæниздзинад фæхуыздæр кæныны тыххæй финансон æххуыс æмæ а.д.
«Алы адæймаджы дæр фæфæнды куыдфæндыйæ дæр Президентимæ æвæстиатæй фембæлын æмæ йæ проблемæты тыххæй йемæ иунæгæй аныхас кæнын. Бирæты нæ фæфæнды сæ домæнтæ гæххæттыл фыстæй æрбахæссын. Вæййы ахæмтæ дæр, кæцытæ нæ фæзонынц, сæ проблемæ куыд бамбарын кæной, уый. Уыдонæн мах баххуыс кæнæм сæ проблемæ раст ныффыссынæн. Цæрæнуат райсыны тыххæй куырдиат чи æрбахæссы, уымæн йæ куырдиат лæмбынæг сахуыр кæнæм, не ‘мкусджытæ йæ бынаты бабæрæг кæнынц, фенынц ын йæ царды уавæртæ, æмæ йæм кæд æцæгæйдæр æмбæлы, уæд ын йæ куырдиат бадæттæм Президентмæ. Афтæмæй, проблемæ лæмбынæг сахуыр кæныны фæстæ уыцы адæймаг райсы æххуыс», – бамбарын кодта Гæджиты Радион.
Уый куыд радзырдта, афтæмæй æхсæнадон исæнмæ чи æрбацæуы, уыдонæй бирæтæ сæхи равдисынц æдзæсгомæй. Æрхаста ахæм цæвиттон: «Зæгъæм, чидæр Президентмæ куырдиат æрбалæвæрдта, цæмæй йын паддзахады хыгъдæй сцалцæг кæной, цы цыппар хæдзары йын ис, уыдон. Кæй зæгъын æй хъæуы, сæдæгай æххуысхъуаг адæймæгтæ рады куы лæууой, уæд цыппар хæдзарджын адæймаджы хæдзæртты ничи сцалцæг кæндзæн. Уыцы адæймаг фæхъыг вæййы Президентмæ æмæ афтæмæй ацæуы. Ахæм адæймæгтæ цъус не сты», – банысан кодта Президенты Æхсæнадон химæисæны къухдариуæггæнæг.
«Президентмæ адæм цы проблемæты тыххæй цæуынц, уы-цы проблемæтæ скъуыддзаг хъуамæ цæуиккой бынаты, районты æмæ хъæуты администрациты сæргълæуджытæ æмбæлон куыст куы кæниккой, сæ хæслæвæрдтæм бæрнон ахаст куы дариккой, уæд. Иуæй-иу чиновникты æбæрндзинады аххосæй адæмы бахъæуы бар-æнæбарæй Президентмæ бацæуын. Элементарон фарстатæ паддзахады масштабы проблемæтæ ма хъуамæ уой».
Уый куыд радзырдта, афтæ-мæй зæронд хæдзæрттæ кæмæн ис, уыдонæн Президенты фонды хыгъдæй арæзт æрцыд ногтæ.
«Æхсæнадон химæисæн куырдиат æрбадæттæгæн хъуамæ дзуапп радта дæс боны æмгъуыдмæ. Иуæй-иу хатт æмгъуыдтæ хæлд æрцæуынц, Президент республикæйæн æддейæ куы вæййы æмæ сæ паддзахады сæргълæууæгмæ радтынæн фадат куынæ вæййы, уæд», – бамбарын кодта Гæджиты Радион.
Уый куыд банысан кодта, афтæмæй æнæвдæлондзинад æмæ æнгом графикмæ нæ кæсгæйæ, Президентмæ цы фыстæджытæ æрбацæуы, уыдон паддзахады сæргълæууæг иууылдæр бакæсы. Радты хæслæвæрдтæ, йæ хъус дары, куыд æххæст æрцæуынц, уымæ æмæ куырдиат æрбадæттæджы дарддæры хъысмæтмæ. Бирæ хатт иу адæймагæн лæвæрд æрцæуы дыккаг æххуыс дæр. Фарон Президенты номыл æрбацыд 1656 куырдиаты, 2017 азы та куырдиæттæ æрбалæвæрдтой æрмæстдæр 212 адæймаджы. Алы адæймаджы куырдиатмæ дæр ын ис бæрнон ахаст. Уымæн æвдисæн у, куырдиæттæн æмгъуыд кæй нæй, уый дæр. Ныртæккæ дæр скъуыддзаг цæуынц, дыууæ азы размæ цы куырдиæттæ æрбалæвæрдæуыд, уыдон. Фæлæ уый нæ нысан кæны, æмæ абон цы куырдиæттæ æрбалæвæрдæуыд, уыдон цалдæр азы фæстæ скъуыддзаг цæудзысты.
Гæджиты Радион дарддæр куыд банысан кодта, афтæмæй «дыууæ аз æмæ æрдæджы æмгъуыдмæ Президент Бибылты Анатоли финанстæй баххуыс кодта 400 рынчын адæймагæн. Æрвылмæй дæр æххуыс кæны, æххуырсты чи цæры, ахæм бинонтæй 60-æн. Уыцы нымæцы сын бафиды сæ коммуналон фиддонтæ дæр. 300 бинонтæ та æххуыс райстой сæ цардуагон уавæртæ фæхуыздæр кæныны тыххæй, дæрддаг хъæуты цæрæг 950 бинонтæн та арвиты хæлцадон продукттæ, æдзух æххуыс кæны спортивон федерацитæн, бæрæгбонон мадзæлттæ чи аразы, уыдонæн, культурæйы архайджытæн. Иуæй-иу хатт куырдиæттæ фæфылдæр вæййынц фонды лимитæй. Ацы аз Президенты номыл æрбацыд 1820 куырдиаты».
Йæ ныхасы кæрон Гæджиты Радион банысан кодта, зæгъгæ, сæ куысты иууыл вазыгджындæр у æмбæстæгтæн бамбарын кæнын, Президентмæ бацæуыны тыххæй сæхи хъуамæ ныффыссын кæной рады номхыгъды, сæ проблемæтæ та бавдисой фыстæй.
ОСИАТЫ Индирæ
Comments are closed, but trackbacks and pingbacks are open.