«Мах дуг» мыхуыр кæны

Мыхуыры рацыд журнал «Мах дуг»-ы радон 2-æм номыр.

Журнал байгом РЦИ-Аланийы Парламенты депутат Уататы Зелимы «Æмдугоны хъуыдытæ»-йы.

«Фæлæ, уæддæр, фыдыбæстæ, дæуæн æмбал кæм и…» ахæм сæргонды бын мыхуыр æрцыд Сæрмагонд æфсæддон опе-рацийы хайадисджытæ – медицинон службæйы булкъон, УФ-йы Национ гвардийы Ростовы 1-аг æфсæддон госпиталы хицау Багаты Олег, медицинон службæйы дæлбулкъон Махъоты Хазби æмæ æфсæддон Куыдзеты Романы хъуыдытæ.

Малиты Васойы райгуырдыл сæххæст 85 азы. Уый цытæн журнал мыхуыр кæны Хуыгаты Сергей, Гусалты Барис, Скъодтаты Эльбрус æмæ Колыты Виталийы мысинæгтæ. Мыхуыр ма цæуынц Васойы æмдзæвгæты цикл «Сахуыр мæ кæн, о хуымгæнæг, хоры кæндыл зарын…» æмæ радзырд «Æртæ æмбалы».

«Нæ разагъды лæгтæ», зæгъгæ, ацы рубрикæйы бын мыхуыр æрцыд ирон литературæйы курдиатджын минæвар, поэт, прозаик, ахуыргæнæг, хæххæн инженер, æхсæнадон кусæг, зынгзæрдæ патриот Гаглойты Несторы фырт Рутены биографи цыбырæй. Йæ райгуырдыл æххæст кæны 135 азы. Журналкæсæг ма бакæсдзæн Гаглойты Рутены радзырдтæ «Цард» æмæ «Намыс».

Рубрикæ «Поэзи æмæ прозæ»-йы бын мыхуыр цæуынц Ирдигор Макийы æмдзæвгæты цикл «Фæцæр хæрзудæй адæмы ʻхсæн» æмæ Цомартаты Изæтбегы роман «Зынгхуыст бæллицтæ», 3-аг чиныг (дарддæр).

«Мах дуг»-ы равдыст» нæ зонгæ кæны, Уæрæсейы нывгæн-джыты цæдисы уæнг, РЦИ-Аланийы сгуыхт нывгæнæг Кокайты Валерийы куыстытимæ.

Журнал ма мыхуыр кæны «Ирон фысджытæ райгуырæн бæстæйы тыххæй».

Рубрикæ «Хъæлдзæг хабæрттæ»-йы бын мыхуыр цæуы Кучиты Русланы «Ахудæнтæ».

Мыхуыр ма цæуы «Ирон фысджытæ райгуырæн бæстæйы тыххæй».

«Нæ уидæгтæ», зæгъгæ, ацы рубрикæйы бын журналкæсæг бакæсдзæн Мурасты Риммæй уац «Æнусы æмгар», Кировы хъæуы 100 азы кадæн.

Журнал ма мыхуыр кæны «Мæйы цаутыл афæлгæст» дæр.

Нæ уацх.