Цхинвалы районы администрацийы адæмон ахуырады хайад (йæ сæргълæууæг Лолоты Барис) 2020-21 ахуыры азы бæрæг куыст кодта хъомыладон куысты гъæд бæрзонддæр кæныныл. Ахуырады хайады кусджытæ сæ куыст кодтой куысты бацæттæгонд плæнтты бындурыл. Уагътой гом уроктæ, арæзтой тематикон мадзæлттæ ауадзыны тыххæй графиктæ.
Уæлдай хъусдард здæхтæуыд æвзонг специалистты куыстмæ. Ахуыры азы райдианы хайады методисттæ цыдысты скъолатæм, цыран ахуыргæнджытæн æххуыс кодтой тематикон плæнттæ æмæ куысты программæтæ цæттæ кæныны. Районы скъолаты ахуыргæнинæгтæ активон хайад райстой къласæн æмæ скъолайæн æддейæ мадзæлтты. Уагъд цыдысты мадзæлттæ, ахæм зæрдылдарæн бонтæм, куыд Хуссар Ирыстоны тырысайы бон, Хетæгкаты Къостайы райгуырды бон.
Хъыгагæн, дунейы цы æнæхайыры пандеми апарахат, уый аххосæй республикæйы иумиагахуырадон уагдæттæ ахызтысты дистанцион ахуырмæ 2020 азы 20 октябрæй. Районы Къостайыхъæу, Дменис æмæ Сатихъары иумиагахуырадон скъолаты ахуыртæ уагъд цыдысты интернеты руаджы. Иннæ цæрæн бынæтты ахуырдзаутæн нæ уыд фадат уымæй пайда кæнынæн æмбæлон гаджеттæ æмæ финансон уавæрты цухдзинады аххосæй. Ахуыры процесс сног Ногазон каникулты фæстæ 2021 азы 15 январæй.
Февралы мæйы методисттæ цыдысты скъолатæм æмæ ахуыргæнинæгты цæттæ кодтой республикон олимпиадæмæ. Ивгъуыд ахуыры азы 30 ахуыргæнæгæй фылдæр уыдысты радон аттестацийы, сæ фылдæр хай та уыдысты ахуыргæнджыты квалификаци бæрзонддæргæнæн курсыты нæхи республикæйы.
Банысан кæнын хъæуы, Къостайыхъæуы астæуккаг скъолайы цур нывгæнæн скъола-студийы хорз куыст. Студийæн æмбæлон разамынд кæны йæ къухдариуæггæнæг- Республикæ Хуссар Ирыстоны адæмон нывгæнæг Гæбæраты Барис. Йæ хъомылгæнинæгтæ, куыд республикæйы, афтæ уымæн æддейæ дæр цы равдыстытæ вæййы, уым вæййынц активон хайадисджытæ. Æвзонг нывгæнджытæ иу æмæ дыууæ хатты не систы бæрзонд хорзæхты аккаг. Ахуыры аз районы фæцис рауагъдонты балæй æмæ сын лæвæрд æрцыдысты грамотæтæ æмæ зæрдылдарæн лæвæрттæ.
Фæлæ банысан кæнын хъæуы уый, æмæ уæддæр районы иумиагахуырадон уагдæтты кæй уыд куысты цухдзинæдтæ дæр. Уыдоныл та дарддæр хъуамæ бакусой куыд скъолаты разамонджытæ, афтæ ахуырады хайады кусджытæ дæр. Олимпиадæйы республикон туры фæстиуджытæ районæн уыдысты мæгуырау æмæ уымæ гæсгæ ахуыргæнджытæ хъуамæ фæхуыздæр кæной сæ куыст, уадзой ахуырдзаутæн уæлæмхас ахуыртæ, методкабинеты дæр бахъæудзæн æмбæлон мадзæлттæ уавæр рараст кæныны нысанæн.
Ахуырады хайад æнахъомты фæдыл инспекциимæ иумæ иумиаг куыст бакодта барвæткхалæг ахуыргæнинæгтимæ. Æдзухдæр цыдысты скъолатæм æмæ се ‘хсæн уагътой хъомыладон-профилактикон мадзæлттæ, рабæрæг кодтой, йæ уагахаст мæгуырау кæмæн у, уыцы ахуырдзауты. Афтæ ма зынхъомылгæнæн сывæллæтты ныййарджытимæ дæр кодтой æмбæлон куыст.
Ног ахуыры азæй ахуырады хайад æмæ иумиагахуырадон скъолаты къухдариуæггæнджытæ æмæ ахуыргæнджыты бахъæудзæн стыр куыст бакæнын сæ разы æрæвæргæ хæс – ахуырфæразондзинад фæхуыздæр кæныны тыххæй.
ХУЫБИАТЫ Никъала
Comments are closed, but trackbacks and pingbacks are open.