Уæрæсейы Федерацийы ‘рдыгæй Хуссар Ирыстоны хæдбардзинад банымайыны боныл 15 азы сæххæсты цытæн уагъд æрцыд марафон лидзынæй. Сорганизаци йæ кодта Фæсивæдон политикæ æмæ спорты фæдыл комитет. Хайад дзы райстой 52 адæймаджы – 10 сылгоймаджы æмæ 42 нæлгоймаджы. Старт æмæ финиш дæр уагъд æрцыдысты Театралон фæзуаты. Нæлгоймæгты хъуыд 21 километры дистанци алидзын, сылгоймæгты дистанцийы дæргъ та уыд 12 километр æмæ 600 метры.
Фыццаг уал фæбæрг сты сылгоймæгты ‘хсæн ерысты уæлахиздзаутæ. Фыццаг бынат бацахста æмæ РХИ-йы президенты номæй 50 мин сомæй хорзæхджын æрцыд Анна Хуторная, дыккаг ссис Бекъойты Александрæ æмæ йын лæвæрд æрцыд 30 мин сомы. Æртыккаг бынатыл та ацыд æмæ 20 мин сомы райста Икъаты Миленæ.
Банысан кæнын хъæуы уый дæр, æмæ Анна Хуторная Хуссар Ирыстонмæ кæй æрцыд экскурсийы, фæлæ марафоны тыххæй куы фехъуыста, уæд сфæнд кодта хайад дзы райсын.
Нæлгоймæгты ‘хсæн иууыл цæттæдæр разынд Наниты Альберт, дыккаг бынат бацахста Багаты Арсен æмæ æртыккаг та ссис Дзеранты Георги. Уыдон дæр президенты номæй райстой æхцайы премитæ – 50, 30 æмæ 20 мин сомы.
Кады грамотæтæй хорзæхджын æр-цыдысты марафоны иууыл æвзонгдæр хайадисæг, 9-аздзыд Тадтаты Давид æмæ иууыл кардзыддæр хайадисæг – 50-аздзыд Гæбæраты Гоча, уый ерысты хайад райсыны тыххæй сæрмагондæй Хуссар Ирыстонмæ æрцыд РЦИ-Аланийæ.
Мадзал рауад цымыдисон. Марафоны хайадисджытæ æмæ Театралон фæзуатмæ æрбацæуджытæ ерыстæй райстой æхцондзинад.
Хуриты Батрадз
