Нӕ Республикӕйы автотранспорты ны-мӕц фӕстаг азты бӕрӕг кӕй фӕфылдӕр ис, уый алчи дӕр рахатыдта. Автома-шинӕты нымӕцимӕ иумӕ фылдӕр кӕнынц фӕндагон цаутӕ дӕр, кæцытæ иумиагӕй ӕндавынц фӕндаджы змӕлды ӕдасдзинадыл. Иууыл тынгдӕр ацы проблемæтӕ раргом сты горӕт Цхинвалы. Ахæм уавæрæн бирӕ аххосӕгтӕ ис. Фыццаджыдӕр, горӕты уынгты фылдӕр хай уынгӕг кӕй сты ӕмӕ дзы уыйбӕрц автотранспорты змӕлдӕн бынат кӕй нӕ фаг кæны, уый. Ноджы ма централон уынгты æрбауынгӕг кодтой сæ арӕзтады рӕстӕджы ӕмӕ уый аххосæй уыдоныл дӕр транспорты змӕлды темп бӕрӕг фӕкъаддӕр. Бирӕ хӕттыты Театралон фӕзуатмӕ æввахс уынгты, ома, горӕты центры, ацæуæн нал вӕййы автотранспортӕн. Уый та уымӕн ӕмӕ нӕ паддзахадон куыстуӕтты фылдӕр хай сты ацы территорийыл, ӕмӕ куыд службӕйон, афтӕ хисӕрмагонд автотранспорты дæр бауромынц ацы уынгты.
Ныртæккæ Хуссар Ирыстоны Фӕндагон змӕлды ӕдасдзинады паддзахадон инспекцийы управленийы кусджытӕн ис тынг бирӕ куыст, куыд горӕт Цхинвалы, афтӕ районты дӕр. Кӕд ивгъуыд азимæ абаргӕйӕ, фӕндагон-транспортон цауты нымӕц фӕкъаддӕр, уӕддӕр æрцыд æнамонд цаутæ дæр – 7 адӕймаджы фӕмард ӕмӕ 17 та алыгъуызон цæфтимæ рынчындонмӕ бахаудтой.
Фæндагыл æрцæугæ æнамонд цаутæ фылдæр хатт баст вæййынц, шофыртæ нозтджынæй машинæ кæй скъæрынц, уыимæ. Нозтджын шофыртæ кӕд ивар цӕуынц, уӕддӕр сӕ нымӕц дзӕвгар фӕфылдӕр ис – 276 шофыры баурæдтой ацы аз. 12 дзы урæд ӕрцыдысты дыккаг хатт, сӕ раздӕры ивары рӕстӕг нырма нӕ фӕцис, афтӕмӕй, ӕмӕ сыл баконд ӕрцыдис уголовон хъуыддӕгтӕ. Уый та ууыл дзурӕг у, ӕмӕ бирӕ шофыртӕ бынтондӕр нӕ хъуыды кӕнынц сӕ алыварс адӕмы ӕдасдзинадыл, афтӕмӕй фыдбылызы баппарынц сӕхи дӕр ӕмӕ ма æндæрты дӕр. Нозтджын шофырты ныхмӕ арӕх уагъд цӕуынц рейдон мадзӕлттӕ куыд горӕт Цхинвалы, афтӕ районты дӕр. Ӕвӕццӕгӕн, цалынмӕ ахæм шофыртӕ сӕхӕдӕг бамбарой нозтджынæй машинæ скъæрын фыдбылыз кӕй хæссы, уый, уӕдмӕ æнамонд цауты нымæц нӕ фӕкъаддӕр уыдзӕнис.
Фӕндагон цауты дзӕвгар хай ма баст у, шофыртæ сæ машинæты æгæр тагъд кæй фескъæрынц, уыимæ, ома, фехалынц автомашинӕйы цыды тагъдады режим. Ахæм-ты нымӕц ацы аз республикæйы бӕрӕг фӕкъаддӕр ивгъуыд азимæ абаргӕйӕ – 555 шофыры, фӕлӕ горӕт Цхинвалы та сæ нымæц фӕфылдӕр. Уый та стыр тӕссагдзинад æвзӕрын кӕны фистӕгӕй цӕуджытӕн. Кӕй зӕгъын ӕй хъӕуы, ахӕм шофыртӕ иваргонд ӕрцӕуынц, фӕлӕ фистӕгæй цæуджытæ адӕм сӕхӕдӕг дӕр хъуамӕ сӕхи хизой ӕмӕ фӕндагӕй иу фарсӕй иннӕ фарсмӕ хизгӕйӕ, сӕ хъус дарой автомашинӕты змӕлдмӕ.
Горӕт Цхинвалы ма бӕрӕг фӕфылдӕр сты, фӕндӕгтæ кæм иу кæнынц, ахæм бынӕтты фӕндагон нысӕнттæм гæсгæ раст чи нӕ аскъӕры, уыдоны нымӕц дæр. Уый аххосæй дæр арӕх ӕрцӕуынц аваритӕ. Автоинспектортӕ сӕ ивар кӕнынц, фӕлӕ уӕддӕр нӕ сӕттынц. Ӕвӕццӕгӕн, ахӕм фӕткхалджыты карздӕрæй ӕфхӕрын хъӕуы.
Цхинвалы уынгты ма арæх фенӕн ис, автомашинӕтӕ тротуартыл цæхгæрмæ куы бауромынц. Ахӕм ӕбӕрнон шофыртӕ зындзинӕдтӕ æвзарын кӕнынц фистӕгӕй цӕуджытӕн. Бирӕ уынгты автомашинӕтӕ лӕууынц мӕйгӕйтты ӕмӕ цалдӕргай азты дæр æнӕзмӕлгӕйӕ. Бирӕтӕ дзы цалцæг кæнынæн дӕр нал фӕбӕззынц, фӕлӕ сӕ сӕ хицӕуттӕ нӕ аиуварс кӕнынц фӕндагӕй, кӕнӕ тротуарӕй. Автоинспектортӕ фадыгон инспектортимӕ иумӕ тох кӕнынц ахӕм фӕткхалджыты ныхмӕ ӕмӕ сын фӕстаг рӕстӕджыты æнтыстытӕ дӕр ис. Тӕрхондоны уынаффӕмӕ гӕсгӕ, горӕты иуæй-иу уынгты асæрибар кодтой зæронд, хæлд машинæтæй, фӕлӕ уæддæр нырма ахӕм нывтӕн ис фенӕн.
Кӕд нырма бирæ бакусын хъæуы ацы фадыджы адӕмы ӕдасдзинад бахъахъхъӕныны хъуыддаджы, уӕддӕр Фӕндагон змӕлды ӕдасдзинады паддзахадон инспекцийы управленийы кусджытӕ архайынц, цӕмӕй фӕткхалӕн цаутӕ, фӕндагон æнамонд цаутӕ бæрæг фæкъаддӕр уой. Алчи дӕр йӕ службæйон хӕстӕ куыд æмбæлы, афтæ куы æххӕст кӕна, шо-фыртӕ фæндагон змæлды фӕтк куынӕ халой ӕмӕ фистӕгæй цæуджытæ дæр сӕхи куы хизой, уӕд алцы дæр йæ гаччы сбадид. Фæлæ, хъыгагæн, нырма афтæ нæу…
Джиоты Александр
Comments are closed, but trackbacks and pingbacks are open.