Нæ республикæйы скъолаты Ирыстоны истори æмæ географи ирон æвзагыл ахуыр кæныны фарстытыл сæрмагонд æмбырды æруынаффæ кодтой Президент Бибылты Анатоли, Хицауады Сæрдар Пухаты Эрик, Ахуырад æмæ зонады министр Гасситы Натали, зонадон æхсæнады минæвæрттæ, Хуссар Ирыстоны скъолаты истори æмæ географийы ахуыргæнджытæ, мыхуырмæ цæттæ чи у, уыцы чингуыты автортæ.
Гасситы Натали куыд загъта, афтæмæй абоны бон ирон æвзагмæ республикæйы къухдариуæгады фарсæрдыгæй ис стыр хъусдард æмæ Ахуырад æмæ зонады министрад фæнд кæны ацы системæмæ рахизынмæ растæй бацæуын.
«Мах æй иууылдæр хорз æмбарæм, Ирыстоны истори æмæ географи амонын кæй хъæуы ирон æвзагыл. Истори æмæ географийы фæдыл фæнд кæнæм иу дыууæвзагон чиныг мыхуыры рауадзын, цæмæй ахуыргæнæгæн йæ бон уа абарын æмæ сывæллæттимæ кусын, кæнæ та хицæнæй ирон æвзагыл чингуытæ рауадзын.
Уыимæ Ахуырад æмæ зонады министрад фæнд кæны ахуыргæнджытæн ирон æзагыл истори æмæ географийы фæдыл курсытæ ауадзын. Афтæмæй мах сабыргай рахиздзыстæм ирон æвзаг ахуыр кæнынмæ. Мах ма фæнд кæнæм ХИПУ-мæ фыстæг арвитын, цæмæй ирон æвзаджы сахаттæ фæфылдæр кæной, саразой куыд ирон, афтæ уырыссаг æвзагыл специализаци, афтæ ма фæфылдæр кæной ирон æвзаджы спецкурсы сахатты бæрц. Мах хорз æмбарæм практикты дызæрдыгдзинад, æвзаг амонын хуымæтæг кæнын кæй нæ фæнды, кæй зæгъын æй хъæуы, нырма бирæ терминтæ ис…
Цæмæй уыцы фæндагыл рацæуæм, уый тыххæй нæ хъæуы рæстæг. Ома, рæстæг рацæугæйæ, мах курсытæ куы ауадзæм, уæд контроль кæндзыстæм, цæмæй скъолаты урокты рæстæджы хъуыса ирон, мадæлон æвзаг», – загъта уый.
Йæ рады Президент банысан кодта, ирон æвзагыл Ирыстоны истори æмæ географийы чингуытæ мыхуыры рауадзыны ахсджиагдзинад.
«Ирыстоны хуссар æмæ цæгат хай сты æнæфæхицæнгæнгæ. Мах алыварсонæй дæр архайæм нæ адæмы иумæйагдзинадмæ æмæ нын истори дæр ис иу. Ирыстоны историйы чиныг мыхуыры рацыд æмæ хаст æрцыд ахуыр кæнынмæ скъолатæм. Мах дзы хъуамæ ивындзинæдтæ æмæ Хуссар Ирыстоны фæдыл уæлæмхас æрмæджытæ бахæссæм», – загъта Бибылты Анатоли.
Уый æрдомата, цæмæй цы æрмæг æртымбыл кодтой, ууыл бакусой, профилон специалисттæм сæ бавдисой æркæсыны тыххæй æмæ дарддæр дæр ацы фарстытæм ноджыдæр æркæсой.
Сæ хъуыдытæ ма загътой постконфликтон фарстытæ æххæст кæныны фæдыл Президенты Æххæстбарджын минæвар, историон зонæдты кандидат Джиоты Мурат, кæцы фæндон бахаста Хуссар Ирыстоны историйы фæдыл ахуырдон æххуысы чиныг мыхуыры рауадзын Ирыстоны историйы сæйраг ахуыргæнæн чиныгæн уæлæмхасы хузызы, æмæ филологон зонæдты кандидат Плиты Гацыр, кæцы банысан кодта имуæйаг ахуыргæнæндæтты ирон æвзаг лæмбынæгдæр ахуыр кæныны ахсджиагдзинад.
РХИ-йы Президенты пресс-службæ
Comments are closed, but trackbacks and pingbacks are open.