Адæймаджы хорзы ном фæбæрæг вæййы, царды йæ алыварс адæммæ йын цы æвæрццаг миниуджытæ вæййы, сæ цин æмæ сын сæ дзæбæхдзинæдтæ æхсызгонæй йæхимæ куыд райсы, сæ тыхст уавæрты се ‘нцой куы балæууы. Ирыстон æмæ йæ раттæг адæмæн æдзух дæр лæггад кæнынæй чи нæ æфсæст, алкæмæн дæр йæ фарстатæ скъуыддзаг кæнынмæ аудгæ ахаст чи дардта, хæлар æмæ уарзонæй æдзухдæр семæ æмдзу чи кодта, уыдонæй уыд зынгæ музыкант Джыгкайты Аким. Уый тыххæй фыст у Плиты Гацыры уац «Магъы булæмæргъ – Джыгкайты аким», Плийы фырт бæстон æрдзырдта ацы диссаджы адæймаджы цард æмæ хæрзиуæгон архайды тыххæй. Фæзæгъынц, зæгъгæ, хорз адæймаджы хæрзтæ æгæрон сты, банымайæн дæр сын нæй, уый раст у, уымæ гæсгæ мæн дæр бафæндыд, Аким мын цы хæрзты бацыд, уыдон тыххæй дыууæ ныхасы зæгъын. Уæд Джыгкайы фырт куыста Адæмон сфæлдыстады хæдзары директорæй æмсæ йæм иу бон бахатыдтæн, цæмæй мæ сахуыр кодтаид ирон адæмон уадынгарз хъисфæндырыл цæгъдын. Уымæн мæ фæндон афтæ æхсызгон уыд, цыма йын стыр хæрзиуджытæ балæвар кодтон.
Зæрдиагæй æрæвнæлдта мæ курдиат æххæст кæнынмæ æмæ йæ иузæрдион архайды фæрцы цыбыр рæстæгмæ базыдтон цалдæр ирон мелодийы. Фæлæ йæм уый фаг нæ фæкаст æмæ ма ноджыдæр бацархайдта мæнæн исты хæрзиуæг скæныныл. Хорз æмбæрста, уадынгарзæй æнæмæнг кæй хъуамæ пайда кæна музыкант æрвылбон дæр, цæмæй цæгъдтытæ ма рох кæной, сæйраджыдæр, та цагъды техникæ алыварсонæй дæр рæза æмæ хуыздæр кæна. Мæнмæ хъисфæндыр кæй нæ уыд, уымæ гæсгæ мын балæварс кодта дыууæ рагон уадынгарзы æмæ ма мæ цинæн кæрон уыд!
Фæстæдæр, Дзæуджыхъæуы куы базонгæ дæн Национ музейы кусæг, этнограф æмæ археолог Хъантемыраты Эльбрусимæ, уæд ын æркой кодтон ирон адæмы рагон уадынгæрзты тыххæй. Уый мын бамбарын кодта, фыдæлтæй баззайгæ дзаумæттæ æнæмæнгдæр хъахъхъæнинаг кæй сты. Куы базыдта, мæнмæ хъисфæндыртæ кæй ис, уый, уæд мын балæгъстæ кодта, цæмæй дзы иу балæвар кæнон сæ музейæн. Æцæгдæр афтæ бакодтон æмæ йыл тынг фæцин кодта. Эльбрус хорздзинад ракæнæгæн хорзы бацыд, сæ цуры ирон уадынгæрзтæ арæзта дæсны кусæг Моураты Сослан æмæ уый арæхстджын къухтæй арæзт хъисфæндыр та мæнæн балæвар кодта Хъантемырайы фырт.
Афтæ у хорз адæймаджы арфæйаг куыст æмæ фæд. Уый уымæн зæгъын, æмæ хæрзиуæг тауæг уыд Джыгкайты Аким, куыд аивады къабазы, афтæ æрвылбонон царды дæр. Уымæн йæ хæрзиуæгон фæллой абалц кодта мæнмæ, стæй мæнæй та ахызт Цæгат Ирыстонмæ æмæ хæрзиуæгон лæвæрттæй иу æрбынат кодта Джæуджыхъæуы Национ музейы экспонатты ‘хсæн.
ХУЫБИАТЫ Никъала
