Аивадон коллективтæ æрæвнæлдтой сæ куыстмæ

 Сентябры мæйы райдианы Цхинвалы районы Культурæйы управленийы дæлбар аивадон коллективтæ улæфты фæстæ ногæй æрæвнæлдтой сæ разылæууæг хæстæ æххæст кæнынмæ. Управленийы хистæр Гаглойты Ростислав куыд радзырдта, афтæмæй уыцы коллективтæ дзæвгар сты, уыцы нымæцы кафджыты ансамбль «Амонд», адæмон театр, сывæллæтты ансамбль «Малусæг», стæй ма хъæууон хæдзæртты цы æндæр æмæ æндæр кафджыты æмæ зарæггæнджыты ансамблтæ уæвынад кæнынц, уыдон дæр. Ногæй куыстмæ рахизгæйæ, алы аивадон коллектив дæр тырны, цæмæй фæхуыздæр æмæ фæмидисджындæр кæной сæ репертуар. Бæлвырд аххосæгтæм гæсгæ, адæмон театры репертуары цы спектакльтæ ис, уыдон баххæст хъæудзæн хицæн рольты æххæстгæнджыты ног архайджытæй. Кæй зæгъын æй хъæуы, уыцы куыст сæххæст кæнын æнцон нæу цыбыр рæстæгмæ, фæлæ æвæрæг-режиссер Уанеты Æхсар æппæт дæр бакæндзæн уый тыххæй, цæмæй уыцы къуылымпытæ иуварс æрцæуой æмæ та сценæмæкæсджыты зæрдæтæ барухс кæной сæ зæрдæмæдзæугæ ралæудæй. Æнæуый та театры дзæвгар спектакльтæ ис, уыцы нымæцы «Мæ усы мад», «Файнустытæ» æмæ æндæртæ.

Зæрдæрухсгæнæн æнтыстытæ, аивадуарзджыты раз сæ диссаджы аивадон  ралæудæй æдзухдæр чи барухс кæны, уый у ансамбль «Амонд». Уымæн арæхстджын разамынд кæны æмæ коллективы ног, бæрзонддæр къæпхæнмæ схизыныл æдзухдæр архайы Санахъоты Сослан. Ансамблы сконды ис дыууæ фæлтæры, ома, хистæр  кафджытæ æмæ æвзæнгты къордтæ. Кафджыты фылдæр хай ныртæккæ сæ разылæууæг ахсджиаг хæстæ æххæст кæнынц Паддзахадон ансамбль «Симд»-ы, уымæ гæсгæ «Амонд»-ы разамонæг кусы кафджыты ног, курдиатджын фæлтæр цæттæ кæныныл. Йæ концерттæй сценæмæкæсджыты зæрдæтæ барухс кæны «Малусæг» дæр, уый дæр архайы ног тыхтæй йæ гæнæнтæ фæхуыздæр æмæ фæхъæздыгдæр кæныныл. Фæндырдзагъд, кафджыты æрстох, аивадон къухдариуæггæнджыты дæсны амындтытæ ма æнкъардæуы Дменис, Тъбет, Къостайыхъæу æмæ æндæр бынæтты. Уыдон дæр архайынц сæ кæфтытæ фæхуыздæр кæныныл æмæ ма репертуар ногтæй баххæст кæныныл. Иугæр хæдархайгæ аивадон къордтæ сæ тыхтыл куы баууæндой, уæд сæ аивад æвдисдзысты бынæттон цæрджытæн.                                          

ХУЫБИАТЫ Никъала