РХИ-йы Хицауады æнæрадон рабадты, кæцы уагъд æрцыд Хицауады сæрдары хæдивæг – Экономикон рæзты министр Бекъойты Геннадийы къухдариуæгадæй, фидар æрцыд пенситы тыххæй закъоны проект, кæцы уый размæ æргъæвд æрцыд дарддæр ыл бакусыны тыххæй.
Куыд банысанчындæуыд, уымæ гæсгæ закъон здæхт у Хуссар Ирыстоны æм-бæстæгты пенсион ифтонгад фæхуыздæр кæнынмæ, сæрмагондæй, пенситы бæрц фæфылдæр кæнынмæ. Куыд зонæм, афтæмæй 2019 азы куыстмызды æмæ пенситы минималон бæрц цæрыны минимумы æмвæзады онг скæныны фарст Хицауады раз сæвæрдта Президент Бибылты Анатоли.
РХИ-йы Пенсион фонды сæргълæууæг Тасойты Азæйы ныхæстæм гæсгæ, пенсийы кармæ хауæг закъоны уагæвæрд баззад æнæаивгæйæ (55 азы – сылгоймæгтæн æмæ 60 азы та – нæлгоймæгтæн), æмæ пенситы бæрц та фылдæр кæны. «Фидæн азæн республикæйы бюджеты æвæрд æрцыд 76 милуан сомы бæрц социалон пенситæ бафидыны тыххæй. Суæгъдгонд фæрæзты хыгъдæй махæн нæ бон суыдзæн æппæт категориты пенсиисджыты пенситæ фæфылдæр кæнын», – банысан кодта Тасойты Азæ.
Уымæй дарддæр ма Президенты Администрацийы къухдариуæггæнæг Козаты Игоры фæндонмæ гæсгæ, хъусдардмæ райстой фæсарæйнаг æмбæстæгтæм хауæг барасткæнинаг. Бахæсгæ фæндонмæ гæсгæ, фæсарæйнаг æмбæстæгтæн ахасты пенсион ифтонгады механизм нымад цæуы æрмæстдæр уæд, кæд æмæ уыдон цардысты уыцы бæстæты, кæцытæ банымадтой Хуссар Ирыстоны хæдбардзинад. Афтæ ма бæрæг æрцыд уый дæр, æмæ республикæйы пенси райсыны тыххæй кæй хъæуы æмбæстагдзинады æнæмæнгхъæуæг 10 азы æмгъуыд.
Рабадты рæстæджы хорзыл банымадтой, социалон-экономикон рæзтæн ахъазгæнæг Инвестицион программæйы фæлгæтты инфраструктурæйы объекттæн бюджетон инвестициты хуызы «Натурплант»-æн паддзахадон æххуыс бакæнын. Цæвиттон, проекты инициатор заявкæ радта Дзауы районы дыууæ хиды реконструкцийы тыххæй.
«Эксперттæ æрцыдысты ахæм хатдзæгмæ, зæгъгæ, хидтæ сты аварион уавæры. Хидты сæндидзын кæнын æнæмæнгхъæуæг у æрмæст компани ООО «Натурплант»-ы территоримæ фæндаджы уавæр фæхуыздæр кæныны тыххæй нæ, фæлæ ма районы цæрджытæн дæр», – банысан кодта Бекъойты Геннади.
Comments are closed, but trackbacks and pingbacks are open.