Газет «Южная Осетия» банысан кодта йæ 30 азы юбилей
Республикон ӕхсӕнадон-политикон газет «Южная Осетия»-йыл 30 азы сӕххӕсты цытӕн кино-концертон зал «Чермен»-ы уагъд ӕрцыд цытджын мадзал. Хайад дзы райстой бӕстӕйы разамынад Президент Гаглойты Аланы сӕргълӕудӕй, Хуссар Ирыстоны Уӕрӕсейы Федерацийы ӕххӕстбарджын минӕвар Марат Кулахметов, уазджытӕ ӕфсымӕрон Цӕгат Ирыстон ӕмӕ Абхазы Республикӕтӕй ӕмӕ ӕхсӕнады минӕвӕрттӕ.
Гаглойты Алан раарфӕ кодта газеты коллективӕн æмæ банысан кодта, зæгъгæ, «Южная Осетия»-йы фæрстыл æвдыст цæуынц республикæйы царды ахсджиаг цаутæ, Республикæ Хуссар Ирыстоны паддзахиуæгады рæзты æппæт этаптæ.
Æппæт ацы азты газеты сфæлдыстадон коллектив йæ разылæууæг хæстæ æххæст кæны профессионалонæй, адæмы размæ хæссы дырыс æмæ объективон информаци. Иууыл уæззаудæр азты, хæстон уавæрты уæ ныфсхаст æмæ удуæлдайдзинады руаджы нæ къухы бафтыд Ныгуылæны бæстæты информацион агентадты æрдыгæй деструктивон æндæвдады ныхмæ фæлæууын æмæ уæрæх дзыллæйадмæ объективон информаци хæссын.
Газеты кусынц сфæлдыстадон æмæ иузæрдион адæймæгтæ, кæцытæ тыхсынц сæ Райгуырæн бæстæйы хъысмæтыл. Уырны мæ, сымах дарддæр дæр уæ равзаргæ хъуыддаджы цæвиттон кæй æвдисдзыстут æгæрон лæггад æмæ профессионализмæй.
Ноджыдæр уын арфæ кæнын уæ бæрæгбоны цытæн! Мæ зæрдæ уын зæгъы фидар æнæниздзинад, хорз ног хабæрттæ æмæ уæ банысангонд нысæнтты сæххæст кæнын», загъта Президент.
Уый ма арфӕйы ныхӕстӕ загъта Хуссар Ирыстоны дзыллон информацийы фӕрӕзты минӕвӕрттӕн 23 июлы сӕ профессионалон бӕрӕгбон кӕй нысан кодтой, уый тыххӕй.
Бӕрӕгбон хорзӕхтӕй фидауы, Президенты Барамындӕй республикон ӕхсӕнадон-политикон газет «Южная Осетия» йӕ ӕнтыстджын куыст ӕмӕ йӕ рауагъдыл 30 азы сӕххӕсты цытӕн хорзӕхджын ӕрцыд Кады Орденӕй. Мадзалы рӕстӕджы ма Гаглойты Алан Хӕлардзинады Орденӕй схорзӕхджын кодта газет «Республика»-йы ӕхсӕнадон-политикон хайады редактор Коцты Ингӕйы, «Республикӕ Хуссар Ирыстоны Сгуыхт журналист»-ы кадджын ном паддзахады сӕргълӕууӕджы къухӕй райстой Информаци ӕмӕ мыхуыры комитеты сӕрдар Хъотайты Мария, газет «Южная Осетия»-йы уацхӕссӕг Уалыты Гугули, паддзахадон телерадиокомпани «Ир»-ы директоры фыццаг хӕдивӕг – сæйраг редактор Козаты Дзерассӕ, «Культурӕйы сгуыхт кусӕг»-ы кадджын ном та лӕ-вӕрд ӕрцыд журнал «Фидиуӕг»-ы корректор Гаглойты Мадинӕйӕн.
Газет «Южная Осетия»-йы сӕйраг редактор Цхуырбаты Залинӕ бузныг загъта мадзалы хайадисджытӕн, банысан кодта, абон фыццаджыдӕр кӕй у, газеты кусджыты бӕрӕгбон. Ацы бонты, зӕгъгӕ, нысан цыд дзыллон информацийы фӕрӕзты минӕвӕртты бон ӕмӕ уыцы боны цытӕн, ома фыццаг ирон газет рухс куы федта, ууыл 117 азы сӕххӕсты бонмӕ снысан кодтам мах дӕр нӕ бӕрӕгбон.
«Нӕ республикӕйы уырыссаг ныхас мыхуыры хуызы рацыд 30 азы размӕ нӕ, фӕлӕ 40 азы размӕ. Уый цыд газет «Советон Ирыстон»-ы халдихӕй. Уымӕй 10 азы фӕстӕ газет ссис сӕрмагонд рауагъдад, ӕмӕ 30 азы дӕргъы цӕры йӕхи сӕрмагонд цардӕй», – дзырдта Залинӕ.
Мадзалы хайадисджыты базонгӕ кодта йӕ фӕзынды райдиантӕ ӕмӕ рӕзты историимӕ. Сӕрмагондӕй банысан кодта газеты ветеранты хъазуатон куыст, уымӕн ӕмӕ уыдон сӕ цардӕн тӕссаг хӕстон уавӕрты тындзыдтой сӕ уарзон газет ӕмӕ коллективы ӕхсӕнмӕ.
Йӕ цӕст алкӕмӕн дӕр бауарзта бӕрӕгбоны дӕр ӕмӕ ӕрвылбонон царды дӕр хорз ӕмӕ позитивон хабӕрттӕ.
Информаци ӕмӕ мыхуыры паддзахадон комитеты сӕрдар Хъотайты Мария бӕрзонд аргъ скодта газеты редакцийы кусджыты куыстӕн. Ӕз, зӕгъгӕ, мӕхӕдӕг дӕр хӕрзӕвзонгӕй ӕрбацыдтӕн газетмӕ кусынмӕ, уымӕн ӕмӕ мӕ йӕхимӕ ӕлвӕста ацы куыст. Профессионалон ӕгъдауӕй рӕзтӕн газеты коллективы ӕхсӕн. Ныфсджынӕй мӕ бон зӕгъын у, 30 азы дӕргъы редакцийы коллективы профессионализм бӕрӕг у сӕ ӕнгомдзинад, кусынӕн хорз уавӕртӕ ӕмӕ дзы цы хорз атмосферӕ ис, уымӕй.
«Газеты редакци кусы ӕмӕ иу бинонты хуызӕн архайы бӕстӕйы хӕрзӕбонӕн. Газеты куыстмӕ ногдзинӕдтӕ хӕссынц ӕмӕ йын йӕ куыст удæгас кӕнынц, цы ӕвзонг кусджытӕ дзы ис, уыдон дæр. Фӕлӕ уӕддӕр ӕмӕ уӕддӕр газеты астӕумагъз кӕддӕриддӕр сты нӕ интеллигенцийы минӕвӕрттӕ», – банысан кодта комитеты сӕрдар.
Национ политикӕ, культурӕ, дин ӕмӕ дзыллон информацийы фӕрӕзты фӕдыл парламентон комитеты сӕрдар Дьякъонты Амираны ныхӕстӕм гӕсгӕ газет «Южная Осетия» рацыд ӕнтыстджын фӕндагыл, нӕ республикӕ гуырдзиаг тыхӕйисджыты ‘рдыгӕй геноцид куы ӕвзӕрста, уӕд хъахъхъӕдта ӕхсӕнад ӕмӕ паддзахады информацион ӕмӕ идеологон интерестӕ. Нӕ адӕм ӕмӕ бӕстӕйы цы процесстӕ цыд, уыдон тыххӕй рӕстаг информаци журналисттӕ хӕццӕ кодтой Хуссар Ирыстонӕй дарддӕр кӕсджытӕм. Хӕстон азты ӕмӕ уый фӕстӕ азты дӕр ацы мыхуыры фӕрӕз дарддӕр хъахъхъӕдта паддзахад ӕмӕ йӕ адӕмы идеологон интерестӕ ӕмӕ цӕрджытӕн лӕвӕрдта ӕмбӕлон информаци.
Парламентон комитеты сӕрдар арфӕ ракодта газеты редакци ӕмӕ мадзалы хайадисджытӕн, информацион тыгъдад уӕрӕх кӕныны хъуыддаджы информацион фӕрӕзты минӕвӕрттӕн йӕ цӕст бауарзта стыр ӕнтыстытӕ.
Холдинг «Апснымедиа»-йы генералон директор Роберт Джопуа йӕ арфӕйы ныхасы банысан кодта, зӕгъгӕ, газет у Республикӕ Хуссар Ирыстоны хӕдбардзинады ӕмбай, фӕлӕ уыцы рӕстӕг газеты коллектив республикӕйы адӕмимӕ иумӕ йӕ нырыккон историйы бавзӕрста бирӕ трагикон бонтӕ. Уыдонӕн рохгӕнӕн нӕй, баззайдзысты нӕ мысынады. Фӕлӕ нын разӕй – махӕн дӕр ӕмӕ ӕфсымӕрон Хуссар Ирыстонӕн дӕр – ис ӕрмӕстдӕр рухс фидӕн ӕмӕ уымӕ иумӕ тырндзыстӕм. Бӕрӕгбоны цытӕн йӕ коллегӕтӕн йӕ цӕст бауарзта ӕндидзынад, амондджын цард ӕмӕ ӕнӕниздзинады фӕндиӕгтӕ.
Журнал «Мах дуг» – редактор Хетӕгкаты Оксанӕйы ныхӕстӕм гӕсгӕ Ирыстоны дыууӕ хай абон цин кӕны ацы бӕрӕгбоныл. Газет у, адӕм цӕуыл тыхсынц, сӕ зӕрдӕйы цы сагъӕстӕ ис, уыдон хӕссӕг. Юбилей та у, арӕзт цы ӕрцыд ӕмӕ дарддӕр цӕуыл бакусын хъӕуы, уыдоныл ахъуыды кӕныны ӕхсызгон цау.
Газеты коллективӕн йӕ зӕрдӕ загъта, сӕ ивгъуыдӕй сӕ фидӕн хуыздӕр куыд уа ӕмӕ газеткӕсджытӕ та фылдæр куыд кӕной.
Цӕгат Ирыстоны газет «Северная Осетия»-йы сӕйраг редактор Битарты Маринӕ дæр йæ газеты коллективы номӕй арфӕ ракодта бӕрӕгбонгӕнджытӕн. Банысан кодта, газет «Южная Осетия»-йы чысыл, фӕлӕ хӕлар коллектив аккагӕй бӕрзонд кæй хӕссынц мыхуыры фӕрӕзы ӕмвӕзад. Уый, зӕгъгӕ, у нӕ зынаргъ коллегӕты курдиат ӕмӕ иузӕрдиондзинадыл дзурæг.
Газет «Хурзӕрин»-ы сӕйраг редактор Дамбегти Иринӕйы ныхӕстӕм гӕсгӕ ӕхсӕнадон-политикон газет «Южная Осетия» иумиаг газет у. Ацы газеты куыст ӕмӕ архайдимӕ, зӕгъгӕ, рагӕй зонгӕ дӕн.
«Газеты сӕргълӕууӕг Цхуырбаты Залинӕ у ӕнтыстджын ӕмӕ йӕ хъуыддаджы дӕсны. Уый ногӕй бангом кодта газеты куыстхъом коллектив. Мӕнӕн ӕхсызгон у нӕ редакциимӕ ӕнгомдзинад ӕмӕ уын мӕ зӕрдӕ зӕгъы, цӕмӕй уӕ ном дардыл айхъуыса. Уырыссаг ӕвзагыл мыхуыры фӕрӕзӕн бирӕ кæсджытӕ ис, уымӕн ӕмӕ уырыссаг дуне егъау у. Мах та, нӕ ирон дуне цӕмӕй уӕрӕхдӕр кӕна, ууыл кусдзыстӕм ӕмӕ архайдзыстӕм, ӕмдзу кӕндзыстӕм иумӕ, цӕмӕй нӕ Ирыстон ӕмӕ йӕ адӕм хорз хабӕрттӕ хъусой нӕ мыхуыры фӕрӕзты руаджы», – банысан кодта уый.
Уӕрӕсейы фысджыты ӕмӕ журналистты цӕдисы уӕнг, Цӕгат Ирыстоны культурӕйы сгуыхт кусӕг Касаты Батрадзы ныхӕстӕм гӕсгӕ «ацы азтӕ нырма чысыл сты уӕ сфӕлдыстады ӕмӕ сӕ ныфсджын ӕмӕ фидарӕй райдыдтат ӕмӕ уӕ дарддӕры фӕндаг рӕсугъддӕр куыд уа, Хуыцау уын ахӕм арфӕ ракӕнӕт». Газет «Рӕстдзинад»-ы коллектив ӕмӕ йӕ редактор Хозиты Барисы номӕй арфӕ ракодта юбилей нысангӕнджытӕн.
«Газет нырма ноггуырд у, ӕмӕ цы гуыргъахъхъ фӕндӕгтыл рацыдыстут, уыдон фӕстейӕ баззайӕт, уӕ дарддӕры фӕндаг та рӕсугъд ӕмӕ амондджын уӕт», – банысан кодта Батрадз.
Полиграфион-кондадон баиугӕнды директор Икъаты Мадинӕ куыд банысан кодта, уымӕ гӕсгӕ 30 азы дӕргъы газет рацыд аккаг ӕмӕ егъау царды фӕндагыл. Афӕлгӕст сарӕзта, уӕззау хӕстон азты цы фыдӕвзарӕнтӕ баййӕфтой, Хуссар Ирыстоны полиграфион кондад ӕмӕ мыхуыры фӕрӕзты кусджытæ – сӕ цардӕн тӕссаг уавӕрты куыстой ӕмӕ цӕттӕ кодтой ӕрмӕджытӕ мыхуырмӕ.
90-ӕм ӕмӕ 2008 азты хӕстон уӕззау уавӕрты дӕр не ‘рлӕууыд ацы мыхуыры фӕрӕзы куыст. Пырх бӕстыхӕйтты, дӕрӕн техникӕ, фӕлӕ кӕсӕгмӕ хӕццӕ кодтой фӕстаг хабӕрттӕ мыхуыры фӕрӕзтӕ. Уыцы уӕззау рӕстӕджытӕ ӕмӕ куысты уӕззау уавӕртыл рацыдыстӕм иумӕ ӕмӕ сфӕрӕзтам ӕппӕт дӕр.
Коллективӕн ӕнӕниздзинад, хӕрзиуджытӕ ӕмӕ ӕнтыстытӕ сӕ уӕззау куысты бауарзта йӕ цӕст полиграфион-кондадон баиугӕнды директорæн. Мадзалы райдианы йӕ хайадисджыты рӕгъмӕ хаст ӕрцыд документалон киноныв газеты рӕзт, йӕ коллективы куыст ӕмӕ историйы тыххӕй. Киноконцертон залы фойейы ма уыцы бон байгом фоторавдыст «Аланийы республикӕ газет «Южная Осетия»-йы редакцийы журналистты цӕстӕнгасӕй».
Бӕрӕгбонон мадзал рӕсугъд кодтой хуссарирыстойнаг эстрадӕйы стъалыты вокалон номыртӕ.
КЪÆБУЛТЫ Марина
