Адæмы цардмæ, зонадон-техникон прогрессы руаджы, бирæ ивындзинæдтæ цæуы хаст, – æдзух тырнæм нæ уавæртæ фæуæрæхдæр кæнынмæ, къаддæр тых æмæ ресурстæ хардз кæнынмæ. Нæ куысты алы къабазы дæр æмæ ма нæ улæфты рæстæджы дæр бирæ хъуыддæгты ахызтыстæм автоматизаци æмæ машинизацимæ.
Ахæм ногдзинæдтæй, ома камерæтæй, азæй-азмæ уæрæхдæрæй пайда кæнынц фæндагон змæлды, цæмæй шофыртæ æмæ фистæг бæлцæттæ къаддæр халой фæндагон змæлды фæткойтæ. Фæлæ ма æрмæст ахæм фæткхалæн цаутæн не сты æххуыс, – сæ фæрцы ма æнцонтæй раргом кæнынц фыдракæндтæ дæр.
Нæ республикæйы къухдариуæгад дæр архайынц ахæм ногдзинæдтæй республикæйы фæндæгтæ сифтонг кæныныл æмæ уал ныры онг æххæст æрцыд фыццаг этап, – сфæрæз кодтой ифтонггæрзтæ информаци бæстон кæныны центрæн. Æнæхъæнæй та ацы аппаратон-программон комплекс хуыйны «Æдас горæт», кæцыйы сконды уыдзæнис 86 камерæйы видео æмæ къам исæнтæ æмæ контроль кæндзысты æгас республикæйы фæндæгтæ.
Ныр та æрæвнæлдтой аппаратон-программон комплексы системæ «Æдас горæт»-ы дыккаг этапмæ æмæ уый фæдыл Мидхъуыддæгты министрады уагъд æрцыд æмбырд. Хайад дзы райстой ведомствойы къухдариуæгад Мидхъуыддæгты министры хæдивæг Марданты Спартакы сæргълæудæй æмæ хуссарирыстойнаг фирмæ «Юг-Телеком»-ы къухдариуæгад, кæцытæн бахæс кодтой ацы проект кæронмæ бакæнын. «Юг-Телеком»-ы минæ-вæрттæ ныфс бавæрдтой, зæгъгæ, æппæт тыхтæ дæр ратдзысты, цæмæй дыккаг этапы æппæт куыстытæ дæр 1 декабрмæ конд фæуой.
Марданты Спартак ма банысан кодта, зæгъгæ, ацы проект ис бæстæйы Президент Бибылты Анатолийы хъусдарды бын æмæ йын фæстæмæ æргъæвæн нæй.
«Куыстытæ конд хъуамæ æрцæуой афоныл æмæ гъæдджынæй, цæмæй ацы системæ фидæны куса эффективонæй æмæ уæд æхсæнадон фæтк бахъахъхъæнынæн дæр фæахъаз уыдзæнис. «Ӕдас горæт»-ы программæ кæронмæ хъуамæ цæттæ уа 2022 азмæ», – загъта министры хæдивæг.
ДЖИОТЫ Алыксандр
Comments are closed, but trackbacks and pingbacks are open.