Уæрæсейы Федерациимæ Хуссар Ирыстоны арæн æхгæд кæй æрцыд 10-æм майы, уый фæстиуæгæн æмбæлон службæтæ кусынц фæтыхджындæргонд режимы, цæмæй ма бауадзой фæткхалæн цаутæ. РХИ-йы Арæнхъахъхъæнæн службæимæ ма Дзауы районы Рукы хъæуы посты службæ хæссынц таможни, Мидхъуыддæгты æмæ Уæлвæткон уавæрты министрадты кусджытæ. Уымæй уæлдай ма æмбæлон фæтк бахъахъхъæныны тыххæй тыхон структурæтимæ иумæ лæууынц Югосетпотребнадзоры кусджытæ дæр.

10-æм майы ацы постмæ бæрæггæнæг ссыдысты Мидхъуыддæгты министр Наниты Игорь, йæ хæдивæг Пухаты Мераб æмæ æндæр къухдариуæггæнджытæ, цæмæй бынаты феной службæхæссыны уавæртæ. Посты чи лæууы, уыдон æххæст кæнынц санитарон нормæтæ, дарынц маскæтæ æмæ æрмкъухтæ, стæй ма пайда кæнынц дезинфекцион донгъæдтæй.

Ам посты раз лæууынц 20 уæзласæн машинæйæ фылдæр, кæцытæ рæстæгыл не рхæццæ сты æмæ бахаудтой арæны сæхгæды афонмæ.  Ацы сæвзæргæ уавæрыл бынаты аныхас кодтой Наниты Игорь æмæ Экономикон рæзты министр Бекъойты Геннади. Сæ хъысмæт сын фæстæдæр аскъуыддзаг кæндзысты.

Рукы пост басгарыны фæсæ та Мидхъуыддæгты министрады къухдариууæггæнджытæ азылдысты республикæйы медицинон объекттыл, кæцыты карантинон режимы сты коронавирусæй рынчынтæ æмæ зæрдæхсайгæ æмбæстæгтæ. Бабæрæг ма кодтой уазæгдон «Алан» дæр, – ам дæр карантины ис дзæвгар адæм æмæ дзы æхсæнадон фæтк хъахъхъæнынц мидхъуыддæгты министрады кусджытæ. Ацы объекттæм уадзынц æрмæстдæр барлæвæрдмæ гæсгæ. Ныры онг ма рынчынтæн сæ хиуæттæ хастой хæлцадон продукттæ дæр, фæлæ ныр Мидхъуыддæгты министр Наниты Игоры бардзырдмæ гæсгæ нал уадздзысты уыцы хуынтæ дæр. Уымæн æмæ цалдæр хатты хуынтимæ ссардтой карз нозт æмæ ма æндæр продукттæ дæр, кæцытæн рынчынтæм хæссыны бар нæй. Нырæй фæстæмæ ма æрмæстдæр бар уыдзæн бахæссæн æнахъом сывæллæттæн æнæмæнгхъæуæг продукттæ. Фæткхалджытæ конд цæудзысты административон бæрндзинадмæ. Рынчындонмæ хæлцадон продукттæ хæссын æнæмæнг хъуыддаг нæу, уымæн æмæ сын бынаты дæр лæвæрд цæуы хæринаг æмæ дзы ис æппæт уавæртæ дæр, цæмæй дыууæ къуырийы дæргъы мацæуыл фæтыхсой пациенттæ. 

Инспекцион азылды фæстиуæгæн Мидхъуыддæгты министрады къухдариуæгад разыйæ баззадысты, службæ куыд цæуы, уымæй. Цы фиппаинæгтæ ма разынд басгæрсты рæстæджы, уыдон цыбыр æмгъуыдмæ иуварс æрцæудзысты.

Джиоты Александр

Ацы æрмæджытæ дæр бакæс:

Default ThumbnailКусынц фæтыхджындæргонд режимы Адæм æнкъарынц, милицийы куыст кæй хуыздæр кæны, уый Милицийы сæйраг хæс – адæмæн лæггад кæнын Default ThumbnailМайы мæйы зæрдылдарæн бонтæ Default ThumbnailРеспубликæ Хуссар Ирыстоны Парламенты Уынаффæ

Comments are closed, but trackbacks and pingbacks are open.