Фæсивæды дунеон бон нæ республикæйы банысангонд æрцæуы уæрæхæй. Нæ фæсивæд сæ рæсугъд бæрæгбоны цытæн райсынц бирæ арфæйы ныхæстæ. Уыцы бон сæм уæлдай буц æмæ рæдау зæрдæйы æнкъарæнтæ равдисы хистæр фæлтæр дæр. Алы адæймагæн дæр æвзонгады мысæн бонтæ хæссынц æхцондзинад, уымæн æмæ адæймаг æвзонгæй вæййы кæддæриддæр æнæмæт æмæ уæнгрог, уымæ гæсгæ фæтырнынц фидæны цардмæ уæндонæй. Уæдæ ацы диссаджы бæрæгбон рæсугъд æмæ хъæлдзæгæй æрвитыны тыххæй 27-æм июны спортивон галуан «Олимп»-ы территорийыл уагъд æрцыд цымыдисон концерт.
Бæрæгбонон мадзал байгом РХИ-йы Фæсивæдон политикæ, спорт æмæ туризмы фæдыл комитеты арфæйы ныхæстæй.
Фæлæ нæ фæсивæды минæвæрттæ кæд сæ бæрæгбон хъæлдзæг зæрдæйæ нысан кодтой, уæддæр уыдон æрæмысыдысты нæ куырыхон хистæр Джусойты Нафийы рухс ном. Бирæ хъарм ныхæстæ загъд æрцыд, ацы изæр Нафийы тыххæй. Стæй йын, иу уысм æмырæй алæугæйæ ссардтой йæ рухс ном.
Фæсивæдæн сæ бæрæгбонон изæрмæ арфæ кæнынмæ æрбацыд РХИ-йы Президент Бибылты Анатоли:
– Мах абон ацы диссаджы бæрæгбоны цин кæнæм нæ фæсивæдыл. Мæ зынаргъ, рæсугъд æмæ цардбæллон фæсивæд! Зæрдæбынæй уын арфæ кæнын уæ бæрæгбоны цытæн, кæцы уын уæ зæрдæйы уадзы цины æнкъарæнтæ, разæнгард уæ кæны позитивон цардуагмæ, басадзы уыл ныфсы базыртæ æмæ йæм уымæ гæсгæ сымах фенхъæлмæ кæсут æнæрхъæцæй. Куыд æй зонæм, афтæмæй ацы бæрæгбон нысан кæнынц канд Хуссар Ирыстоны фæсивæд нæ, фæлæ æппæт Уæрæсейы Федерацийы дæр. Уый та символикон æгъдауæй нысан кæны, мах дæр бирæбæрцæй Уæрæсейы æмбæстæгтыл нымад кæй цæуæм, уый. Уæрæсе та махæн кæддæриддæр у нæ ирвæзынгæнæг æмæ æдзух дæр ис нæ фарсмæ. Махæн зындгонд у, Уæрæсейы фæсивæд ам куыд хæцыдысты æмæ нын сæрибар цард куыд æрхастой, уый.
Мæн ма бафæнддзæн, цæмæй нæ фæсивæд размæ цæуой, фылдæрæй фылдæр цы кæной.
Нæ зынаргъ кæстæртæ! Мæн фæнды, цæмæй уын хорз цард уа, цæмæй цæрат сабыр арвы бын размæцыд бæстæйы.
Нæ республикæйы къухдариуæгад стыр хъусдард здахы йæ фæсивæдмæ. Уый тыххæй та æппæтдæр араздзыстæм, цæмæй нæ фæсивæдæн сæ ахуыры, куысты æмæ царды размæцыды уавæртæ хуыздæр кæной. Уый та нæ къухы бафтдзæн нæ фæсивæдимæ иумæ æмархайды руаджы. Зæгъдзынæн ма уын: ма тæрсут куыстæй, тырнут царды бæрзæндтæм æмæ стыр æнтыстытæ уæ къухы бафтæд! Сымах стут нæ фидæн æмæ уæ мах æвæрæм стыр ныфс. Ноджы дæр уæ бæрæгбоны хорзæх уæнт!
Бæрæгбонон изæр ма барæсугъд кодтой, нырыккон домæнтæм гæсгæ аиввæ-лыст сценæйæ лазерон шоуты равдыстытæ дæр.
Нæ фæсивæдæн ма РХИ-йы Президент æмæ Фæсивæдон политикæ, спорт æмæ туризмы комитеты хъæппæрисæй сæ бæ-рæгбонмæ хуынд æрцыдис румынаг зарæггæнджыты къорд «Radio Killer». Уыдон сæ бирæнымæц музыкалон но-мыртæ балæвар кодтой хуссарирыстойнаг фæсивæдæн. Нæ фæсивæдæн сæ бæрæгбонон изæр ахаста æмбисæхсæвмæ.
Туаты Ларисæ
Comments are closed, but trackbacks and pingbacks are open.