Ирон музыкæйы зæрингуырд у Галаты Алыксандры фырт Барис. Адæймаг дисы бахауы, ахæм æгæрон фæллæйттæ бакусын æмæ сæ дзыллæты рæгъмæ рахæссын иу адæймаджы бон куыд баци. Уый райгуырд Терчы хъазахъхъаг æфсæдты станицæ Черноярскæйы. Бынтон æрыгон уыд, афтæ амард йæ фыд æмæ ацыд Бетъырбухмæ йæ фыдыæфсымæрмæ, уым ахуыр кæнын райдыдта реалон ахуыргæнæндоны. Уыцы рæстæджы курдиатджын лæппуйыл йæ цæст æрæвæрдта Н. А. Римский-Корсаков æмæ йын бамбарын кодта, цæмæй музыкæйы фæндаг равзара йæ сомбоны цардæн. Фæлæ бæрæг аххосæгтæм гæсгæ фæстæдæр ахуыр райдыдта Тифлисы æфсæддон ахуыргæнæндоны. Каст æй куы фæци, уæд иу азы фæстæ райдыдта фыццаг дунеон хæст æмæ ацыд фронтмæ æмæ фыдгулæн лæвæрдта аккаг ныхкъуырд. Хъæбатыр хæстоны сгуыхтдзинадæн æрцыд аккаг аргъ æмæ хорзæхджын æрцыд Сыгъдæг Станиславы 3-аг къæпхæны орден æмæ Сыгъдæг Аннæйы 4-æм къæпхæны орден «Хъæбатырдзинады тыххæй»-йæ, стæй ма æндæр хорзæхтæй. Карз тохты фæ-цæф дыууæ хатты, фæлæ та-иу уæддæр фæстæмæ йæ полкъмæ æрбаз-дæхт. Уый фæстæ Галайы фырт æппæт йæ цард æмæ куыст снывонд код-та музыкæйæн æмæ, зæгъæн ис, кæй у Хуссар Ирыстоны профессионалон музыкæйы фыццаг. Йæ æвæллайгæ фæллойы фæстиуæгæн æрæмбырд кодта æмæ сæ мыхуыры рауагъта хи-цæн чиныгæй, цыран сты ирон адæмон зарджытæ æмæ мелодитæ. Æмт-кæй та æрæмбырд кодта 510 ирон за-рæг æмæ кафты цагъдæй фылдæр. Хуссар Ирыстоны Галайы фырты хъæппæрисæй сырæзт æмæ байгом фыццаг музыкалон скъола, сарæзта фыццаг музыкалон оркестр, зард æмæ кафты паддзахадон ансамбль «Симд», уыд фыццаг ирон музыкалон этнограф æмæ композитор.
Галаты Барисы æгæрон лæггæдтæ рох не сты йæ радтæг адæмæй æмæ йын кæддæриддæр мысдзысты йæ ном. Ацы хъуыддагыл æвæллайгæ фыдæбон кæнынц йæ æввахс хиуæттæй Гаглойты Лианæ æмæ Гæбæраты Андрей. Зæгъæн ис, æмæ ацы дыууæ адæймагæн нæй æрæнцой, æдзух-дæр сты куысты лæуд æмæ сын саразын дæр дзæвгар бантыст. Фæлæ сæм уый фаг нæ кæсы æмæ дарддæр архайынц стыр гоймаджы цард æмæ сфæлдыстад тынгдæр рапарахат кæ-ныныл. Æнгом бастдзинæдтæ æмæ ахастытæ сын ис Барисы райгуырæн Черноярскæйы станицæйы йæ хиуæттæ æмæ интеллигенцийы минæвæрттимæ. Сæхи рады станицæйы цæр-джытæ дæр архайынц се ‘мзæххоны цард æмæ архайд сомбоны кæстæртæн ноджы лæмбынæгдæр базоныны тыххæй. Уый тыххæй сæ фæндон у Галайы фырты райгуырæн станицæйы музей бакæнын æмæ уый та уыдзæн раздæры скъолайы агъуысты. Сæ фæндон раргом кæныны тыххæй æрæджы ауагътой æмбырд æмæ уырдæм фæхуыдтой Андрей æмæ Лианæйы дæр. Уым ирон музыкæйы стыр дæсныйы тыххæй æрдзырдтой интеллигенцийы минæвæрттæ, йæ хиуæттæ æмæ хæстæджытæ. Йæхи рады ацы ахсджиаг цауы тыххæй йæ хъуыдытæ загъта Гаглойты Лианæ дæр æмæ банысан кодта, уый иттæг хорз æмæ ахсджиаг цау кæй уыдзæн. Махмæ, Цхинвалы горæты Галаты Барисæн дæр ис хæдзар-музей, фæлæ у тынг къуындæг æмæ дзы æппæт экспонаттæн нæй равæрæн, бацæуджытæ семæ нæ базонгæ уыдзысты æххæстæй.
Хуыбиаты Никъала
Comments are closed, but trackbacks and pingbacks are open.