Хуссарирыстойнаг æвзонг теннисисттæ хорз сæхи равдыстой æрыгæтты ‘хсæн РЦИ-Аланийы чемпионаты. 11-аздзыд чызджыты ‘хсæн фæуæлахиз Хъуылымбегты Виктория, дыккаг ссис Лалыты Азæ æмæ пьедесталы æртыккаг къæпхæнмæ та схызт Габуты Илонæ. Сæ тренер у Остъаты Лидия.
12-аздзыд лæппуты ‘хсæн сыгъзæрин майдан рамбылдта Хаситы Богдан. 11-аздзыд лæппуты ‘хсæн æртыккаг бынат бацахста Ролан Кулешов. 18-аздзыд спортсменты ‘хсæн фæндзæм бынат бацахста Болдан Дашиев. Спортсменты ерыстæм бацæттæ кодтой Джиоты Мириан, Кæсойты Ларисæ æмæ Изетæ, Уалыты Иринæ æмæ Кокойты Амандæ.
Ерысты мæ сæхи хорз равдыстой Дзабиты Роланд, Бететы Александр, Дзæгъиаты Илонæ æмæ Дианæ.
ДЗЮДО
Нижний Новгороды уагъд æрцыд Уæрæсейы Кубок рамбулыны тыххæй ерыстæ дзюдойæ. Хайад дзы райстой 45 регионæй 374 спортсмены. Се ‘хсæн уыдысты Ирыстоны дзюдойы скъолайы хъомылгæнинæгтæ дæр. Бантыст сын æртæ бронзæ майданы рамбулын. Майданты хицæуттæ систы Елбачиты Георги (81 кг), Хъайсынты Мадинæ (78 кг) æмæ Зураты Зæлинæ (63 кг).
ХУРИТЫ Батрадз
