Уæгъдибар хъæбысхæстæй Уæрæсейы æмбырдгонд командæйы сæйраг тренер Тедеты Дзамболат фехъусын кодта Токиойы Олимпион хъæзтыты бæстæйы спортивон кад чи хъахъхъæндзæн, уыдоны нæмттæ. Командæмæ цы 6 богалы бахаудтой, уыдонæй æртæ сты Ирыстоны хъæбысхæсты скъолайы хъомылгæнинæгтæ.
74 кг уæзы категорийы архайдзæн дунейы дыууæ хатты чемпион (2018, 2019), Европæйаг хъæзтыты уæлахиздзау (2019) Сидахъты Зауырбег.
86 кг майдантыл тох кæндзæн Европæйы æртæ хатты чемпион (2018, 2020, 2021), дунейы чемпионаты призер (2019) Найфонты Артур.
125 кг уæзы категорийы архайдзæн Европæйы чемпионаты призер (2021) Козырты Сергей. Нæлгоймæгты ‘хсæн уæгъдибар хъæбысхæстæй ерыстæ уагъд цæудзысты 4-7 августы.
Олимпион хъæзтытæ байгом кæныны церемони уагъд æрцæудзæн 23-æм июлы, сæ сыхгæныны церемони та уыдзæн 8-æм августы. Олимпиадæ цæудзæн 19 боны.
Банысан кæнын хъæуы уый дæр, æмæ Ирыстоны историйы 15 минæварæн кæй бантыст Олимпион чемпионтæ суæвын. Уыдон та сты: Андиаты Сослан (1976 Монреаль, 1980 Мæскуы), Хæдæрцаты Махарбег (1988 Сеул, 1992 Барселона), Фадзайты Арсен (1988 Сеул, 1992 Барселона), Хæбæлаты Лери (1992 Барселона), Тедеты Эльбрус (2004 Афинтæ), Богъиты Вадим (1996 Атланта), Кахи Къахиашвили (1992 Барселона, 1996 Атланта, 2000 Сидней), Таймæзты Тимур (1996 Атланта), Таймæзты Артур (2004 Афинтæ, 2008 Пекин, 2012 Лондон), Давид Мусульбес (2000 Сидней), Бæройты Хасан (2004 Афинтæ), Гуæцæлты Хадзымурат (2004 Афинтæ), Санаты Аидæ (2008 Пекин), Хуыгаты Алан (2012 Лондон) æмæ Рæмонты Сослан (2016 Рио-де-Жанейро).
Хуриты Батрадз
Comments are closed, but trackbacks and pingbacks are open.