5-æм апрелы Цхинвалы РХИ-йы Хицауады хæдзары актон залы фойейы баконд æрцыдис нæ горæты Колыты Аксойы номыл Аивæдты паддзахадон лицейы хъомылгæнинæгты куыстыты равдыст.
Равдыстмæ рахастой: Хъотайты Аделинæ, Хуыгаты Виктория, Кокойты Валерия, Пæррæстаты Аннæ-Мария æмæ æндæрты куыстытæ. Æрыгон нывгæнджыты куыстытæ фенынмæ æрбацыдысты нæ республикæйы Хицауады Сæрдар Пухаты Эрик, РХИ-йы Ахуырад æмæ зонады министрады кусджытæ министр Гасситы Наталийы сæргълæудæй, Тыбылты Алыксандры номыл Хуссар Ирыстоны паддзахадон университеты ректор Тедеты Вадим, афтæ ма хуызфыссынадæн чи аргъ кæны, уыдон. Мадзалы райдианы лицейы директор Кæсойты Лаврент раарфæ кодта скъолайы ахуыргæнинæгтæн, сæхиуыл кæй кусынц æмæ сфæлдыстадон асинтыл цадæггай уæлæмæ кæй хизынц, уый сæраппонд. Уый ма банысан кодта æрыгон нывгæнджыты курдиат æмæ сæ архайдмæ тырнындзинад.
«Не скъолайы ахуыргæнинæгты нывтæн равдыст сорганизаци кæныны фæнд фæзындис Хъотайты Еленæмæ, кæцы æппæтдæр райста йæхимæ æмæ сывæллæттимæ бацæттæ кодта равдыст. Нæ ахуыргæнинæгтæ стыр цымыдисимæ хайад исынц равдысты. Уыдон цин кæнынц сæ куыстытыл æмæ сын ноджыдæр зæгъын арфæйы ныхæстæ. Нæ зæрдæ сын зæгъы фидар æнæниздзинад æмæ сæ дарддæры ахуыры та – æнтыстытæ», – загъта Кæсойты Лаврент. Уый ма йæ раныхасы куыд банысан кодта, афтæмæй равдысты экспозицимæ хаст æрцыдысты Сочийы уагъдцæуæг æхсæнадæмон пленэры хайадисджыты куыстытæ дæр. Паддзахадон Аивæдты лицейы нывкæнынады хайады стыр æнтыстыты тыххæй ма йæ раныхасы банысан кодта РХИ-йы шахмæтты федерацийы президент, аивæдты лицейы рауагъдон Саулохты Георги.
«Аивæдты лицей схъомыл кодта æмæ рауагъта бирæ курдиатджын рауагъдонты. Ацы равдысты бæрæгæй зынынц ахуыргæнинæгты курдиат æмæ уыдонæн сæ ахуыргæнджыты къухайст дæр. Нывтæ тынг фæцыдысты мæ зæрдæмæ æмæ сын мæ зæрдæ зæгъы сфæлдыстадон æнтыстытæ», – банысан кодта Саулохты Георги. РХИ-йы Ахуырад æмæ зонады министр Гасситы Натали дæр арфæ æмæ бузныджы ныхæстæ загъта æрыгон нывгæнджытæн æмæ сæ ахуыргæнджытæн, ахæм цымыдисон нывтæ адæмы рæгъмæ кæй хæссынц æмæ рæсугъддзинад кæй тауынц, уый сæраппонд.
«Мæн радон хатт дисы бафтыдтой нæ æрыгон нывгæнджытæ сæ диссаджы куыстытæй. Сымах стут курдиатджын æмæ уын уæ нывтæм кæсгæйæ, исын стыр æхцондзинад. Хуызджын ахорæнты руаджы сымах адæмæн æвдисут уæ арæхстдзинад æмæ зонындзинæдтæ, кæцытæй мах стæм сæрыстыр. Стыр бузныг зæгъын æппæт уыдонæн, кæцытæ хайад райстой ацы равдыст сорганизаци кæныны хъуыддаджы», – загъта Гасситы Натали.
Пухаты Эрик йæ рады стыр бузныг æмæ арфæйы ныхæстæ загъта мадзалы организатортæн æмæ йæ хайадисджытæн. Уый ма банысан кодта паддзахадон Аивæдты лицей кæй у нæ республикæйы культурæйы фадыджы суинаг кадрты куырдадз.
Нæ уацх.
Comments are closed, but trackbacks and pingbacks are open.