«МАХ ДУГ» МЫХУЫР КÆНЫ

Мыхуырæй рацыд литературон-аивадон æмæ æхсæнадон-политикон æрвылмæйон журнал «Мах дуг»-ы радон 6-æм номыр.

Прозæйы жанрæйы журнал мыхуыр кæны фыссæг, прозаик Дауыраты Дамиры «Радзырдтæ – æцæг хабæрттæ», афтæ ма Джимиты Кларæйы уацау «Залиханы фырт» (Кæрон. Райдайæн журналы 5-æм номыры).

Поэзийæ журнал мыхуыр кæны Къибирты Амирханы æмдзæвгæтæ.

Рубрикæ «Аивад, культурæ»-йы бын мыхуыр цæуы интервью «Ахорæнты минмырон хуызтæ». Уæрæсейы Федерацийы æмæ РЦИ-Аланийы сгуыхт нывгæнæг,  УФ-йы Нывгæнджыты Цæдисы уæнг, РЦИ-Аланийы гербы автор, профессор Джыккайты Федыры фырт Муратимæ ныхас кодта Хетæгкаты Оксанæ.

Джыккайты Мураты райгуырдыл 75 азы сæххæсты цытæн, рубрикæ «Мах дуг»-ы равдыст» журналкæсджыты зонгæ кæны Джыккайты Мураты конд нывтимæ.

Хъантемыраты Римæйы уац «Адæймаджы фæд» æмæ Мамытты Стефаны радзырд «Косе» мыхуыр æрцыдысты рубрикæ «Аланийыл саргъуыды 1100 азы бонмæ»-йы бынмæ.

«Публицистикæ», зæгъгæ, ахæм рубрикæйы бын мыхуыр цæ-уынц Хестанты Победæйы очерк «Дзулласæг» æмæ Гусалты Барисы этюдтæ «Уыгæрдтæ».

Журнал ма мыхуыр кæны Плиты Гацыры уац «Литературон фæлгонцтæ æмæ сæ нысаниуæг».

Гаглойты Анатолийы æмдзæвгæты цикл «Хур йæ тынтæ уары» мыхуыр цæуы рубрикæ «Бакæсæм нæ хурты хуртæн»-ы бынмæ.

Рубрикæ «Хъæлдзæг хабæрттæ», зæгъгæ, мыхуыр кæны «Хæларзæрдæ, цыргъзонд Дзибис» (Кæрон. Райдайæн 4-æм номыры).

Поэт, прозаик, публицист, тæлмацгæнæг, æхсæнадон архайæг Хъодалаты Герсаны амæлæты охыл тæфæрфæс кæнынц журнал «Мах дуг»-ы кусджытæ.

Журнал ма мыхуыр кæны «Мæйы цаутыл афæлгæст» дæр.

Нæ уацх.