Плиты Феликс/ ДУНЕОН ИРОН

Къоста! Дæу нын Хуыцау кæй радта,

Уый уыд рæсты-бæсты хæрзæг:

Дæ фæзынд рох Иры æрцардта, –

Ысдæ йын номгæнæг-фæтæг!..

 

Дæуæй дæ уды цардамалмæ

Æркæсын уымæн фæци рох,

Кæй уыд дæ ралæгæй адзалмæ

Æхсæндзарды срастыл дæ тох.

 

Дæ бæллиц  ахæм: царды ма уа

Иу барджын, иннæ та ыссæст, –

Тæрхоны лæгты-иу æндава

Сæ дарæг дзыллæты хъысмæт…

 

Кæны дæ фарны хъæр уæрæхдæр,

Дæ тох куы банымæг, уæдæй, –

Зæрдæйау баризы къæдзæх дæр

Дæ зарæг-хъарæджы зæлтæй.

 

Ды та æнхъæл уыдтæ: дæ фæстæ

Уыдзысты рох дæ цырт, дæ дзырд…

Цæй рох? Дæ цырт – нæ разы уæртæ,

Дæ дзырд та зæххалварс æрзылд!..

 

Къоста! Дæ радтæг ам дæ хуызæн

Дыккаг нæма радта, уый зон.

Мах уарзæм дæу æгæрон уымæн,

Кæй нын дæ Дунеон Ирон!