Ацы аз скъола каст чи фæцис, уыдонæн 20-æм июны киноконцертон зал «Чермен»-ы уагъд æрцыд рæсугъд бæрæгбон – рауагъдонты бал.
Рауагъдонтыл сæ уарзон ахуыргæнджытимæ гауызыл цæугæйæ цытджын æгъдауæй æмбæлдысты нæ республикæйы къухдариуæггæнджытæ Президент Бибылты Анатоли, Хицауады Сæрдар Пухаты Эрик, Ахуырад æмæ зонады министр Гасситы Натали, горæт Цхинвалы администрацийы сæргълæууæг Коцты Алан æмæ æндæртæ.
Нæ республикæйы рауагъдонтæм бирæ зæрдиаг арфæтæ æмæ цытджын мадзал æнхъæлмæ каст киноконцертон зал «Чермен»-ы.
Бæрæгбонон мадзал байгом ис Галаты Барисы номыл кафт æмæ зарды паддзахадон ансамбль «Симд»-ы сæххæстгонд кафт «Симд»-æй. Уый фæстæ нæ рауагъдонтæн раарфæ кодта Паддзахад Аланийы Президент Бибылты Анатоли:
– Нæ зынаргъ, рæсугъд æмæ, фидæны сæрыстыр кæмæй хъуамæ уæм, уыцы фæсивæдæн абон у бæрæгбон æмæ сын кæнын зæрдиаг арфæ. Махæй алкæмæн дæр хистæр фæлтæрæй йæ зæрдыл æрлæууынц йе скъолайон бонтæ, уæлдæр ахуыргæнæндоны азтæ.
Нæ зæрдыл тынг хорз лæууынц, фыццаг къласмæ куыд бацыдыс-тæм æмæ скъола каст фæуыны бон дæр.
Æз банысан кæндзынæн уый, зынаргъ кæстæртæ, сымах абон рауагъдонтæ дæр нал стут, уымæн æмæ радтат уæ рауагъдон фæлварæнтæ, фæлæ нырма студенттæ дæр не стут. Уымæ гæсгæ уын арæзт æрцыд абоны цытджын мадзал. Сымах, уæ рæстæг æрвитгæйæ, райсдзыстут æхцондзинад, сымах уæ цæссыг дæр калдзыстут, фæлæ уыдон уыдзысты фылдæрбæрцæй цины цæссыгтæ. Абон сымахыл, нæ зынаргъ рауагъдонтæ, цин кæнынц уæ ныййарджытæ, уæ ахуыргæнджытæ, уæ хæлæрттæ, уæлдай тынгдæр та уыл цин кæнынц уæ фыццаг ахуыргæнджытæ. Уыдоны нымæцы стæм мах дæр, нæ республикæйы къухдариуæггæнджытæ, афтæ цин кæны æгас Хуссар Ирыстон.
Махæй алкæйы дæр фæнды, цæмæй фидæны сымах уат амондджын æмæ схизат царды бæрзæндтæм. Мæн ма бафæнддзæн уый, æмæ сымах кæдæмфæнды дæр куы ацæуат, уæддæр цæмæй уæ райгуырæн Ирыстоны макуы ферох кæнат æмæ æрцæуат уæ райгуырæн къуыммæ. Афтæ ма макуы ферох кæнут уе скъола æмæ ахуыргæнджыты, æрбацæут æмæ-иу бузныджы ныхæсфтæ дзурут уæ ахуыр-гæнджытæн.
Æз та уын ноджыдæр арфæ кæнын мæхи номæй, нæ республикæйы къухдариуæгады æмæ æппæт ирон адæмы номæй дæр. Стыр Хуыцауы фæдзæхст ут уе ‘ппæт дæр!
Нæ республикæйы Президент Би-былты Анатолийæн Хуссар Ирыстоны рауагъдонтæ сæхæдæг дæр загътой бузныджы ныхæстæ. Уыдоны бафæндыдис, цæмæй нæ Президент йæ равзаргæ фæндагыл куса æнæниз æмæ уæнгрогæй. Бакастысты ма йын рауагъдонты ныстуан дæр: «Зынаргъ Президент Анатоли Ильяйы фырт, ды æрлæууыдтæ дæ президентон архайды фæндагыл, мах та – 2017 азы рауагъдонтæ æрлæууыдыстæм фидæны царды фæндагыл. Уымæ гæсгæ мах абон зæгъын фæнды уый, æмæ Хуыцауы фæндæй фондз азы фæстæ цæмæй фембæлæм æмæ кæрæдзийы æнтыстытæй нæ зæрдæтæ барухс уой! Нæ фидæны фембæлд та цы уа иууыл нысаниуæгджындæр. Уый фæстæ мах иумæ æнгомæй кусдзыстæм нæ Райгуырæн бæстæйы хæрзиуæгæн», – дзырдæуы рауагъдонты ныстуаны.
Дарддæр бæрæгбонон изæры хъуыстысты ноджы бирæ арфæтæ æмæ музыкалон номыртæ. Сценæйыл ма ахуыргæнджыты æмæ рауагъдонты иу хай иумæ сæххæст кодтой ирон адæмон кафт «Симд» дæр.
Рауагъдонты бæрæгбонон балы фæлгæтты сценæмæ хаст æрцыд сæ номыл торт цырæгътимæ.
Рауагъдонтæм æнхъæлмæ кастис сюрприз – уыдоны номыл хуынд æрцыдис цæгатирыстойнаг зарæггæнджыты къорд V7 Club. Сæ уарзон музыкалон номыртæм хъусгæйæ, уыдон истой æхцондзинад æмæ æрвыстой хъæлдзæг рæстæг.
Ацы изæр ма рауагъдонты номыл Сывæллæтты сфæлдыстадон галуаны кæрты сценæйыл уагъд æрцыд концерт, уый фæстæ та сæ номыл бæрзондæй ныццæхæр калдта бæрæгбонон фейерверк.
Кæд уыцы бон æвзæр боныгъæд уыд, уæддæр сæ æвзонг зæрдæтæ цинæфсæст уыдысты æмæ сæ бæрæгбон арвыстой хъæлдзæг зæрдæйы уагимæ.
Туаты Ларисæ
Comments are closed, but trackbacks and pingbacks are open.