Белграды уагъд цыд уæгъдибар хъæбысхæстæй Дунейы кубок. Ерысты Молдовийы командæйы сконды æвзист призер ссис Рубайты Георги. Уый архайдта 92 кг уæзы категорийы. Ирон богалтæй ма бронзæйон призер ссис Салхъазанты Таймураз (74 кг). Уый та хъахъхъæдта Словакийы спортивон кад.
Хъыгагæн, травмæйы аххосæй æрдæгфиналон тохæй йæхи систа Уалыты Чермен (70 кг). «Фыццаг тохы йын ныццавтой йæ тæн. Хъуыды кодтам, йæ рыст кæй ацæудзæн, фæлæ дыккаг тохы йæ цæф срæсыд. Уый тыххæй дохтыртимæ аныхас кæныны фæстæ уынаффæ рахастам, цæмæй йæ ерыстæй сисæм», – фехъусын кодта УФ-йы æмбырдгонды сæйраг тренер Тедеты Дзамболат.
***
Нижний Новгороды уагъд цæуынц Æппæтуæрæсейон студентон хъæзтытæ. Уæгъдибар хъæбысхæстæй ерысты уæлахиздзау ссис цъинагайраг чызг Дудайты Кристинæ. 76 кг уæзы категорийы финалы фæуæлахиз Европæйы чемпионкæ Кристина Шумовайыл.
«Тынг райгонд дæн мæ бæрæггæнæнæй. Æхсызгон мын уыд ахæм тыхджын ныхмæлæууæджы рамбулын. Дунейы чемпионатмæ цæттæгæнæн сборты йын фæхæрд дæн. Фæлæ ныр мæхи хорз кæй бацæттæ кодтон, уый фæрцы мын бантыст реванш райсын. Ныр мæхи цæттæ кæндзынæн бæстæйы чемпионатмæ, кæцы уагъд цæудзæн Олимпиадæйы размæ фидæн аз апрелы мæйы. Мæ хæс у рамбулын», – банысан кодта Дудайты Кристинæ.
Банысан кæнын ма хъæуы уый, æмæ Дудайты Кристинæ студентты ‘хсæн чемпионаты кæй фæуæлахиз ивгъуыд аз дæр.
Нижний Новгороды ма студентты ‘хсæн æппæтуæрæсейон ерысты сæ тыхтæ фæлвæрдтой грекъаг-ромаг хъæбысхæстæй архайæг спортсментæ. Уыдоны ‘хсæн та 60 кг уæзы категорийы иууыл тыхджындæр разынд Тыбылты Георги. Гугкаты Давид та 67 кг уæзы категорийы бацахста дыккаг бынат.
ХУРИТЫ Батрадз
Comments are closed, but trackbacks and pingbacks are open.