«Инвестицион программæйы нысантæй хуссар ирыстон 95 процентæй фылдæр сæххæст кодта»

Гаглойты Аланы интервью телеканал «Россия 24»-йæн

Нысан æххæстгонд у: Президент Инвестицион программæйы реализацийы тыххæй

Гаглойты Аланы ныхæстæм гæсгæ, аивгъуыйгæ аз нæ бæстæйы цæрджытæн æнцон аз нæ уыдис.

«Президентон æвзæрстытæ, сæрмагонд хæстон операцийы райдайын — уыдæттæ иууылдæр сæ фæд ныууагътой адæмы зæрдæты. Мæ командæимæ республикæ нæ къухтæм райстам карз политикон кризисы рæстæджы — иуæй-иу политикон тыхтæ нæ ныхмæ лæууыдысты, фæлæ нын бантыстис архайæг закъондæттынадæн дзуаппдæттæг уавæры баззайын. Мидæггагон политикон кризис æмæ уыимæ æвзæрстытыл бахардзгонд рæстæджы фæстиуджытæм нæ фæкæсгæйæ, сарæхстыстæм 2022 азы Инвестицион программæ 95 процентæй фылдæры бæрц сæххæст кæнын», — радзырдта Гаглойты Алан.

Президент бафиппайдта, зæгъгæ, тагъд рæстæджы республикæйы райдайдзæн масштабон инвестицион программæйы реализаци, зæгъæм, агропромышленон æмæ туристон-рекреацион къабæзты.

«Уыимæ иумæ, республикæйы географион хицæн-зинæдтæ нымайгæйæ, мах зонæм, нæ хæхты кæй ис исад, ома, дзæвгар пайдахæссæг къахинæгтæ. Мæ хæслæвæрдмæ гæсгæ, республикæйы Хицауад кусы æрзæткъахæн сæудæджерадыл, Цæгат Ирыстоны æмæ Уæрæсейы иннæ регионты профилон организацитимæ уыцы фарстаты фæдыл ныхас кæнæм, цыбыр дзырдæй, куыст цæуы», — загъта уый.

Президенты ныхæстæм гæсгæ, республикæйы цæрджыты бирæ азты дæргъы тынг тыхсын кæны «Дæллаг Зæрæмæджы» таможнæйон-уадзæн пункты ахсджиаг проблемæ.

«Тынг бирæ рæстæджы дæргъы Хуссар Ирыстоны президенттæй алкæйдæр фæндыдис уыцы фарста нывыл алыг кæнын. Ацы аз мах фарстайы фæдыл дзырдтам Уæрæсейы хицауадимæ. Иу мæйы размæ райстам дзуапп, зæгъгæ, 2023 азы уалдзæджы райдайдзæн таможнæйон пункты реконструкци æмæ паспортон контролы пункты нымæц дæр фæфылдæр уыдзæн. Кæдæй-уæдæй, уыцы проблемæ Хуссар Ирыстоны æмæ Уæрæсейы цæрджыты нал хъыгдардзæн», — загъта Президент.

Хуссар Ирыстон æмæ Уæрæсейы Федерацийы мидахастыты фæдыл фарстайæн дзуапп дæтгæйæ, Гаглойты Алан банысан кодта, дыууæ бæстæйы æмархайд кæй у тынг æууæнкджын æмæ æнгомбаст.

«Уæрæсе кæддæриддæр Хуссар Ирыстонæн æххуыс кодта. Нæ фарс хæцыд кæддæриддæр æмæ 2008 азы Гуырдзыстон Хуссар Ирыстонмæ куы æрбабырста, уæд нын нæ адæмы Уæрæсе ныццæгъдынæй фервæзын кодта. Уæдæй фæстæмæ Хуссар Ирыстоны адæм уынынц æмæ хатынц егъау æххуыс æмæ аудæн ахаст нæ стратегион æмцæдисоны æрдыгæй. Мах Уæрæсеимæ нæ къухтæ бафыстам 120-æй фылдæр нормативон документы бын, бафыстам Цæдисон æмæ интеграцион бадзырд. Æз афтæ нымайын, æмæ не ‘хсæн цы æнгом æмæ æууæнкджын ахастытæ ис, дыккаг ахæмтæ зын-тæй ссарæн сты», — банысан кодта Галойты Алан.

Сæрмагонд хæстон операци

«Донецк æмæ Луганскы адæмон республикæты хæдбардзинад алкæмæй раздæр банымадта Хуссар Ирыстон. Нæ лæппутæ 2014 азæй ныры онг сæ уырыссаг æфсымæрты сабыр царды бартыл тох кæнынц. Хæстон операци куы райдыдта, уæдæй бархионты нымæц фыл-дæр кæны. Уыцы лæппутæ æмæ 4-æм уæрæсейаг æфсæддон базæйы контрактонтæ — се ’ппæт дæр тох кæнынц, сæхи хæсджыныл нымайгæйæ. Алчидæр сæ æмбары, абон знаг нæ иумæйаг Уырыссаг дуне ныппырх кæнынмæ кæй бæллы æмæ нæ иумæйаг историйы сæрыл рахæцын куы нæ бафæразæм, уæд нын фидæн нæ уыдзæн.

Æнæмæнг, сæрмагонд хæстон операцийы кæрон уыдзæн нæ уæлахизы бон», — фидарæй банысан кодта нæ бæстæйы сæргълæууæг.