РХИ-йы Паддзахадон унитарон куыстуат «Энергоресурс Хуссар Ирыстон»-ы генералон директор Къæбысты Ацæмæз куыд фехъусын кодта, афтæмæй Уæрæсейы Федерацийы раз газ æмæ рухсæй нæ хæс у 1 миллиард сомы бæрц. «Газы фиддонты суммæ у 445 милуан сом, электроэнергийы хæс та 607 милуан сомы. 2017 азы дыууæ фарс сæ къухтæ бафыстой сразыдзинадыл, уым банысан кодтой сæ хæс кæй схызт 320 милуан соммæ. Уыцы суммæйæ 2018 азы республикæ бафыста æрмæст 128, 5 милуан со-мы. Ацы аз апрелы мæйы кæрон уыцы хæсæй фыст æрцæудзæн 45 милуан сомы», – зæгъы Къæбысты Ацæмæз.
Гендиректор ма радзырдта Хуссар Ирыстон æмæ Уæрæсейы Федерацийы ‘хсæн кæй фæнд кæнынц хæстæ бафидыны механизмы фæдыл бадзырдтæ саразын. Афтæ ма æрсидт республикæйы абоненттæ æмæ «Энергоресурс»-ы бæрны цы хъармгæнæнтæ ис, уыдонмæ, ома, бюджетон сферæйы уагдæттæ, иумæйаг ахуыргæнæндæттæ, рæвдауæндæттæ, министрадтæ æмæ ведомствотæм, цæмæй афоныл фидой газ æмæ электроэнерги.
Республикæйы цæрджытæй дæр бирæтæ газ æмæ электроэнергийы тыххæй фиддонтæ куыд æмбæлы, афтæ нæ фидынц. Газ æмæ рухсæй пайдагæнджыты фиддонтæ фондз мин сомæй фылдæр куы суой, уæд уыцы абонентты нæ алыг кæндзысты хаххытæй. Æнæнхъæлæджы абоненты, нæ алыг кæндзысты, цалынмæ развæлгъау контролер бафæдзæхса бинонты, уæдмæ. Сæ фиддонтæ æгæр кæй сбирæ сты, уый тыххæй сæм ратдзысты официалон гæххæтт. Уыцы хъусинагмæ гæсгæ абонентæн бар ис дыууæ мæйы æмгъуыдмæ фиддонтæ бафидынæн. Хъыгагæн, бирæтæн цалынмæ сæ газ æмæ электроэнерги нæ ахицæн кæнынц, уæды онг нæ батыхсынц æмæ нæ бафидынц сæ хæстæ. Иууыл хъыгаг та у, службæйы кусджытæ сæ куыст куы феххæст кæнынц, уæд сæм иуæй-иутæ лæбурын æмæ æртхъирæнтæ кæнын кæй райдайынц. Хуыздæр уаид, цалынмæ хицæн не ‘рцæуой ацы лæггæдтæй, уæдмæ цæрджытæ куы фи-диккой сæ фиддонтæ. Науæд инструкци куыд амоны, уымæ гæсгæ ногæй коммуникацитæм баиу кæнынæн абонентты, уæ-лæмхас æхца фидын бахъæудзæн.
Паддзахадон унитарон куыстуат «Энергоресурс»-ы генералон директор ма куыд зæгъы, афтæмæй газы æмæ рухсы хæтæлтæм æнæзакъонæй æвналæн нæй. Газы системæмæ æрмæстдæр лæмбынæгæй чи зоны, уый æм хъуамæ æвнала. Фæстаг рæстæджы цы стыр трагедитæ æрцыд нæ горæты, уыдонæн кæд нырма сæ официалон верситæ фидаргонд не сты, уæддæр сæ аххосаг уыд æнæзакъонæй хæтæлтæм кæй æвнæлдтой, кæй сæ иу фæхуынчъытæ кодтой, афтæмæй æмæ уырдыгæй сæхицæн газы системæ кæй у бауагътой. Бирæуæладзыгон хæдзæртты цæрджытæ дæр. Уыдонæн та сæ аххосаг у хъармгæнæн пецтæ æвæргæйæ вентиляцион фæздæгдзæуæнтæ раст кæй нæ ауадзынц.
УАЗÆГТЫ Марфа
