Хайджын сæ кæнынц аивады æвæрæнтæй

Нæ горæты фыццæгæм музыкалон скъола хæссы музыкæ æмæ кафты аивады номдзыд дæсны Тедеты Георгийы ном. Ацы ахуыргæнæн уагдоны 54 азы фæллой кæны йæ номдзыд фыды фарнæй рахæсгæ уæздандзинад æмæ куыстуарзондзинадæй хайджын чызг Тедеты Маринæ. Уыцы азтæй 28 азы батыдта скъолайы ахуыры хайады сæргълæууæгæй æмæ ныр 20 азы та у йæ директор. Йæ бирæазон æмæ ахадгæ куысты тыххæй йын раздæр лæвæрд æрцыд Республикæ Хуссар Ирыстоны культурæйы сгуыхт архайæджы ном æмæ ивгъуыд аз та райста Адæмон ахуыргæнæджы кадджын ном. Маринæйæн коллективмæ ис уарзæгой æмæ фæлмæн ахаст, сæхи рады йæ уыдон сæхæдæг дæр хайджын кæнынц уыцы æвæрццаг миниуджытæй æмæ сын уый фадат дæтты æнтысгæ куыст кæнынæн. Скъолайы цы фæлтæрд специалисттæ ис, уыдон уарзынц сæ дæсныйад, алчи дæр сæ тырны кæстæртæн арф зонындзинæдтæ балæвар кæнынмæ. Уый бæрæг у уымæй, æмæ сæ алы ралæудæй дæр кæй барухс кæнынц сценæмæкæсджыты зæрдæтæ, се ‘взонг  удты цæхæрæй сæ кæй батавынц рухс хуры тынтау. Мæ цæст хæссын, директоры хатæны æндæр æмæ æндæр азты цы грамотæтæ, æппæлæн сыфтæ конд сты, уыдоныл, кæцытæ дзурæг сты, кæстæртæн аивадуарзджытæй цы зæрдæбын арфæтæ рантыст, уыдæттыл.

Ахуыргæнджытæн та сæ зæрды уыд дарддæр дæр аивады æвæрæнтæй сæ хъомылгæнджыты фæхайджын кæнын, фæлæ уый сæ къухты кæронмæ сæх-хæст кæнын нал бафтыд, карантин кæй уыд, уый аххосæй. Ацы ахуыры аз сæм райдыдта 15 январы. Директор сагъæсгæнгæ дзырдта, сæ ахуырдзаутæ цасдæр рæстæджы ахуырæй кæй фæиппæрд сты, аивады ацы хуызтæн та дистанцион ахуыр бынтондæр ницы пайда æрхастаид. Уыцы аххосагмæ гæсгæ уагъд нал æрцыдысты, раздæры ахуыры азты цы бæрæгбонон мадзæлттæ уагътой, уыдоны иу хай, ома, ногазон бæрæгбонон концерт, Фыдыбæстæ хъахъхъæнæджы бон. Тедеты чызг бахæс кодта йæ ахуыргæнджытæн, цæмæй сæ алчи дæр йæ ахуыргæнинæгтæн бацамона фæйнæ уацмысы æмæ бацæттæ кæной мадзал Сылгоймæгты дунеон бон – 8-æм марты цытæн.

Музыкалон скъолайы ис ахæм хайадтæ, куыд фортепиано, скрипкæ, аккордеон, ирон фæндыр, академион æмæ эстрадон вокал, домрæ æмæ духовон инструментты хайад. Иууыл фылдæр ахуыр кæны фортепианойы хайады, сæ ахуыргæнджытæ та сты 22, уыцы нымæцы: Æлборты Мананæ, Гæджиты Жаннæ, Гæбæраты Людæ, Гобозты Оксанæ, Къæбысты Иринæ, Коцты Иринæ, Петоева Светланæ, Тедеты Аннæ, Харебаты Додо æмæ æндæртæ, вокалы ахуыргæнджытæ сты Гатыгкоты Нинæ, Гасситы Ацæмæз, Дзасохты Наташæ, Сланты Алыксандр, Харебаты Марта, аккордеонæй – Куымæридтаты Тинæ, Хъæцмæзты Лианæ, Пухаты Альбинæ, Плиты Мурат, Танделаты Таня æмæ æндæртæ. Æдæппæт сæ ахуыргæнинæгты нымæц у 272, уыдонæн сæ фылдæр хай сты горæтæй, цæуы ма сæм Дменисы æфсæддон заставæйæ дыууæ, дыууæ та сты Дзауæй, афтæ ма горæты æфсæддон хайы сывæллæттæ дæр. Скъоладзаутæн алы аз дæр вæййы хыгъдон концерттæ, уымæй дарддæр ма сæ аивадимæ базонгæ кæнынц куыд нæ республикæйы хицæн районты, афтæ Дзæуджыхъæу, Майкоп æмæ æндæр бынæтты.

Музыкалон скъола цалдæр азы размæ æрцыд хорз цалцæг, ифтонг у æмбæлон инвентарæй, æнæкъуылымпыйæ дзы кусы хъармгæнæн системæ дæр. Цух не сты ахуыртæ уадзынæн хъæуæг литературæйæ, зонгæ сæ кæнынц куыд уырыссаг, фæсарæйнаг, афтæ ирон композиторты цард æмæ сфæлдыстадон бынтимæ. Уый тыххæй дзы ис музыкалон литературæ ахуыр кæныны предмет æмæ йын къуыри лæвæрд цæуы 1 сахат æмæ æрдæг, уыдонæй сахат ахуырдзауты зонгæ кæнынц уырыссаг æмæ фæсарæйнаг аивады дæснытимæ, иннæ æрдæг сахат та ахуыр кæнынц ирон композиторты цард æмæ сфæлдыстадимæ.

                                         ХУЫБИАТЫ Никъала