Газификаци – экономикæйы рæзтæн ахъазгæнæг

Куыд зонæм, афтæмæй республикæйы экономикæйы рæзтыл дзурæн нæй æнæ газотранспортон инфраструктурæйы рæзтæй. Æрæджы нæ бæстæйы сæргълæууæг журналисттимæ пресс-конференцийы рæстæджы, æхсызгонæй фехъусын кодта, иууыл æввахсдæр рæстæджы нæ республикæмæ кæй æрцæудзысты Уæрæсейы «Газпром»-ы минæвæрттæ æмæ кæй бавналдзысты газотранспортон куыстытæм. Сразыдзинад къухты бафтыд, Уæрæсейы Федераци æмæ акционерон æхсæнад «Газпром» æмбаргæ ахаст кæй æвдисынц Хуссар Ирыстоны дарддæры райрæзтмæ.

Ивгъуыд аз Бибылты Анатоли æмæ УФ-йы «Газпром»-ы сæргълæууæг Алексей Миллеры фембæлды рæстæджы дæр ныхас цыд ацы фарстыл.

Зæгъын хъæуы уый, æмæ раздæр азты дæр арæзт цыд бæрæг къахдзæфтæ ацы фæдыздæхты. Зæгъæм, 2013-2014 азтæн Инвестпрограммæйы нæ республикæйы районтæ æмæ хъæуты газификаци кæныны нысанæн рахицæнчындæуыд 90 милуан сомы.

Фæлæ Æхсæнхицауадон къамисы рабадты ацы æхцайы фæрæзты аздæхтой фыццаградон социалон проекттæм, сæрмагондæй та æндидзынгæнæн куыстытæ æххæст кæнынмæ. Уæды республи-кæйы разамынад, фарсты актуалондзинад æмбаргæйæ, агуырдта альтернативон фæндæгтæ газификацийы фарстатæ аскъуыддзаг кæныны тыххæй. УФ-йы «Газпром»-имæ нæ республикæйы цы газуадзæн хахх «Дзуарыхъæу-Цхинвал» арæзт æрцыд, бадзырдæуыд, цæмæй хъæууон бынæтты дæр арæзт æрцæуа газы хызæгтæ. Уæрæсейæ æрцыдысты специалисттæ æмæ уыдоны фæрцы бынаты арæзт цыд проектон-сметæйон документацитæ. Арæзт æрцыд цалдæр варианты: «Цхинвал-Тъбет», «Цхинвал-Къостайы-хъæу», «Цхинвал-Дзау» æмæ а.д. Фæлæ цæмæй æгас республикæ газификаци æрцыдаид, уый тыххæй та хъуыд «Газпром-Хуссар Ирыстон»-ы куыстуаты æххæстбартæ рауæрæх кæнын. Ома, уый тыххæй хъуамæ ацы куыстуат йæхимæ райстаид республикæйы газификаци кæныны фæдыл сæйраг закъазгæнæджы, аразæджы æмæ эксплуатацигæнæджы функцитæ.

Дыууæ фарсты бадзырдтыты фæстиуæгæн хуыздæрыл банымадтой, уыцы куыстытæ кæй ба-кæндзæн «Дзуарыхъæу-Цхинвал»-ы газуадзæн хаххы аразæг куыстуат. Арæзт æрцыд генералон схемæ дæр.

Уымæ гæсгæ газификаци райдайдзæнис Ленингоры районæй. Ацы район нæ республикæйæн нымад у спецификоныл æмæ уал магистралон газы хахх фыццаг ацæудзæнис уырдæм. Уый фæстæ цадæггай, схемæмæ гæсгæ газификаци æрцæудзысты республикæйы цæрæн пункттæ. Уымæй дарддæр бакусдзысты «Газпром-Телеком»-ы оптиком фæскъауон хызæджы эксплуатацийы фарстытыл дæр, кæцы баххуыс кæндзæн интернет бастдзинады фæдыл лæггæдтæ фæхуыздæр кæнынæн æмæ ратдзæн уæлæмхас коммуникацион фадæттæ.

Нæ уацх.