Цӕгат Ирыстоны

УÆЛАХИЗЫ  ХÆСТОНТÆН – АККАГ   АРГЪ

Битарты Вячеслав бæстон ранымадта, ветерантæн цы арæзт цæуы æмæ сæм бæрæгбонмæ цы фæндтæ ис, уый тыххæй. Куыд загъта, афтæмæй республикæйы ахадгæ социалон æххуыс исынц хæсты ветерантæ æмæ инвалидтæ, сæ идæдзтæ, фæс-чъылдымы фæллойгæнджытæ, куысты ветерантæ… æдæппæт – æхсæз мин адæйма-джы.

“Хъыгагæн, хæсты ветерантæн азæй- азмæ сæ нымæц къаддæр кæны. Махæн нæ хæс у сæ зæры бонтæ сын срæсугъд кæнæм. Ацы аз фатертæй сифтонг кæндзыстæм цыппар ветераны æмæ 39 хæстон идæдзы. Ахæмтæ ма рады лæууы 32 адæймаджы æмæ фидæнмæ райсдзысты. Фæлæ сын  æрмæст бæрæгбонты кад кæнын нæ хъæуы. Æдзухдæр нын хъуамæ æнкъарой нæ аудындзинад. Иунæг уысм дæр рох кæнын нæ хъæуы зындгонд лозунг: “Ничи ферох, ницы ферох”. Æз сидын Ирыстоны цæрджытæм: ма уадзут рохуаты æдзард хæстонты æфсымæрон ингæнты, мемориалты. Махæй алчи дæр хæсджын у, цæмæй уыдонмæ зила, кад кæна, абон ма дзы не ‘хсæн чи ис, уыдонæн”, – дзырдта Битарты Вячеслав. Уый ма фæсидт бынæттон телеуынынадмæ, цæ-мæй ацы бонты фылдæр æвдисой патриотон æмæ хæстон темæйыл классикон кино-нывтæ æмæ равдыстытæ, стæй ахуырадон уагдæтты разамонджытæм, цæмæй хæстон темæйыл фылдæр кæной хъомыладон куыст кæстæр фæлтæримæ.

Уæлахизы бонмæ республикæ куыд цæттæ кæны, уый тыххæй радзырдта Хицауады Сæрдары хæдивæг Азимова Иринæ:

“Стыр куыст цæуы, æгæрон патриотон нысаниуæг кæмæн ис, уыцы Æнæмæлгæ полкъ бацæттæ кæныныл, горæты уынгты æнæхъæн къуыри цæудзæн “Уæлахизы трамвай”, Беслæны ипподромы арæзт æрцæудзæн бæхты дугъ, уыдзæн нæм музейты хæсты темæимæ баст алыхуызон равдыстытæ, мемориалтыл сæвæрдзыстæм дидинджытæ, 9 майы та Битарты Вячеслав фембæлдзæн хæсты ветерантимæ”.

Республикæйы Ветеранты советы сæрдар Къаболаты Солтан ранымадта 58-æм æфсад йæхи Уæлахизы парадмæ куыд цæттæ кæны, цавæр техникæйæ архайдзæн, республикон комитет “Уæлахиз” цы сарæзта æмæ йæм цы ног фæндтæ ис æмæ бирæ æндæртæ. Уый фехъусын кодта Ирыстоны дзыллæты иумæйаг фæндон: фидæн аз, Уæлахизы юбилеймæ, Ирыстонæй Фыдыбæстæйы Стыр хæсты чи фæмард, уыдонæн иумæйаг мемориалон къæй сæвæрын сæ нæмттæ æмæ мыггæгтимæ.

Æмбырды архайджыты иумæйаг хъуыдымæ гæсгæ, ацы азы бæрæгбоны мадзæлттæ ивгъуыд азæй уыдзысты цымыдисагдæр. Уыдон суыдзысты хорз бындур фидæны 75 юбилейон бæрæгбоны мадзæлттæн…

Нӕ уацх.