Æмгуыстад дарддæр кæндзæн

Республикæ Хуссар Ирыстоны Хицауады Сæрдар Пухаты Эрикы къухдариуæгадæй ауагъд æрцыд æмбырд, цыран дзырд цыд Уæрæсейы Федераци æмæ Хуссар Ирыстоны ‘хсæн социалон-экономикон æмгуыстад адарддæр кæныны фарстатыл. Æмбырды хайад райстой Уæрæсейы Федерацийы министрады Цæгат Кавказы хъуыддæгты фæдыл делегацийы уæнгтæ, кæцытæ нæ республикæмæ æрцыдысты æртæбонон кусæгон балцы.

Æмбырды æркастæуыд Мидхъуыддæгты министрады хаххыл 2018 азæй 2019 азмæ уæрæсейаг финансон æххуысы фæрæзтæ ногæй адих кæныны, афтæ ма бюджетон къабазы кусджытæн сæ куыстмыздтæ фæфылдæр кæныны æмфинанскæнынады, ныры Инвестпрограммæмæ æмæ 2020-2022 азтæн Инвестпрограммæйы проект аразыны фæдыл Æмцæдисад æмæ интеграцийы тыххæй бадзырды фæлгæтты къухтæ цы сразыдзинæдтыл æрфыстæуыд, уыдон ацы аз куыд æххæст цæудзысты, уыцы фарстатыл.

Æмбырды куыд банысан кодтой, афтæмæй куыст цæуы фидæны Инвестпрограммæмæ хаст чи æрцæудзысты, уыцы мадзæлтты экономикон æгъдауæй сахуыр кæныныл.

Йæ раныхасы Пухаты Эрик банысан кодта 2020-2022 азтæн Инвестпрограммæ  æмбæлон дих кæй æрцæудзæн нæ республикæйы размæцыды пайдайæн.

«Арæзт æрцæудзысты фæндæгтæ, хидтæ, цæрæнхæдзæрттæ, уыцы нымæцы – Дзау æмæ Знауыры дæр. Арæзт ма æрцæудзысты ахуырадон æмæ æндæр уагдæттæ дæр».

Хицауады Сæрдар ма куыд загъта, афтæмæй корректировкæ цæуы скъолайы агъоммæ æмæ иумиаг ахуырады хызæджы модернизацийы план. Бæлвырдæй, скъуыддзаг цæуынц ЦАРЗ-ы районы сывæллæтты рæвдауæндоны, сæрдыгон æнæнизгæнæн лагеры арæзтад, Цхинвалы æртыккæгæм скъола сæндидзын кæнын.

Æмбырды ма æруынаффæ кодтой Æхсæнхицауадон къамисы радон рабадты фарстытæм бацæттæ кæныныл, кæцы уагъд æрцæудзæн 2019 азы Цхинвалы, азы фыццаг æмбисы.