Ленингоры районы Æмдзæрины хъæуы амбулаторийæн Хуссар Ирыстоны президент Гаглойты Аланы бахæсмæ гæсгæ лæвæрд æрцыд æнæмæнгхъæуæг цардуагон техникæ æмæ медицинон ифтонггæрзтæ.
Уый размæ июлы мæйы, Ленингоры районмæ инспекцион балцы фæлгæтты, Æмдзæрины хъæуы (Цъинагары), республикæйы сæргълæууæг фембæлд цæрджытимæ, кæцыйы хатдзæгтæм гæсгæ радта хæслæвæрд амбулатори сифтонг кæныны тыххæй.
Ленингоры районмæ ифтонггæрзтæ æрластой майрæмбоны президенты администрацийы къухдариуæггæнæджы хæдивæг Тыбылты Алан, президенты æххуысгæнæг Плиты Алан, паддзахады сæргълæууæджы контролон управленийы хистæр Цоциты Сæрмæт.
Мадзалы рæстæджы сæм медицинон кусджытæ бахатыдысты, цæмæй сын самал кæной кардиограммæ аразæн аппарат, афтæ ма радзырдтой куысты рæстæджы сæвзæргæ проблемæты тыххæй. Плиты Алан ныфс бавæрдта, зæгъгæ, æввахс рæстæджы аппарат æлхæд æрцæудзæн æмæ йæ фæхæццæ кæндзысты амбулаторимæ.
Медицинон хо Мæргъиты Маринæ банысан кодта Цъинагары цæрджытæн паддзахады æххуысы ахсджиагдзинад.
«Президент æрæджы уыд ам, базонгæ ис нæ проблемæтимæ. Мах цы хъуыд, уыдон нын самал кодтой. Æппæт коллективы номæй мæ фæнды бузныг зæгъын республикæйы хицауадæн», – банысан кодта уый.
Уымæй уæлдай ма, Ленингоры районы Орчъосаны хъæуы Культурæйы хæдзарæн лæвæрд æрцыд, кæмæ æнхъæлмæ кастысты, ахæм лæвар – музыкалон синтезатор.
Æмбæлон куырдиатимæ Культурæйы хæдзары минæвæрттæ бахатыдысты президентмæ районмæ йæ балцы рæстæджы.
Президенты администрацийы минæвæрттæ фехъусын кодтой, зæгъгæ, мæйы кæронмæ сывæллæтты ансамбль «Арвырон»-æн кæй ратдзысты кафты уæлæдарæс.
***
Цъинагары зонæйы сæххæст кодтой нуазыны доны æмбырдгæнæны ссыгъдæг кæныны фæдыл куыстытæ. Ацы бассейнæй дон цæуы Цъинагары æмæ Орчъосаны хъæутæм. Уый тыххæй фехъусын кодта паддзахады сæргълæууæджы контролон управленийы хистæр Цоциты Сæрмæт.
Уый размæ æмбæлон хæслæвæрд радта президент Гаглойты Алан Ленингоры районмæ инспекцион балцы фæлгæтты. Паддзахады сæргълæууæджы балцы рæстæджы хъæуы цæрджытимæ æруынаффæ кодта иууыл карздæр проблемæтыл, кæцытæ тыхсын кæнынц районы цæрджыты.
Цоцийы фырты ныхæстæм гæсгæ, ног къуыри паддзахадон унитарон куыстуат «Водоканал»-ы директор бабæрæг кæндзæн бассейн æмæ аскъуыддзаг кæндзæн фæрсудзæнтæ раивыны фарст.
«Донæмбырдгæнæны фæрсудзæнтæ ивд æрцæудзысты, цæмæй районы цæрджытæ исой гъæдджын дон», – банысан кодта уый.
