Республикæ Хуссар Ирыстоны Культурæйы министрады цур хореографион скъола-студийы сфæлдыстадон коллектив сæ разамонæг, Республикæ Хуссар Ирыстоны адæмон ахуыргæнæг Четион Майæ æмæ нæ республикæйы аивæдты сгуыхт архайæг Джиоты Къостайы къухдариуæгадæй ивгъуыд къуырийы кæрон хайад райста дунеон фестиваль-конкурс «Лучший коллектив Кавказа – 2024»-йы, кæцы уыдис горæт Налцыччы.
Ансамбль «Кафт» ацы фестиваль-конкурсы рамбылдтой Гран-при, афтæ ма æндæр æмæ æндæр номинациты фыццаг къæпхæнты дипломтæ. Уый тыххæй нын фехъусын кодтой Республикæ Хуссар Ирыстоны Культурæйы министрады пресс-службæйы.
«Налцыччы ацы фестиваль-конкурс ацыдис Падзахадон музыкалон театры. Уым хайад райстой Уæрæсейы Федерацийæ хуыздæр коллективтæ. Тынг æхсызгон нын уыдис, радон хатт та нæ сывæллæттæ кæй фесгуыхтысты æмæ Хуссар Ирыстоны хореографион фонд кæй фæфылдæр кодтой Гран-при æмæ дипломтæй. Уый у стыр цины хъуыддаг æмæ нæ сывæллæттимæ мах дæр цин кæнæм», – банысан кодтой пресс-службæйы.
Пресс-службæйы ма нын куыд фехъусын кодтой, афтæмæй фестиваль-конкурсы хайад райсыны тыххæй, ансамблæн финансон æххуыс бакодта Президент Гаглойты Алан.
КОЦТЫ Еленæ
