19-æм ноябры нæ горæты Дзуттæгты кварталы Сомихæгты уынджы ныккалд Плиты бинонты хæдзары цар. Фæзындысты сæм Уæлвæткон уавæрты министрады ирвæзынгæнджытæ. Бинонтæй хæдзары уыцы уысм уыд æрмæст сывæллæттæй сæ иу. Дыууадæаздзыд чызг тынг фæтарст, уæддæр хуыцау хорз, аирвæзт.
Æнæуи дæр аварион хæдзар уыд, ныртæккæ цæрынæн нал бæззы Президенты амындмæ гæсгæ. Уыцы æхсæв бинонты акодтой æдас бынатмæ – нæ горæты уазæгдæттæй сæ иумæ. Ам сæм ис сæрмагонд хъусдард æмæ ныр агурынц мадзæлттæ, цæмæй сын ссарой сæ зымæг кæм арвитой, ахæм цæрæнуат.
Фыдбылызыбахауæг бинонты уавæр бабæрæг кодта Президент Гаглойты Алан сæрмагондæй йæхæдæг.
Хæдзары хицау куыд зæгъы, афтæмæй цалдæр боны размæ дæр ма сæ хæдзар цæрынæн бæззыд. Амондджынæй дзы цардысты бинонтæ æхсæзæй. Фæлæ-иу уысммæ сæ цард уæрдоны цалхау ныззылд. Бинонтæй алчидæр йæхи хъуыддæгты фæдыл уыд. Æрмæст хæдзары уыд чызджытæй сæ иу. Цы æрцыд, уый сывæллон фыццаг æмбаргæ дæр нæ бакодта. Зæгъы, зæгъгæ, раздæр райхъуыст æнахуыр хъыррыст, стæй уæд цар ныккалд. Цы ‘рцыд, уый куы бамбæрста, уæд тынг тарстæй æддæмæ ралыгъд. Йе ‘муд йæхимæ куы æрцыд, уæд йæ хæдзары бинонтæм телефоны бадзырдта. Уалынмæ сыхæгтæ дæр æрбамбырд сты æмæ Уæлвæткон уавæрты министрадмæ фæдзырдтой. Уыдон куыддæр хæдзары уавæр сахуыр кодтой, афтæ бинонты бафæдзæхстой, цæмæй сæ мидæмæ мачиуал бахиза, уымæн æмæ æдас нæу, цар та ногæй гæнæн ис æмæ æркæла.
Хæдзары æфсин Плиты Заринæ нын куыд радзырдта: «Ацы хæдзары цæрæм 2002 азæй. Августы хæсты рæстæджы нæ хæдзар бахъыгдард, йæ иу хайыл сæмбæлд ставд къалиброн нæмгуытæ. Куыддæрты йæ бацалцæг кодтам, фæлæ зыдтам нæ хæдзар аварион кæй у. Горæты администрацийы аварион хæдзæртты номхыгъды дæр нысангонд у. Йæ цæрæн уавæртæ фæхуыздæркæнинаг кæмæн сты, уыдоны номхыгъды дæр сты нæ куырдиæттæ. Ивгъуыд азы та мæ гæххæттытæ сног кодтон. Æнхъæлмæ кастæн къамис нæ кæд бабæрæг кæндзысты, уымæ. Фæлæ нæм ничи æрбацыд. Куы сæм бацæуай фæрсынмæ, уæд сæ дзуапп та æппынæдзах у иу «сымахæй тыхстдæртæ бирæ ис…». Ныр зымæджы къæсæрыл кæд æнæ хæдзар аззадтæн, уæддæр табу Хуыцауæн, мæ бинонтæ сæрæгас сты, мæ чызг æвыдæй баззад», – зæгъы Заринæ.
Президент Гаглойты Алан барамынд радта горæты администрацийы сæргълæууæг Хуыгаты Ромеойæн, цæмæй бинонтæн ссарой æххуырст фатер, цалынмæ сæ цæрæнуатæй сифтонг кæной, уæдмæ.
УАЗÆГТЫ Марфа
