СÆ ИУМИАГ ХÆС – ÆДАС ÆМÆ САБЫР ЦАРД ИФТОНГ КÆНЫН

Женевæйаг дискусситы фæсарæйнаг организациты минæвæрттæ хуссарирыстойнаг фарсимæ æруынаффæ кодтой, радон раундмæ цы фарстатæ бацæттæ кæнын хъæуы, уыдоныл.

Фæлæ уæддæр æмæ уæддæр Женевæйы дискусситы сæйраг хæс у, Хуссар Ирыстон æмæ Абхазы ныхмæ тыхæй пайда кæй нал æрцæудзæн, уыцы юридикон бæрнджын документыл бакусын. Уый банысан кодта Фæсконфликтон фарстатæ бæстон кæныны фæдыл РХИ-йы Президенты æххæстбарджын минæвар Джиоты Мурат. Йæ ныхæстæм гæсгæ дискусситы хайадисджыты иумиаг хæс у, Хуссар Ирыстоны территорийыл æмæ æгас регионы æдас æмæ сабыр цард биноныг кæныныл архайын. Ныфс бавæрдта, дискусситы радон раундмæ цæттæ кæныны фарстыты, фыццаджыдæр, уынаффæ цæудзæн Хуссар Ирыстон æмæ Абхазы ныхмæ тыхæй пайда кæй нал æрцæудзæн, уыцы юридикон бæрнджын документыл бакусын æмæ æдасдзинады фарстатыл æруынаффæ кæнын. Уымæн æмæ хуссарирыстойнаг делегацийы уæнгтæн Женевæйы ис æппæт æххæстбартæ дæр ацы документыл бакусынæн. Уый тыххæй нын ис æмбæлон зæрдæйы уаг æмæ нæ ныфс ис, æмсæрдæрттæ, дунеон организациты минæвæрттæ – æппæтдæр кæй сараздзысты, цæмæй документыл куыст цæуа активондæрæй.

Регионы уавæры фæдыл ныхасгæнæг банысан кодта, иумиагæй сисгæйæ кæй у стабилон. Фæлæ, зæгъгæ, уыцы стабилон æндыгъд уавæр нæ нысан кæны æмæ нæхицæн сабыр бадæм. Уыцы хъуыддаджы ноджыдæр банысан кодта Инциденттæ ма руадзын æмæ сæм хъусдард здахыны фæдыл механизмты фæлгæтты позитивон куыст æмæ ма уый фæлгæтты эффективонæй кæй кусы тæвд хахх, уый дæр.

Уыдон Джиоты Мурат банымадта Женевæйы дискусситы ахсджиаг æнтыстыл.

Евроцæдисæй æмсæрдар Тойво Клаар дæр ныфс бавæрдта Женевæйы дискусситы радон раунды æнтыстджын куыстæй. Мах дæр, зæгъгæ, æдасдзинады фарстытæм серьезон ахаст дарæм æмæ ацы фарст бæстон кæнынмæ аздахдзыстæм æппæт тыхтæ дæр. Ацы балцы рæстæджы ХИПУ-йы студенттимæ фембæлд æмæ радон хатт та Ленингоры районмæ балцы тыххæй банысан кодта, зæгъгæ, уымæй бамбардзыстæм регионы иумиаг уавæр.

ЕÆÆО-йæ æмсæрдар Анника Сёдер та банысан кодта, Женевæйы фæзуат дискусситы хайадис-джытæн фадат кæй дæтты сæ хъуыдытæ кæрæдзи-йæн фехъусын кæнынæн. Махæн, зæгъгæ, æхсызгон у, ахæм мидисджын, пайдаджын дискусситæ уагъд кæй цæуынц, уый.

«Кæй зæгъын æй хъæуы, тыхæй пайда кæй нал æрцæудзæн уый æмæ æдасдзинады фарстатæ ахсджиаг сты Женевæйы дискусситы мандаты. Уы-мæйдæр, дискусситы бирæ фарстытæ вазыгджын сты. Уымæ гæсгæ мах бузныг стæм хуссарирыстойнаг фарсæй ацы форматы хайад кæй исынц, уый тыххæй», – банысан кодта Седер.

Бынæттон цæрджытæ равдыстой сæ æнæразыдзинад полициæгты посты тыххæй

Бæрæг куыд у, уымæ гæсгæ Женевæйы дискусситы ду-неон организациты минæвæрттæ Хуссар Ирыстонмæ сæ балцы рæстæджы бабæрæг кодтой Знауыры районы Уисты цæрæн пункт, цыран абоны онг дæр ист нæма æрцыд гуырдзиаг полициæгты пост.

Брифинджы рæстæджы информацион фæрæзтæн дискусситы хуссарирыстойнаг делегацийы сæргълæууæг Джиоты Мурат куыд радзырдта, уымæ гæсгæ фæсарæйнаг организациты минæвæрттæ фембæлдысты бынæттон цæрджытимæ. Уыдон стыр æнæразыдзинад равдыстой хъæумæ хæстæг цы гуырдзиаг пост æвæрд æрцыд, уый фæдыл.

«Мах æмсæрдæрттæн фенын кодтам, хуссарирыстойнаг хъæумæ куыд æввахс у гуырдзиаг пост æмæ гуырдзиаг хъæу Чорчонамæ та цас дарддæр у.

Уый тыххæй бынæттон цæрджытæ ацы факты фæдыл равдыстой сæ тыхстдзинад. Æмæ делегацийы уæнгтæ та райстой ахсджиаг информаци ахъуыды кæнынæн, цæмæй Женевæйы процесс фæактивондæр уа», – загъта Джиоты Мурат.

Уый ма куыд загъта, уымæ гæсгæ æмсæрдæрттæн бынæттон цæрджытæ фенын кодтой сæ хæдзæрттæ, сæ хиуæтты цæрæн бынæттæ. Уырдæм уыдонæн сæ бон нæу бацæуын, уымæн æмæ дзы гуырдзиаг пост æвæрд ис, стæй æдзух тасы бын сты, уымæн æмæ дзы арæх хъуысы æхсæнгæрзты æхстыты хъæр.

«Тыхæй пайда кæй нал æрцæудзæн, уыцы документыл бакусыны тыххæй мах банысан кодтам нæ позици. Æнæразыдзинад равдыстам уый тыххæй дæр æмæ раундтæ, практикон æгъдауæй фæстиуæгджын кæй не сты. Раразмæ кодтам къорд хъуыдытæ, кæцытæ фæахъаз уыдзысты Женевæйы радон раунды эффективон куыстæн. Уый фæдыл хуссарирыстойнаг фарс хъуамæ бакуса дискусситы фæлгæтты ацы документ бацæттæ кæныны фадæттыл», – загъта Джиоты Мурат.

Ивгъуыд азты ацы ахсджиаг фарсты тыххæй арæзт æрцыд цалдæр æнæмæнгхъæуæг къахдзæфы. 2010 азы Хуссар Ирыстон, Абхаз æмæ Гуырдзыстоны президенттæ ИНО-мæ сарæзтой иуфарсон хъусынгæнинæгтæ, ома, кæй сты тыхæй пайда кæй нал æрцæудзæн, уыцы принципыл хæст. Фæлæ Гуырдзыстоны хъусынгæнинаджы нæдæр Хуссар Ирыстоны, нæдæр Абхазы кой уыдис. Уымæ гæсгæ хуссарирыстойнаг фарс банысан кодта, ацы къахдзæфтæ ахсджиаг кæй сты æмæ сæ хъæуы бафидар кæнын юридикон æгъдауæй, цæмæй документæн уа фидар дунеон гарантитæ.

Джиоты Мураты ныхæстæм гæсгæ 2018 азы ацы документыл куыст æрнымæг, æмæ уый фæдыл æмсæрдæрттæ бавдыстой сæ фæндæттæ.  Цы документ бавдыстой, уый сæ хъуыдымæ гæсгæ, арæнтæм æввахс районты кæнæ бæрæг бынæтты æдасдзинады зонæтæ аразы. Уый, кæй зæгъын æй хъæуы, юридикон бæрнджын документыл бакусыны фæндонмæ къахдзæф у, фæлæ æдасдзинадыл бæрæг бынатæй хъуамæ райдайа куыст.

«Махæн дыууæ азы дæргъы уыцы бынат у Уисты хъæуы уавæр. Уырдыгæй гуырдзиаг пост сисыны фæстæ гæнæн ис дзурæн æдасдзинады тыххæй арæнты æндæр бынæттыл, уымæйдæр, хынцыд хъуамæ цæуа Хуссар Ирыстон æмæ Гуырдзыстоны æхсæн арæнтæ æцæгдæр кæуылты цæуынц, уый», – банысан кодта Джиоты Мурат.

Нæ уацх.