Æрæджы Ростовы областы Таганрог æмæ Некиленовскы районы уагъд æрцыд А.Третьяковы номыл поэзи æмæ поэтикон тæлмæцты 8-æм æхсæнадæмон фæсивæдон фестиваль-конкурс «Берега дружбы-2023», зæгъгæ. Фестивалы кæрон горæт Ростовы йæ куыст адарддæр кодта æвзонг автортæн поэтикон тæлмацты æппæтуæрæсейон гом скъола. Абоны æндыгъд уавæрмæ нæ кæсгæйæ, развæлгъау фæстиуджытæм гæсгæ литературон форумы хайад райстой Уæрæсейы Федерацийы 49 регионæй, уыцы нымæцы 15 национ-автономон территоритæ, афтæ ма Республикæ Беларусы 5 регионæй æмæ ма ноджы дунейы 10 бæстæйæ поэттæ-тæлмацгæнджытæ.
Ахуыргæнджытæй сын ралæууыдысты Уæрæсейы Федерацийы Фысджыты цæдисы 29 минæвары, Беларусы Фысджыты цæдисæй æмæ Æмцæдисон паддзахад Уæрæсе-Беларусы 17 минæвары. Уыдон сын амыдтой поэтикон æмæ тæлмацты дæсныдзинад, кодтой сын сфæлдыстадон æххуыс.
Фестиваль-конкурсы хайад райста цхинвайлаг æвзонг чызг, паддзахадон телерадиокомпан «Ир»-ы радиойы кусæг Гасситы Аннæ. Йæ ныхæстæм гæсгæ, уый ныр ацы конкурсы хайад райста æртыккаг хатт. 2021 азы дзы бацахста 2-аг бынат. Уыцы аз æй айстой фысджыты æмæ аивады архайджыты æхсæнадæмон цæдисмæ. 2022 азы конкурсы ацыд 1-аг бынатыл. Ацы аз дæр бацахста 1-аг бынат æмæ хорзæхджын æрцыд 1-аг къæпхæны лауреаты дипломæй, мадæлон æвзаджы рæзты тыххæй жюрийы сæрмагонд дипломæй æмæ «Расул Гамзатовы райгуырдыл 100 азы сæххæсты» майданæй. Афтæ ма йын конкурсы кæрон радтой сертификат тæлмацты Æппæтуæрæсейон гом скъолайы хайад райсыны тыххæй.
Уырдæм фæхуыдтой финалистты. Уый размæ арвыста йæ куыстыты, се ‘хсæн уыдысты йæ тæлмацтæ дæр. Æмдзæвгæтæ ратæлмац кодта французаг, беларусаг æвзæгтæй уырыссаг æвзагмæ. Уырыссаг æвзагæй та ирон æвзагмæ. Гасситы чызг Уæрæсейы Федерацийы фысджыты цæдисы уæнг Денис Ткачукимæ ныр æмгуыстад кæны æртæ азы. «Фестиваль-конкурсмæ сæ куыстытæ арвитынц, хайад райсын дзы кæй фæнды, уыдон. Жюрийы уæнгты зæрдæмæ цы куыстытæ фæцæуынц, уыдоны авторты фæхонынц финалмæ. Ацы аз дæр уыд афтæ. Æртыккаг хатт мæ кæй фæхуыдтой, уый мын уыд тынг æхсызгон. Фестиваль цытджын æгъдауæй байгом кæныны церемонийы сценæмæ ирон музыкæйы æхцон зæлтæм рахызтысты цæгатирыстойнаг сывæллæтты ансамбль «Бонвæрнон»-ы уæнгтæ сæ къухдариуæггæнæг Гæбæраты Аланы сæргълæудæй (уый у номдзыд артист, дзæнæттаг Гæбæраты Дауыты фырт). Сæ уындæй мæ зæрдæ хурварс абадт, мæ цинæн кæрон дæр нал уыл. Уый фæстæ мæхæдæг дæр сценæйыл куы ралæууыдтæн, уæд мын уыдон дæр кодтой тыхджын къухæмдзæгъд, уæлдайдæр та 1-аг бынат куы бацахстон, уæд. Мадзалы ма хайад райсынц, Ростовы цы диаспорæтæ ис, уыдон, уыцы нымæцы ирон диаспорæ дæр. Банысан кæнын ма мæ фæнды уый дæр, æмæ Национ культурæты фестиваль уагъд кæй нал æрцыд, Таганрогмæ украинæйаг ракетæ кæй æрбатахт, уый тыххæй. Иумæйагæй фестиваль ацыд бæрзонд æмвæзадыл, райстон дзы стыр æхцондзинад», – радзырдта Аннæ.
Гасситы Аннæ каст фæцис нæ горæты 9-æм астæуккаг скъола. Уый фæстæ та – ХИПУ-йы дыууæ факультеты – фæсарæйнаг æвзæгты æмæ ирон филологийы факультеттæ. Зоны англисаг æмæ немыцаг æвзæгтæ. Йæ ныхæстæм гæсгæ, дарддæр дæр фæнд кæны ацы фес-тиваль-конкурсы хайад исын.
Фестиваль-конкурс организаци æрцыд УФ-йы президенты гранты фæрцы.
Конкурсы хайадисджытæ цардысты Неклиновскы районы улæфæн базæ «Радуга»-йы, цыран æрдæгæхсæвтæм хъуыстысты æмдзæвгæтæ æмæ зарджытæ, уагъд сын цыдысты мастер-къластæ æмæ поэтикон дæсныдзинады блиц-ерыстæ. Фестиваль уагъд цæуы 11 азы дæргъы æмæ æппæт уыцы азты æвзонг авторты сфæлдыстадон потенциал среализаци кæнынæн æппæтварсон æххуыс кæны Неклиновскы районы администрацийы сæргълæууæг Василий Даниленко. Уый ма архайы монон æфсымæрдзинады традицитæ, профессионалон æмæ сфæлдыстадон бастдзинæдтæ сфидардæр кæныныл, Уæрæсейы славяйнаг æмæ æндæр адæмты иумиаг культурон исбон ба-хъахъхъæныныл. Мадзалы хайадисджытæн экскурси сорганизаци кодтой Таганрогы фенддаг бынæттæм, уыцы нымæцы Антон Чеховы номыл централон библиотекæмæ, литературон музеймæ, кæцы ис нæлгоймæгты раздæры гимназы историон бæстыхайы (ацы гимназ каст фæцис Чехов). Уыдысты Стыр Фыдыбæстæйон хæсты Адæмон æфсæддон-историон музейон комплекс «Самбекские высоты»-йы дæр æмæ афтæ дарддæр. Мадзалы кæрон йæ хайадисджытæн æвдыст æрцыд концерт.
Джиоты Екатерина
