Уæрæсейы Федерацийы Мидхъуыддæгты министрады хаххыл Краснодары университеты уагъд æрцыд цытджын мадзал – радон хатт та рафæндараст кодтой рауагъдонты ахуырадон уагдонæй. Æдæппæт рауагъдонты нымæц уыд 419 æмæ сын университеты сæргълæууæджы бардзырдмæ гæсгæ лæвæрд æрцыд «полицийы лейтенант»-ы нæмттæ. Уыдоны нымæцы уыдысты хуссарирыстойнаг курсанттæ дæр фондзæй, кæцытæ баисты дипломты хицæуттæ ахæм дæсныйадæй – «Правовое обеспечение национальной безопасности». Уыдонæн та лæвæрд æрцыдис «милицийы лейтенант»-ы нæмттæ.
Рауагъдонтæ уæлдæр ахуыргæнæндон æнтыстджынæй каст кæй фесты, уый фæдыл сæ схорзæхджын кæнын æмæ сын дипломтæ радтыны цытджын мадзалмæ фæуазæг ис бирæ уазджытæ, куыд УФ-йы Мидхъуыддæгты министрады централон æмæ регионалон аппараттæй, афтæ æндæр тыхон структурæтæй дæр. Уазджыты ‘хсæн уыдысты нæ республикæйы Мидхъуыддæгты министр ми-лицийы булкъон Гæззаты Валери æмæ барадон ифтонгад æмæ æхсæнадæмон æмгуысткæнынады управленийы сæргълæууæг, милицийы булкъон Сиу-къаты Артур. Гæззаты Валери хуссарирыстойнаг рауагъдонтæн ракодта зæрдиаг арфæтæ ахæм кадджын ахуыргæнæндоны къæсæртæй сæрбæрзондæй кæй хизынц, уый тыххæй, æмæ йæ бафæндыд, цæмæй дарддæр дæр сæ царды æмæ службæйы уой æнтыстджын.
Ацы аз УФ-йы Мидхъуыддæг-ты министрады уæлдæр ахуыргæнæндæттæ Хуссар Ирыстонæй каст фесты 20 курсанты. Фондзæй уал дзы, Краснодары университеты абитуриенттæ, райстой сæ дипломтæ. Иннæ 15 рауагъдонæн дæр, æввахс бонты, уыдзæнис дипломтæ раттыны цытджын мадзал. Уыдон сты Волгограды академийæ, Во-ронежы институтæй æмæ Ростовы юридикон институтæй.
Мидхъуыддæгты министрады хаххыл Уæрæсейы уæлдæр ахуыргæнæндæттæм нæ республикæйæ курсанттæ æрвитыны фадат фæцис 2009 азæй фæстæмæ, ома хæстон архайдтытæ фæуыны фæстæ. Уæдæй ныры онг 300 адæймагæй фылдæр æрвыст æрцыдысты ахуырмæ æмæ сæ фылдæр ныридæгæн службæ кæнынц Хуссар Ирыстоны барадхъахъхъæнæг органты.
ДЖИОТЫ Алыксандр
Comments are closed, but trackbacks and pingbacks are open.