Куыстуæттыл дзырд куы цæуа, уæд уыдонæй та иууыл фылдæр æфтиæгтæ бюджетмæ хæссынц арæнгонд бæрндзинады æхсæнад «Газпром Трансгаз Севастополь» – Цхинвалы цалцæггæнæн-эксплуатацион пункт. 9 мæймæ ацы компани бюджетмæ фиддонтæ бафыста 236 милуан 69 мин сомы. Æхгæд акционерон æхсæнад «Остелеком» та – 76 милуан 304 сомы. Дарддæр цæуынц гом акционерон æхсæнад «БТК-4»-йы Цхинвалы хуыйæн фабрикæ (34 милуан 258 мин сомы), паддзахадон унитарон куыстуат «Энергоресурс-Хуссар Ирыстон» (19 милуан 489 мин сомы) æмæ паддзахадон унитарон куыстуат «Дорэкс-построй (17 милуан 256 мин сомы).
Æдæппæт та бюджетмæ 9 мæйы дæргъы фиддонтæй цы æфтиæгтæ бацыдис, уыдон ивгъуыд азы уыцы рæстæгимæ абаргæйæ уыдысты 43 милуан 739 мин сомы фылдæр. Комитеты сæрдар куыд зæгъы, афтæмæй азы дæргъы паддзахадон бюджетмæ хъуамæ мобилизаци æрцæуа 1 миллиард 11,8 милуан сомы. Ахæм хæс æвæрд ис комитеты раз.
Фиддонтæй исгæ æфтиæгтæ азæй азмæ кæй рæздзысты, кæй фылдæр кæндзысты, уымæй ныфс ис Къадзы фырты. Нырма Æрдзон ресурстæй пайдагæнджытæ – карьерты, хъæдфадæн цехты æмæ æндæр куыстуæтты хицæуттæ, куыд æмбæлы, афтæ нæ фидынц фиддонтæ. «Мах прокуратурæйы кусджытимæ кусæм уавæр рараст кæныныл. Уадзæм рейдон мадзæлттæ, æрдзон ресурстæй пайдагæнджыты бахæсджын кодтам, цæмæй закъондæттынадмæ гæсгæ сæвæрой кассæйон аппараттæ.
Комитеты кусджытæ æрмæст ацы аз рабæрæг кодтой, фиддонтæ фидынæй хи тыллиф кæныны 80 цауæй фылдæр, кæцытæн сæ иумæйаг бæрц у 5 милуан 535 мин сомы бæрц. Къадзты Владимир куыд зæгъы, афтæмæй уыдонæн сæ хъуыддæгтæ лæвæрд æрцыдысты тæрхондонмæ, цæмæй сæ бахæссой къазнамæ. Уыимæ ма æмбæлон æмбарынгæнæн куыст цæуы комитеты кусджыты æхсæн дæр, цæмæй хъахъхъæд цæуа фæллойадон дисциплинæ, бынат ма уа цахæмфæнды фыдаудæн, фыдракæндон архайдæн дæр. Æмæ, зæгъгæ, кæд искæцы кусæджы ахæм архайдмæ зæрдæ фехсайы, уæд сæ бон у, æрбацæуой нæм комитетмæ, кæнæ та нæм æрбадзурой телефонæй, контактон зонæнтæ сты нæ сайтыл дæр.
Комитетмæ бацæуæн ис æрмæст хъасты фæдыл нæ, фæлæ æмбæ-лон консультаци райсыны фæдыл дæр.
Афтæ, æмæ ныридæгæн бæрæг ивындзинæдтæ ис хуыздæрæрдæм. Цæвиттон, кæд ивгъуыд аз ацы категорийы хъалонфидджытæ бюджет-мæ бахастой 1 милуан 74 мин сомы, уæд ацы аз та 9 мæймæ бахастой 1 милуан 347 мин сомы. Куыд ма загътон, афтæмæй хицæн физикон æмæ юридикон цæсгæмттæ дæр, куыд æмбæлы, афтæ, кæнæ та бынтон-дæр нæ фидынц сæ фиддонтæ. Ацы здæхты мах активонæй кусæм. Уымæй дарддæр ма нæ экономикæ рæзы, фæзынынц ног куыстуæттæ, рæзынц амалиуæггæнджыты æфтиæгтæ, æмæ уыдон дæр ахъаз кæндзысты фиддонты бæрц фылдæр кæнынæн», – зæгъы Къадзты Владимир.
Алцы дæр куы зынаргъ кæны, уыцы рæстæджы фиддонтæ фылдæр кæндзысты æви нæ, уый тыххæй комитеты сæрдар фидарæй загъта, ацы аз дæр æмæ фидæн азы дæр, уыдон нæ фылдæр кæндзысты, фæлæ, зæгъгæ, бæрæг ивындзинæдтæ хаст æрцæудзæн фиддонон закъондæттынадмæ, цæмæй чысыл бизнесы фылдæр субъекттæн сæ бон уа пайда кæнын фиддон æвæрыны фæхуымæтæгдæргонд системæйæ. Ахæм системæйы нысан сты хуыздæр уавæртæ чысыл бизнесæн. Цæвиттон, сæрибар цæудзысты уæлæмхас аргъыл фиддонæй, кæцыйы бæрц у 6 процентæй 10 процентмæ. Ныртæккæ фиддон æвæрыны фæхуымæтæгдæр системæйæ сæ бон пайда кæнын у æрмæстдæр уыцы хæдзариуæггæнæг субъекттæн, кæцытæн сæ афæдзы æфтиагæй пайда нæй 4,5 милуан сомæй фылдæр, чи дзы кусынц, уыдон та 10 адæймагæй фылдæр не сты. Цæмæй чысыл бизнесы субъектты хæрдзтæ фæкъаддæр уой æмæ сын арæзт æрцæуа уæлæмхас хæрзвадат уавæртæ кусынæн, уый тыххæй нæ фæнды афæдзы æфтиагæй пайдайы бæрц æмæ ма кусджыты бæрц дæр фæфылдæр кæнын. Уæд чысыл бизнесы фылдæр субъекттæн бауыдзæн сæ бон фиддон æвæрыны фæхуымæтæгдæр системæмæ рахизын.
Владимир куыд загъта, афтæмæй комитеты специалисттæ ныридæгæн кусынц ацы фарстыл. Фæлæ, зæгъгæ, ам алцы дæр сбарын хъæуы раст. Чысыл бизнесы интерестæ ифтонг кæнгæйæ, нæй гæнæн паддзахадон бюджетмæ æфтиæгтæ фæкъаддæр кæнын. Лæмбынæг хъæуы ахъуыды кæнын æмæ куыд хуыздæр уыдзæн, афтæ саразын.
Æввахс рæстæджы комитеты куысты æрцæудзæнис ахсджиаг цау. Йæ кусджытæн Чиайы фырты уынджы арæзт фæуд кæны æртæуæладзыгон бæстыхай. Уый эксплуатацимæ лæвæрд æрцæудзæн ацы азы кæронмæ, кусæн хатæнтæ ифтонг æрцæудзысты нырыккон техникæйæ, уыдзæн дзы æппæт уавæртæ дæр кусынæн æмæ уый та, кæй зæгъын æй хъæуы, хуыздæрæрдæм бандавдзæн сæ куысты дарддæры фæстиуджытыл.
БЕСТАУТЫ Валя
Comments are closed, but trackbacks and pingbacks are open.