Тыбылты Алыксандры номыл Хуссар Ирыстоны паддзахадон университеты презентаци уыд «Ирон Нартиадæйы энциклопеди»-йы коллективон куыстæн. Проекты автор æмæ кусæг къорды къухдариуæггæнæг у Республикæ Хуссар Ирыстоны фыццаг Президент, зындгонд кавказзонæг, профессор, Абайты Вассойы номыл Цæгат Ирыстоны гуманитарон æмæ социалон иртасæн институты Этнологийы хайады сæргълæууæг, историон зонæдты доктор, Уæрæсейы Федерацийы зонæдты сгуыхт архайæг Цыбырты Людвиг.
Презентацийы хайад райста РХИ-йы Хицауады Сæрдар Джуссойты Константин.
Уый куыд банысан кодта, афтæмæй «проект у уникалон. Уымæн æрмæст Фыдыбæстæйон нысаниуæг нæй, фæлæ йын дунеон зонады дæр стыр нысаниуæг ис. Цытджын Цыбырты Людвиджы сæргълæудæй дæсгай ахуыргæндты фæллой энциклопедимæ бацыдысты, нартзонынады фадыджы цы куыстытæ бакондæуыд, уыдон се ‘ппæт дæр. Уый стыр хайбавæрд у дунеон зонад æмæ культурæмæ.
Уырны мæ, ацы энциклопеди æрмæст ирон æвзаджы дæснытæн нæ, фæлæ Нартиадимæ, Ирыстоны историмæ, йæ традицитæ æмæ культурæмæ чи цымыдис кæны, æппæт уыдонæн дæр кæй уыдзæн се ‘рвылбонон чиныг».
Джуссойты Константин раарфæ кодта Цыбырты Людвиг æмæ ахуыргæндты æппæт коллективæн гуырахстджын æмæ вазыгджын проекты реализацийы тыххæй. Загъта сын фидар æнæниздзинады, æвидигæ энергийы æмæ Фыдыбæстæйон зонадæн дарддæры æнтыстджын лæггæдты фæндиæгтæ.
Бæрæг куыд у, афтæмæй Ирыстоны ахуыргæндтæй дарддæр энциклопедийыл куыстой Уæрæсейы федералон æмæ æввахс фæсарæнты зонадон организацитæй 50 ахуыргонды. Уыдон уыдысты фольклористтæ, æвзагзонджытæ, литературæзонджытæ, философтæ, археологтæ, историктæ, этнографтæ. Уыдон ацы æртæтомон энциклопедийыл фыдæбон кодтой æхсæз азы дæргъы.
