ХАЙАД РАЙСТОЙ АКЦИЙЫ
Донецкы Адæмон Республикæйы æхсæннацион æхсæнадон организаци «Землячество Алании»-йы минæвæрттæ правленийы сæрдар Бæззаты Еленæйы сæргълæудæй систы æхсæнадæмон патриотикон акци «Сад памяти»-йы хайадисджытæ. Акцийы сæйраг нысан у 27 милуан бæласы ныссадзын Стыр Фыдыбæстæйон хæсты алкæцы фæмардуæвæджы мысынады тыххæй. Æрвылаз дæр цъæх цыртдзæвæнтæ ныссадзынц æппæт уæрæсейаг субъектты, афтæ ма фæсарæнты дæр.
«Донецкы Адæмон Республикæйы «Уæрæсейы Адæмты хæдзары» филиалы разамонæг Ирина Белякова, Донецкы Уæрæсейы национ хатты хъуыддæгты фæдыл Федералон агентады Хуссар-ныгуылæйнаг управленийы регионалон минæвар Наталия Фролова, горæт Макеевкайы Горняцкийы районы администрацийы сæргълæууæг Оксана Москвита æмæ грекъæгтæ, сирийæгты национ-культурон автономиты минæвæрттæ, Донецкы тæтæры культурон центры, республикон æхсæнадон организаци «Русское сердце Донбасса», æхсæннацион æхсæнадон организаци «Землячество Алании»-йы минæвæрттимæ иумæ хайад райстой Æхсæнадæмон патриотикон акци «Сад памяти», – радзырдта нын Бæззаты Еленæ.
Горæт Макеевкайы скъолайы территорийыл ахуыргæнинæгтæ æмæ ахуыргæнджытæ ныссагътой бæрзбæлæсты къох.
«Ирæттæм ис ахæм æгъдау, зæгъгæ, бæлас куы ныссадзай, уæд ыл хъуамæ бабæттай лентæ иууыл хуыздæр фæндиæгтимæ. Стыр Фыдыбæстæйон хæсты рæстæджы Советон Цæдисы хъайтартæ ирæттæй систы 36 адæймаджы. Афтæмæй адæмы хатты нымæцмæ гæсгæ ирæттæ цæуынц фыццаг бынатыл хъайтарты нымæцмæ гæсгæ», – загъта Бæззаты Еленæ Донецкы телеуынынады алæвæрд «Панорама»-йы уацхæссæг Наталья Гриценкойæн.
Мах, Уæрæсейы иугонд адæм – стæм иу бинонтæ!
Ацы бонты Адæмон гуманитарон штаб «Байрай, Донбасс»-мæ (йæ сæргълæууæг Бæззаты Еленæ) гуманитарон æххуыс – хъæццултæ, базтæ, хуыссæны цъæрттæ, уæлæдарæс радтой волонтерон организацитæ: «Ленинградский доброволец», «Дальневосточный тыл», «Союз волонтерских движений» æмæ «Москва-Донбасс».
Инвалидты хъуыддæгты фæдыл комитеты сæргълæууæг Тимофей Кроливец ацы гуманитарон æххуыс байуæрста Горловка, Волноваха æмæ Докучаевскы æххуысхъуаг цæрджытыл. Кроливец куыд банысан кодта, афтæмæй иууылдæр райгондæй баззадысты гуманитарон æххуысæй æмæ бузныджы ныхæстæ дзырдтой йæ организатортæн.
Нæ уацх.
