Арфæ кодтой рауагъдонтæн

Ацы аз нæ республикæйы Цхинвалы районы ахуырады хайад рауагъта 21 рауагъдоны.

Районы администрацийæн традицион ссис рауагъдон фæлварæнты фæстæ æвзонг фæлтæры æрбахонын æмæ сын зæрдиаг арфæтæ ракæнын.

Къостайы хъæуы, Дменис, Хелцуа æмæ Сатихъары хъæуты рауагъдонтыл цытджын æгъдауæй æмбæлдысты районы администрацийы залы.

Зноны скъоладзаутæ бæрæгбонгъуызæй æрбахызтысты залмæ. Ацы цытджын æмæ хъæлдзæг бон царды ног къæпхæнмæ кæй схызтысты, уый тыххæй сын раарфæ кодта ахуыры хайады бæрнон кусæг  Козаты Олег.

«Нæ зынаргъ рауагъдонтæ! Сымах ацы бон бахъуыды кæндзыстут цæрæнбонтæм. Ныр хъуыды кæнут уæ дарддæры професси æмæ цард аразыныл. Мæ цæст уын уарзы, цæмæй уæ алчи дæр йæ фидæны дæсныйады уа  хорз специалист. Мæн фидарæй уырны, æмæ сымах скъолаты, стæй уæлдæр ахуыргæнæндæтты дæр цы зонындзинæдтæ райсат, уыцы зонындзинæдтæ фæахъаз уыдзысты æвзонг паддзахады рæзтæн».

Цхинвалы районы администрацийы сæргълæууæг Плиты Алан райзæрдæйæ арфæ кодта рауагъдонтæн. «Уе ‘ппæты дæр хъуыды кæнын сабитæй, ныр сымахæй алчи дæр гоймаг у. Мæ зæрдыл лæууы, мадзæлттæ уадзгæ-уадзын-иу сымах æмдзæвгæтæ куыд кастыстут. Ныр царды къахыл ныл-лæууыдыстут! Абон уын арфæ кæнын уе ‘ппæтæн дæр æмæ уын мæ зæрдæ зæгъы, сæйраджыдæр, уæ ахуыры стыр æнтыстытæ. Ахуыр кæныны хъуыддаг сымахæн у сæйрагдæр æмæ цы уæ бон у, уымæй тырнут ахуыры бæрзæндтæм. Æппæт ацы азты дæргъы сымахæн уæ фарсмæ уыдысты уæ иууыл æввахсдæр адæймæгтæ – уæ ныййарджытæ æмæ ахуыргæнджытæ, кæцытæ сæ тыхтыл нæ ауæрдгæйæ, хъомыл кодтой сымах. Æмæ нæ уырны, сымах уæ хъомылгæнджыты æмæ Ирыстоны кад дæлæмæ кæй не ‘руадздзыстут! Арфæгонд ут ноджыдæр!” – дзырдта районы администрацийы сæргълæууæг.

Районы ахуырады хайады сæргълæууæг Лолоты Барис та афтæ загъта: «Уæ разы цы хæстæ æрæвæрдтат, уыдон уæндонæй аразут,  кæд уæ разы исты цæлхдуртæ лæууа, уæддæр. Кæмфæнды ма цæрат, ахуыр кæнат, кусат, æппынæдзух уæ зæрдыл лæууæд уæ райгуырæн къуым. Уæндонæй цæут размæ æмæ размæ кæнут Хуссар Ирыстоны».

Ныййарджыты номæй та раныхас кодта Козаты Алан. Стыр бузныджы ныхæстæ загъта  ахуыргæнджытæн сæ зæрдиаг æмæ аудгæ ахасты тыххæй. «Махимæ иумæ сымах дæр удуæлдай лæггад кодтат нæ сабитæн. Сымахыл фылдæр уæз æрцæуы  аккаг адæймæгтæ схъомыл кæныны хъуыддаджы».

Дменисы иумæйаг ахуыргæнæн скъолайы директор Дудайты Земæ скъоладзаутæн цæстуарзонæй раарфæ кодта: «Кæд-фæнды дæр уæ зæрдыл лæууæд: царды раст адæймагæй куы цæрай, уæд уын уыдзæнис кад!».

Рауагъдонтæн Цхинвалы районы администрацийы сæргълæууæг Плиты Алан балæвар  кодта  зæдты фæлгæндзтæ.

Уый фæстæ сценæмæ рахызтысты Дменисы хъæуы сывæллæтты рæвдауæндоны хъомылгæнинæгтæ музыкалон номыртимæ.

Уазæгты М.