РХИ-йы Хицауады Сæрдары хæстæ рæстæгмæ æххæстгæнæг Бекъойты Геннади бабæрæг кодта, Къостайыхъæуы аграрон куыстуат «Южный сад»-æн цы фæткъуыйы плантацитæ ис, уый æмæ бынаты базонгæ ис республикæйы егъаудæр инвестицион проекты хæдзарадон архайдимæ.
Ныр дыккаг хатт Къостайыхъæуы фæткъуыйы плантацитæй исынц хъæздыг тыллæг. Продукцийы 4 тоннæйы бæрц æрæмбырд кодтой фарон, талаты куы ныссагътой, уæд.
Инвестортæ сæ фыццаг тыллæг балæвар кодтой Ленингоры, Дзауы æмæ Цхинвалы районы ахуыргæнæндæттæн. Ныртæккæ фæуд кæнынц тыллæг æфснайæн куыстытæ, кæцыйæн йæ фылдæр хай (50 тоннæйы), куыстуаты къухдариуæгад аскъуыддзаг кодта республикæйы уагдæттæн балæвар кæнын.
Аграрон куыстуаты пресс-службæйы минæвары ныхæстæм гæсгæ, ацы аз тыллæгы иу хай инвесторты уынаффæмæ гæсгæ ногæй лæвæрд цæудзæн Цхинвалы скъолаты æмæ скъолайы агъоммæ уадæттæ, сывæллæтты сфæлдыстады галуан, колледж, университет, рынчындæттæ, зæрæдты хæдзар «Забота», афтæ ма æххуысхъуаг бинонтæн. Æнæ хъусдардæй нæ баззайдзысты республикæйы районтæ дæр.
Хицауады Сæрдары хæстæ рæстæгмæ æххæстгæнæг Бекъойты Геннади куыд банысан кодта, афтæмæй Хицауад кусы инвестицион уавæр фæхуыздæр кæныныл, капиталон бавæрдтытæн уавæртæ аразгæйæ.
«Мах аразæм хъалонты преференцитæ, закъæттæ исæм, кæцытæ нын фадат дæттынц закъондæттæн тыгъдадмæ инвестицион архайд аздахынæн, инвестортæн æххуысы формæтæ аразæм уæлдай æнцонвадат æмæ ирддæрæй, æмæ æппæт уыдæттæ арæзт цæуынц Хуссар Ирыстонмæ инвесторты æрбакæнын, стæй экономикон процесстæ æрбæстон кæныны тыххæй. Куыстуат «Южный сад» у нæ республикæйы территорийыл аграрон инвестпроектты реализацийы æнтыстджын цæ-виттонтæй сæ иу. Райдианы дыргъдон арæзт æрцыд 18 гек-тары фæзуатыл, фæлæ инвестор фæнд кæны фæзуат 50 гектары онг рауæрæхдæр кæ-нын. Ацы аз куыстуат фыццаг хатт экспортмæ арвыста фæткъуыйы продукцийы цалдæр парти, кæцы республикæйы экономикон тыгъдады нæ уыд бирæ азты дæргъы», – банысан кодта Бекъойты Геннади.
Уымæй уæлдай ма уый загъта, зæгъгæ, Республикæ Хуссар Ирыстоны Уæрæсейы Федерацийы минæварад ахъаз кодта инвестицон проект «Южный сад» реализаци кæнынæн, æмæ цæттæ у республикæйы бизнесы рæзтæн æппæтварсонæй æххуыс кæнынмæ.
Фæткъуыйы дыргъдон арæзт æрцыд 2019 азы. Инвесторы ныхæстæм гæсгæ, нырма уал хъæуы тыллæджы 60 процент æрæмбырд кæнын. Фæткъуыйы быдырты кусынц 50 бынæттон кусæджы онг. Инвестор зайын кæны фæткъуыйы æртæ хуыз: гала, голден æмæ местар.
Банысан æрцыд, арæнгонд бæрндзинады æхсæнад «Юный сад»-ы тыллæг æмбырд кæнынмæ кæй фæхуыдта бнæттон цæрджыты. Куыстыты гуырахстмæ гæсгæ, фæткъуыты æмбырдгæнджытæ боны мидæг исынц 1000-2000 сомы онг.
Comments are closed, but trackbacks and pingbacks are open.