Абон 3-æм июлы Фӕндагон змӕлды ӕдасдзинады инспекцийы кусджытæ нысан кæнынц сæ профессионалон бæрæгбон. Ацы управленийы сырæзтыл сæххæст ис 83 азы æмæ сæм арфæйы ныхæстæ зæгъынмæ æрбацыдысты Мидхъуыддæгты министрады сæргъæууæг Наниты Игорь, йæ хæдивæг Пухаты Мераб æмæ ма æндæр службæты æмæ управлениты хистæртæ.
Наниты Игорь зæрдиагæй раарфæ кодта инспектортæн куыд йæхи номæй, афтæ ма Республикæ Хуссар Ирыстоны Президент Бибылты Анатолийы номæй дæр.
«Сымах уæ службæйон хæстæ æххæст кæнут куыд боныгон, афтæ æхсæв дæр æмæ мæ банысан кæнын фæнды уый, æмæ кæй стут æнтыстджын. Бирæ тых хардз кæнут уе ‘нæниздзинадыл æнæауæрдгæйæ, цæмæй нæ фæндæгтыл уа сабырдзинад æмæ мачи хала фæтк. Нæ министрады æмæ республикæйы къухдариуæгад æппынæдзух архайы, цæмæй уæ куысты уавæртæ уой хуыздæр æмæ уæ мыздтæ та кæной фæфылдæр. Ныридæгæн нын уыцы хъуыддæгты бантыст бирæ æмæ ма дарддæр дæр куыст цæудзæнис материалон-техникон ифтонгад фæхуыздæр кæныныл. Мæ зæрдæ уын зæгъы фидар æнæниздзинад æмæ мын ут æнтыстджын царды дæр æмæ куысты дæр!», – загъта ведомствæйы сæргълæууæг.
Мидхъуыддæгты министры хæдивæг Пухаты Мераб дæр йæ раныхасы раарфæ кодта Фӕндагон змӕлды ӕдасдзинады инспекцийы кус-джытæн æмæ ма банысан кодта, зæгъгæ, инспектортæн азæй-азмæ сæ куыст кæны зындæр. Уымæн та йæ аххосаг у, машинæты нымæц бонæй-бонмæ кæй фылдæр кæны, уый.
Инспектортæн ма раарфæ кодта Фӕндагон змӕлды ӕдасдзинады инспекцийы управленийы сæргълæууæг Джиоты Алан.
Сæ службæйон хæстæ цæсгомджынæй кæй æххæст кæнынц æмæ ма абон сæ профессионалон бæрæгбон дæр кæй у, уый фæдыл цалдæр кусæджы схорзæхджын кодтой ве-домствæйон хорзæхтæй.
ДЖИОТЫ Александр
Comments are closed, but trackbacks and pingbacks are open.